Февральданул 9-нний МахIачкъалаллал бакIчинал хъиривчу МахIаммад МахIаммадовлул дурну дур кьатIувсса совещание, яла инспекциялул комиссия лавгун бур базаллувун диялдакъашивуртту ххал дуллан. Комиссиялуву бивкIссар шагьрулул администрациялул вакилтал Советский райондалул администрациялул зузалт, налогирттал къуллугърал ихтиярду дуруччай органнал, Роспотребнадзорданул, МЧС-рал вакилтал, миннащал архIал ивкIссар 2-мур базаллул управляющий компаниялул гендиректорнал кIанайма Камил ГьитIинмахIаммадов.
ХIасан Аьдилов
ДакIнийн бутанну, укунсса рейд дурну диркIссар ларгмур шинал ахирданийгу. Та чIумал тапшур бувну бивкIссар базаллуву низам дишин.
Комиссиялул ххалбавуртту дайдирхьуну дур Батырайл кучалул чулуха базаллувун буххайсса кIанавату, ххал бувну бур щалва базар. Инспекциялул члентурал ляркъуну дур тамансса диялдакъашивуртту. Масалдаран, Роспотребнадзорданул управлениялул санитар надзорданул отделданул хъунма-хъунмур пишакар Эсед Ахадовал укун бувсунни: «Жун шикку чIярусса диялдакъашивуртту ляркъунни: ччяни зия шайсса продукция ядаврил ва духхаврил шартIру дуручлай бакъар, личIи-личIисса журалул продукция ва цамургу кьай цачIу дахлай бур, пулансса продукциялул мюхчаншиву (гания зарал къабияву) ва качество исват буллалисса документру бакъар. Мунияту кIул бан бюхълай бакъар, га продукция Турциянавату ягу ЕС-рал билаятирттавату дуркIсса дуссарив ягу дакъассарив (Аьрасатнал Президентнал хIукму буссар тихасса продукция дучIан къадитаврил хIакъираву). Маша буллалисса циняв кIанттурдайн щин дурцуну дакъари, машачитурай дакъар санитар янна».
МахIачкъалаллал Машлул, муштаринал рынокрал ва хIаллихшиннал управлениялул хъунмур Динара Алхазовалгу бувсунни базаллувусса диялдакъашивурттая: «Жу бусарду цинярда диялдакъашивурттая базаллул каялувчитурахьгу, цахьва машачитурахьгу. Шикку дур антисанитария лагмара. Щалва базаллуву бакъар хъуслил, кьай-кьуйлул багьа ккаккан бувну, ца кIанай дур дахлай дикIгу, нисгу, цайми затругу, мукун дахлан къабучIиссар. Жу миннал гьарзатрая бусарду, умуд бур ва ххуллух низам дишиншиврийн», — увкунни ванил.
Шагьрулул администрациялул базаллул каялувчинал хьхьичI бивхьуну бур масъала – маша буллан так хасъсса павильоннаву, ми павильоннаву буручлан санитарно-эпидемиологический нормарду.
Ванияр 2 шинал хьхьичI базаллул каялувчитурал ва налогирттал органнал хIарачат бувна базаллувусса ишбажаранчитал (машачитал) налограл учетрайн ласун. Му иширан хасну базаллул 2-мур зивулий тIивтIуну бия кабинет, тикку машачитураща хъанай бия, хасъсса документру буллуну, свидетельство ласун.
Советский райондалул инспекциялул отделданул хъунаманал хъиривчу Сулайман МахIаммадовлул мукъурттийн бувну, га даву ттинияр тихуннайгу дуллан тIий бур. Гиккува бур налогирттал пост, тикку машачитураща хъанай бур архну къалавгун тиккура дулун налогру. Гьарца кьини дюдулувух баян буллай бур налогирттал учетрай бацIан аьркиншиву.
Налогру къадуллалиминнащалгу даву дуллай бур, налогру дуллали буллай бур.
