Дагъусттаннал ПаччахIлугърал статистикалул управлениялул ккаккиярттайн бувну, ларгсса шинал инфляция хьуну дур дурагу 14 процентрал, личIину декабрь зуруй – 1 процентрал.ДукIу щалла шинал мутталий дукиялул багьри лахъ хьуну бур 16,4 процентрал, декабрь зуруй тIурча – 1,4 процентрал; дукия дакъасса кьай-кьуй ххира хьуну дур 11,1 процентрал, личIину декабрь зуруй – 0,6 процентрал; хIаллихшиннал (услугарттал) багьри лахъ хьуну бур 11 процентрал, декабрь зуруй – 0,4 процентрал.

Лавгсса декабрь зуруй ляли­чIину ххира хьуну дур ахъулсса ва ахънилсса. Масалдаран, помидорду ххира хьуну дур декабрьданий 31,8 процентрал, шинал му­тталий – 20,4 процентрал; нисварти – декабрьданий 22,4 процент­рал, шинай – 33,5 процентрал. ХIисав хьунну ххира хьуну бур къюмайтIутIи – 8,8 процентрал ва бананну – 3,2 процентрал.
ЛирчIмур дукиялувату 8,5 процентрал ххира хьуну бур ккунукру, 7,7 процентрал – повидло, джем, мураппа; кIурал бувсса чавахъ – 6,1-6,3 процентрал. Декабрьданул ахирданий 1 инсаннан дукиялул продуктирдал минимальный набор республикалий хьуссар дянивну ларсун зуруй 3 азаллий 592 къурушрансса.
Дукиялул дакъами кьай-кьуйлува декабрьданий хIисав хьунну ххира хьуну дур кIинттул лаххайсса янна.
Мюрщи оьрчIал куртри ххира хьуну дур 11,1 процентрал, яслилул оьрмулул оьрчIансса щарщу янналул кастунну — 8 процентрал. Арантуннал курткарду (кIинтнил), усру, оьрчIал усру, хъаннил пальто, оьрчIал жимперду ва цаймигу хъаннил лаххия ххира хьуну дур 3,4-5 процентрал.
Ххира хьуну бур цаппара даруртту 6,6 – 7,4 процентрал, хIатта жучIава буккан байсса анальгингума.
Ххира хьуну дур мукунна оьрчIансса пластмассалул ссихьри, бушкъапру, светильникру, кастунну дайсса ппалул янна ва м.ц.
ХIаллихшиннава декабрьданий 17,3 процентрал ххира хьуну бур поездрай плацкарт­рал ва 11 процентрал купейрал кIанттурдал багьа, 9,1 процентрал ххира хьуссар шагьрурдая-шагьрурдайнсса телефондалувухсса дахIаврил багьа.
Утти буруганну МахIач­къалалив цуксса ххира хьуну дурив дукиялул продуктру иширайну. Шикку кIицI къадурну дур базаллуву оьлил дикI ххира шаву, муния цичIав чивчуну бакъар. Шинал мутталий дикI ххира хьунни 40 процентрал. ДукIу дия 240-250 къурушран, декабрьданий – 330-340 къурушран. Нис ххира хьуну дур 40-50 процентрал. ЦIана яла кьюркьумур нис дур 290-300 къурушран килону. Ккунук ххира хьуну бур сайки 80 процентрал. ДукIу ккунукрал ца клеткалул багьа бия 120 къ. (дянивну лавсун), цIана 30 ккунукрал багьа бур 190-200 къуруш. Помидор дукIу гъинттул дия 40-50 къурушран кило, утти дур 200-250 къурушран. Микку, 30 процентрал ххира шаву дакъарча, сайки 350-400 процентрал ххира шавур. Цирдагу ххира хьуну дур жулла Да­гъусттаннал помидорду – Аданакуллал, Учккантуллал ва цаймигу шяраваллилсса.
Сайки 80 процентрал ххира хьунни ххяххиялул аьгъушиву (растительное масло), дукIу литралул 1 шуша 60 къурушран диркIхьурча, гьашину 100-110 къурушран дур.
Циванни дукиялул продуктру ххира хъанахъисса куну цIувххукун, машачитал бур, ай туну, долларданух бурувгун къуруш кьюкьлай дур тIий. Долларданух ласлай бакъарухха зу дикIгу, накIгу, нисгу, помидоргу, муму-тамургу. Къаххира хьун аьркинсса дукия машачитурал кьасттан ххира дуллай бур, миннал хьхьичIалу кьукьингу бюхълай бакъар щищачIав.