Инсаннал цалва оьрму бигьа бан ляхъан дурцири хъусливу ца яла хьхьичIунминнувух лифт духьунссар. Вайксса лахъзивурду дусса къатри, уттизаманнул, 50-60-хъул ххишалагу зивурду дусса, машлул ва бизнесрал центрду лифтру дакъа цукунчIав щаллу къашайссар.
Жулла дигьалагрулун цуксса хайр бурив муния, муксса заралгу бусса зат дур цурда лифт. Цанчирча, зия хьусса, дух хьусса лифтрая хъуннасса нигьачIишиву дуну тIий чIявуквартирарду бусса къатраву яхъанахъи­сса халкьуннан.

З. АьбдурахIманова
Январьданул 14-нний Москавлив «Алые паруса» комплекс­рал къатлуву хьусса лифтрацIун бавхIусса иширал цал ттигу жува нигьабусан бувну, жулва-жулвами къатрал лифтру ци тагьардануву дурвав тIисса пикрирдавун бивчунну. Цанчирча МахIачкъалаллал лахъкъатравусса чIяруми лифтру дуну тIий 25-30 шинал хьхьичI дирхьусса, ми ишла дан ккаккан дурсса чIумува дурксса.
«Алые паруса» къатраву лифт­рал чIан дагьну, ца хъамитайпа оьрмулуцIа хьусса ва иширая махъ Аьрасатнал лифтру дишайсса ва миннул ялув бавцIусса компаниярттал даву ххал дуллантIиссар Ростехнадзорданул пишакартурал. Укунсса хIукму бувну бур АьФ-лул ЖКХ-лул ва строительствалул министерствалул.
Ва иширацIун бавхIуну, МахIач­къалаллал бакIчи Муса МусаевлучIа, ДР-лул строительствалул ва ЖКХ-лул министр Ибрагьим Казибековгу гьурттусса, батIаву хьунни.
Шикку ххалбивгьунни шагьрулий цIуну дуллалисса къатраву лифт­рал оборудованияртту дишаврил ва миннуцIун дархIуну дуллалисса давурттал ялувсса суаллу. КIицI лавгунни лифтру дихьлахьисса ва ми кьамул дуллалисса, гихунмай миннулсса буллантIисса компаниярттал дяниву хасъсса кьутIирду цIакь дуван тIалав буллан аьркиншиву.
«Безопасность лифтов» тIисса Таможенный союзрал кьамул дур­сса регламентрайн бувну, шинай цал лифтру цукун зий дурив ххал буллан тIалав буллан аьркиншиву ва кка­ккан дурсса 25 шин ххишалагу хьусса лифтирдал оборудование ци тагьарданий дурив ххал дурну, багьайсса давурттив дуван.
Ростехнадзорданул вай мероприятиярду дурну махъ лифт зузаврил ягу къазузаврил акт дулун багьлай бусса бур.
БатIаврий кIицI лавгунни, цIана хъуншагьрулий дуллалисса цIусса къатраву дихьлай бушиву багьлул кьювкьусса лифтру. Ми чIяруми дусса дур Туркнал производствалул. Шагьрулул лахъкъатравусса лифтирдал ца цамургу захIматнийн багьсса масъала бусса бур цивппа халкьгу. Лифтирдавусса миннал чулухасса баччибакъулшиву ва кнопкарду ччувччуну, аьркинсса информациялул ялув рекламалул ултту лархъун лякъаву.
Аьмну щалва билаятрай лифтирдал оборудование 35% дух хьуну дусса дур. МахIачкъалалив тIурча 75% лифтирдал дусса дур бух хьуну, жулва оьрмурдан нигьачIину. Бувавагу 10 % лифтирдал дусса дур цIусса. БатIаврий «Махачкалалифтсервис» ООО-лул директор Арсен Мусаевлул бусаврийн бувну, зуруй цал вайннал ххал дувай­сса дур шагьрулул лахъкъатрал лифтру. Даххана дувайсса дур запчастьру, дакьин дувайсса дур гъаргъмур-лирмур. Укунсса даву дуван ца лифтран харж шайсса дур 1500-3000 къуруш. Лифтирдал электромеханиктал зий бусса бур управляющий компаниярттаву ва ТСЖ-рдаву. Миннаву чIявуми бусса бур пенсиялийн бувксса хъами. «Махачкалалифтсервисрал» ТСЖ-рдащал ва управкомпаниярттащал кьутIирду цIакь дувайсса дур. Механикалий зузисса лифтирдащал зузисса пишакартуран, аьдат бакъа, захIмат шайсса бур электрон журалий­сса лифтирдащал зун. Ца лифтерная тIалавну бусса бур 48 лифтрал шахта ххал бувну, мунил ялув ацIан.
Мунияту, МахIачкъалаллал администрация тавакъю буллай бур халкьуннахь. Балики лифт­равун зува бувххун, ци-бунугу ца зат щуркIал хьурча, нузкьунттив ххуйну къалакьлай, ягу къатIитIлай, ягу троссрал гужсса чIу баярча, мугьлат бакъа оьвчара зулла-зулла управкомпаниярдайн, ТСЖ-рдайн тIий.