Январь зурул 23-нний ссят 11.05 хьусса чIумал «Кавказ» федерал ххуллул 746-мур километралий Тотурбийкала шяраваллия арх бакъасса кIанттурдай хьунни Дагъусттаннал УФСИН-лул зузалт нанисса машина хIаласса ДТП.
3-мур СИЗО-лува нанисса УФСИН-лул машина «Тигр» щуну бур МахIачкъалалия Хасаврайн нанисса «Газельданийн» (ГАЗ 27033). Газельдануву 15 инсан ивкIун ур.
Бусласимунийн бувну, ДТП-лун багьана хьуну бур хьунив ххуллийн бувксса «Жигули». Ва ишираву 3 пассажир оьрмулуцIа хьуну ур, 12 личIи-личIисса цIунцIияртту хьуну Хасаврал ва Къизилюртуллал азарханардайн биян бувну бур.
Мукунма цIунцIияртту хьуну, Къизилюртуллал азарханалийн биян бувну бур «Тигр» машиналуву бивкIсса УФСИН-лул 8 зузала. Ва иш хьусса кIанттурдайн бувкIун бур ДР-лул УФСИН-лул хъунама, виваллил службалул генерал-майор М. М. Даххаев, УФСИН-лул ОСБ-лул хъунама, виваллил службалул полковник М. Х. Азаев, УФСИН-лул ИЛС-рал ва ПК-лул хъунама, виваллил службалул подполковник З.Ю. Кушаев, УФСИН-лул ОСН-лул хъунама, виваллил службалул подполковник А.Т. Аьбдуллаев ва цаймигу Управлениялул зузалт.
ЦIанасса чIумал ва иширал хIакъираву хъиривлаявуртту дуллай бур.
«Тигр» машиналул шупIир, виваллил службалул капитан Э. Бабатов ва ишираву тахсир хьума кIул аннин кIива зуруйсса увгьуну ур.
ЛивтIусса
ва бивщусса хьунни
МахIачкъалалия Хасаврайнсса ххуллий хьусса ДТП-луву 19 инсаннан зарал бивунни.
Миннава 3 инсан усса кIанай оьрмулуцIа хьунни. 16 инсан азарханардайн биян бунни. Миннава 8 инсан военнослужащий бур, гайми укунмасса инсантал бур. Ва иш хьусса баяйхту райондалул азарханардал хIакинтуран кумагран бувкIунни Дагъусттаннал катастрофардал медициналул центрданул бригада. нейрохирург, реаниматолог, таракальный хирург.
Зарал бивсса инсантурава 3 инсан ур Хасаврал азарханалий (ЦГБ), бакIран цIунцIия хьусса 2 хъамитайпа бур травматологиялий, ца инсан, амбулаториялий кумаг бувну, шавай итаавкьуну ур. Гайми циняв Къизилюртуллал азарханалий бур, миннава 3 ур захIматсса тагьарданий. Миннай операцияртту бувну бур.
Зарина Агмадова,
ДР-лул Минздраврал пресс-секретарь
