-Дагъусттан Республикалий МФЦ-рал (Многофункциональный центр) филиаллу баврил программа щаллу дурссар, — увкунни январьданул 27-нний пресс-конференциялий Республикалул МФЦ-лул директор ХIусман Хасбулатовлул.

Ванал бувсмунийн бувну, хIакьинусса кьини Дагъусттаннай МФЦ-рал хIаллихшинну ласун бюхълай бур 92,4% агьалинал. Гьарца кьини МФЦ-рдайн занай ур сайки 3 азара инсан. Ларгсса шинал республикалий тIивтIуссар 36 азарва МФЦ. «Мои документы» тIисса журалул центрду хIакьину зий бур гьарца муниципалитетрай. Зун­ттал районнай зий бур цинявппагу 57 МФЦ ва 300-яргу ххишала­сса архсса офисру. Гай циняв зий бур ца чIавахьулттил принцип­рай: инсан укIлай ур ичIаллил документирттащал – паспорт, захIматрал книжка, лирчIмур даву дуллай ур центрданул зузалал. МФЦ бур ттизаманнул журалийсса офис. Тикку вичIидишин бюхълай бур юристнал консультациялух ва дуллай бур цаппара коммерциялул журалийсса хIаллихшинну.
Вай идарарттал ва вайннул давурттал хъунмур мурад хъана­хъиссар агьалинал оьрму ххуй баву, куклу баву, лавайсса даражалул муниципал, регионал ва федерал хIаллихшинну даву. Масалдаран, ласун цалчинсса паспорт, кулпатраву оьрчI шай, къатри ласун аьркин шай, пенсиялийн уккай, ми иширттаву инсаннан аьркинссар МФЦ-лул идаралийн гьан, документру бигьану ва ччяни щаллу баншиврул.
2015 шинал республикалул агьалинан МФЦ-лул площадкардай дурну дур 465 азаллий 670 хIаллихшин, миннувату 301 071 – паччахIлугърал ва 78 291 муниципал хIаллихшинну. ХIакьину МФЦ-рдай дуллай бур 300-яр ххишаласса журардал хIаллихшинну, 27 федерал ва рес­публикалул ведомствартталсса.
МФЦ-лий яла чIявуну даймур хIаллихшин хъанай дур Федерал Регистрационный къуллугърал дайсса хIаллихшинну. Ларгсса шинал дурссар 30 азаллий 148 аьрщарал участокир­ттал заллушиврул ихтиярдан­сса паччахIлугърал регистрация. Ми хъанай дур бюджетравун сайки 100 млн. къуруширттал дучIан даву цалва-цалва муниципалитетирттай.
МФЦ-лийн миграциялул къуллугърал хIаллихшиннал хIакъираву увкIун ивкIссар сайки 58 азара инсан. Ми дур чIявучин прописка – выписка ва паспорт баххана баврил хIаллихшинну. Ялагу ти­кку дуллай бур социал иширттал хIаллихшинну: пособияртту щаллу баву, субсидияртту ласаву, личIи-личIисса справкарду ласаву.
МФЦ-рду бувния махъ давур­ттал щаллу бувну бур 1177 инсан.
Ларгсса шинал республикалул бюджетравун МФЦ-рдал дучIан дурну дур госпошлинардал 38 млн. къурушру.