ДР-лул Строительствалул, архитектуралул ва ЖКХ-лул министерствалул баян бувсса куццуй, ларгсса шинал Дагъусттаннай квартирарттал багьри ялавай багьну бакъар. Мура чIумал Аьрасатнал регионнай квартирартту кьювкьуну бур аьмну лавсун 15 процентрал.

Экспертътурал бувсмунийн бувну, 2016 шиналгу квартирар­тту кьюкьлан тIий бур, мунил сававрттавасса ца хъанай дур инсантураща ласун къахъанахъаву ва мукунна билаятрал экономика заэв шаву.
Дагъусттаннай инсантал яшайсса аьмсса площадрал ца квадрат метралухсса багьа кка­ккан бувну бур 25 азаллий 450 къуруш. Ми чанссар чIаххувсса регионнайминнуяр. Масалдаран, Чачаннал республикалий ца квадрат метра къатрал дур 31 азардаксса къуруширттан, Краснодардал крайрай – 30 азарда къурушран.
Яла ххирами квартирартту бур Москавлив (90 азаллий 400 къуруш), Санкт-Петербурглив ( 56 азаллий 237 къуруш). Яла кьювкьуми квартирартту бур Къарачай-Чаргаснал Республикалий (23 азаллий 073 къуруш), Ингушетиянал Республикалий (23 азаллий 950 къуруш) Ставрополлал крайрай (25 азаллий 451 къуруш).
Дагъусттаннай, агьалиначIа квартирартту ласунсса арцу диялсса дакъанагу, квартирартту кьюкьин буллай ба­къар. МахIачкъалалив цаппара кIанттурдай ялунгума ххира хьуну бур квартирартту.
ДР-лул Министройрал бувс­мунийн бувну, къатрал иширайнусса себестоимостьрайн бувну ца квадрат метралул дянивну лавсъсса багьа хъанай бур 32-34 азарда къуруш.
Республикалий 2015 шинал, 2014 шинах бурувгун, къатри даву гьарза хьуну дур 9,2 процентрал, дурну дур 1 млн. ва 790 азарда метрарду къатрал. 2015 шинал строительствалул бутIуву дурну дур 113 млрд. къурушир­ттансса давуртту.