ХIУСАЙННУЛ АРС ХIУСАЙНОВ НУРИПАША
Январь зурул 5-нний хар-хавар бакъа аьпалухьхьун лавгунни ЦIуйшиял шяраватусса ХIусайннул арс ХIусайнов Нурипаша.
Нурипаша увну ур 1934 шинал ЦIуйшиял шяраву заргал-гьарайзу ХIусайннул ва Аминатлул кулпатраву. ЦIуйшиял байбихьулул школа лавайсса кьиматирттай къуртал бувну, армиягу лавхъун махъ зун айивхьуну ур Каспийск шагьрулий ТЭЦ-рай. Зий уна, къуртал бувну бур Ленинградуллал жамирду бай институт. Микку дуклакисса хIаллайгу мунал сурат мудан диркIссар ХIурматрал улттуй.
Кьабивтун шагьрулийсса бигьасса пишагу, ххал бувссар Нурипашанал авлахърайсса хIухчил багьу-бизугу. Миккугу мунал ккаккан бувссар цува захIматрая нигьа усайма акъашиву. Амма, хъуниминнал тIалавшиндарайн бувну, цIунилгу зана хьуссар цала ТЭЦ-райн ва миччава увкссар пенсиялийнгу. МунацIун ларчIун дуссия «Нурипаша – ТЭЦ-рал ттарцI» тIисса цIагу. Ванан дуллуну дур диялсса бахшишру ва хIурматрал грамотартту, ва ур захIматрал ветерангу.
ХъунмурчIин оьрму Каспийскалий гьан бувсса ванал тикку бия чIявусса дустал, гьалмахтал. ЦIуйшиял шяраваллил жяматрангу бусравну, лавайну уссия.
Нурипашанал бивкIулул къумашиву кIидачIлай, жижара буллай буру кулпатрахь Зуйлишаннухь, арсурваврахь Бадруттиннухь, Заурдухь, душваврахь Умахь, Дианахь, махъсса цинявппагу гъан-маччанахь. Ванал барачат махъ ливчIун лякъиннав. РухI бигьаний дишиннав.
ЦIуйшиял жямат, дустал, гьалмахтал
———————————
СУЛАЙЛ ДУШ МИРЗАЕВА МАРИЯН
Мадара хIаллай къашавайгу бивкIун, оьрмулул 95 шинаву ахиратравун лавгунни ххаллилсса хъамитайпа, нину, уздансса дакIнил заллу, ЦIущарниятусса Сулайл душ Мирзаева Мариян.
Мариян бувну бур 1920 шинал ЦIущуллал шяраву хъинну хIурмат лавайсса ХIасанов Сулайхъал кулпатраву.
ЗахIматсса дяъвилул шиннардий му захIмат буллай бия колхозраву, муницIунма зий бия комсомол организациялул секретарьнугу. Мунин ккавккун бур дяъвилул шиннардийсса захIматгу, ххувшаврил ххаришивугу. Бувсса захIматрахлу му лайкь хьуну бур чIярусса медаллан ва бахшиширттан.
Мариян бия дакI-аьмал хъинсса, инсаншиврул бувччусса, гьарца ишираву бавкьусса хасиятрал инсан. Бусраврай ва хIурматрай чIярусса шиннардий зий бивкIссар Гьамиящиял ветучастокрал санитаркану.
Марияннул бивкIулул пашманшивугу кIидачIлай, жижара буллай буру арснахь, душваврахь, оьрчIал, душваврал оьрчIахь, циняв гъан-маччаминнахь. Цинявннахьхьун цIуллушиву дулуннав, оьрмулий барачат бишиннав, ванияр чIивину дунияллия гьансса щинчIав къабукканнав, цил гьав нурданул дуцIиннав, алжаннул ххари баннав.
