Итни кьини МахIачкъалалив хьунни ихтиярду дуруччай органнал зузалтран квартирардал кIулли дуллалисса ххарисса батIаву.

ЧIярусса шиннардий цалла къат­ри дакъа, ялапаршиннардал шартIру къулай дан багьлай, ссавур духларгун ялугьлай бивкIсса 169 полициялул зузалтрахьхьун ва кьини шадлугърал даражалий дуллунни квартирардал кIулли.

Вайннавух бур цIанасса чIумал зузимигу, ветеранталгу.
МахIачкъалалив, Кьадиевлул цIанийсса кIичIираву 12 зивулий­сса полициялул зузалтрансса къат­ри «СМУ-55» компаниялул дуллай байбивхьуну бур 2013 шинал ахирданий. Дагъусттаннал Виваллил иширттал министерствалул тIалавшиннарайн бувну, вай къат­ри дурну дур цинярдагу шартIру хIисавравун ларсун.
Къатраву зий дур лифт, хIаят­раву бур оьрчIру тIуркIу тIунсса ва спортрал площадкартту, дурну дур цIуллу-сагъшиврул ссуссукьушиву думиннансса хасъсса пандусру.
Зузалтрахьхьун квартирардал кIулли дуллай ия ДР-лул виваллил иширттал министр, полициялул генерал-лейтенант Аьвдурашид МахIаммадов. Ванал барча бунни ахиргу цалва квартирарду хьусса зузалт ва барчаллагь увкунни полициялул зузалтрансса къатри циняв тIалавшиннарду хIисавравун ларсун, дакI дирхьуну дуллай бивкIсса строительтурахь.
— Къатри инсаннал оьрмулуву ца яла аьркинмур дур.
ХIакьину зущал архIал жугу ххарину буру зу зулва квартирардавун бизлай тIий. Зул шивусса оьр­му тяхъану, талихI-тирххандарай гьаннав, — увкунни Аьвдурашид МахIаммадовлул.
Хъирив ихтилат бунни «СМУ-55» ОАО-лул генеральный директор Игорь Олдоковс­кийл.
— Шанна шин хьунни жул вай къатри дуллай. Жун жулва яруннин ккавккунни ихтиярду дуруччай органнал зузалтрал хIарачатрайну республикалийсса тагьар ялу-ялун паракьат хъанай душиву. Жугу хIарачат буллай бивкIру цила дикIайкунсса цIакьсса, ххуйсса, зу рязину личIансса къатри дан. Умуд бур вай къатраву зун бигьа-рахIатсса оьрму бикIанссар тIисса , — увкунни ванал.
Кулпатирттахьхьун квартирардал кIуллигу дуллуну, Виваллил иширттал министерствалуву зузиминнан ва строительный компаниялул зузалтран бахшишру дурну махъ, кьувкьунни къатравун­сса ххуллу тIитIлатIисса ятIул лента. Цинявппа бувххун, ххал бунни квартирарду. Цинявппагу квартирарду цимурцаннул щаллу бувсса бур. Шиву дур паркетрал поллу, лачIун дурну дур обои, дирхьуну дур нузру, хIаммам байсса къатлуву дур ттизаманнул сантехника.
— Жул ххаришиврул дазу-зума дакъар. Сайки 20 шинай ялугьлай бивкIру жу къатри дулуннин. Жулва хиял бартлавгшиврийн, ахиргу жула квартиралуву яхъанантIишиврийн вих хьун хъанай бакъара. Хъунма­сса барчаллагь МВД-лул каялувчитуран жу мурадрайн биян бувсса», — тIий ххарину бур Связьрал центрданул отделданул хъунмур Эмиргем ХIажиева.
— Гьай-гьай, къатрал дузал бан багьлагьисса зузалт виваллил иширттал органнаву цикссагу ттигу буссар. Жу хIарачат банну мигу шайссаксса ччяни квартирардал дузал бан, — увкунни Аьвдурашид МахIаммадовлул.