ЦIущуллал ва Ваччиял жямат
————————————
ТачIав лакъакьайсса дуссар щавурду
ТIабиаьтрал аьнтсса ирглий гьантлул хъирив гьантта букIлай ларгунни 10 шин Ккурккуллал жяматрал ялун хъуннасса кьурчIишиву дирну. Лавгунни чIун къадуркIна ахиратравун ххаллилсса Магьихъал тухундалул арс Эдуард Магьдиев.
Эдуард дакIния къауккай цалва нитти-буттан, гъан-маччанан, щарнил агьулданун акъасса, Дагъусттаннал улклуй, хIатта архсса Москав шагьрулийгума га цува кIулнан. Учайхха шиннардил щаву хъин дай куну. Къаданссар чIумул хъин язисса, яргсса инсаннал хъирив хьусса щаву. Эдуард кIулнал ганайн укунма Эдик учайва. Ия га цинявннан ххирасса, хъуниминнан уссу кунасса, хъунив хьуминнан арс кунасса. Ххира хьунссагу ия. Эдиклул дия аякьа, кумаг, чIарав ацIаву гьарнал чулухуннай. Ва чIун дакъа ахиратравун лагаву гьарнал дакIнийн щунни.
ХIакьину кунна хьхьичI дарцIуну дур Ккурккуллал жямат Эдиклуя личIи хъанахъисса кьурчIисса кьини. ВицIхъату тIайла хьуну, хIатталлив бияннин леххаврил аьрххилий бувкIсса машинарттал нех. ХIатталлия Магьихъал чаннаннил къапулучIан биянцIа мухлукьат инсантурал. Ваксса хъунмасса Ккурккуллал ккурчIа, чарил чIучIа багьансса кIану бакъа, инсантурал бувцIуну бия. Ккучундалий арантал Эдиклул буттал хьхьичIун жижара кьамул ба тIий къуч хъанай бия. Хъами цалва жижара ганал ниттихь зума тIий ашкара буллай бия. ХIайп, ттуршилвагу хIайп, Эдиклул бяливчIсса оьрму, хIайп ганал баргъ кунна чаннасса симандалий ссавнил куртIшиврух някI ранг мяш учин бучIисса яру абад лавкьусса, хIайп тIааьнсса пишлищал щилчIав хьхьичI ацIан къашайсса. ХIайп, утти къашайсса хъуниминнаха хIурмат бан, мюрщиминнаха аякьа дан, мюхтажнан кумаг бан, къия дирнал дакI хъин дан, язухъ бувкманал чIарав ацIан. Дугърисса къеллу чIярусса диркIссар ЭдиклучIа. Шяравун увкIукунгу га икIайва цуманан ци хъинбала бан хъинавав тIий. Уккайва ккурчIах, бакIулух, зийлух. Шяраву щар дуцин аьркинначIа, къатта ласун ччиначIа, арцул кIюла увкначIа ацIайва. Цал зийлух уклай уна ганан хIисав хьуну бия мюрщисса оьрчIру тIуркIу тIий, тинай уттуссаннуй цувалу ца оьрчI пашманну щяивкIун. «Ина цийссара цинявннащал тIуркIу къатIий?» — цIувххукун, оьрчIал увкуну бур: «Ттул игрушккартту дакъар, велосипед дакъар». Шагьрулийн кIураавну ца нюжмар хьуннин, Эдиклул ганан велосипед гьан дурна. Шяравусса ца жагьилнал, хъяврин хьуну, ххирасса багьлий бухсса машина лавсукун, Эдиклул кумаг бувссар машина зана бивтун, арцу махъуннай зана дан.
Шагьрулийгу 1990-ку шиннардий цалва квартирардава дуккан дуллай диркIсса оьрус къарихъал чIарав авцIуссар.
Ккурккуллал лайкьсса арс! ХIакьинугу бур вих ялугьлай: ххирасса нину-ппу, гъан-маччами, ссихьри кунмасса душру. Ина кIулсса, ххирасса гьарица инсан, вил яруннил нур дияйсса гьарица зат аьтIий дур вил хъирив. КкурчIав ина, оьрчIругу лагма лавгун, щяикIай кIану ятинну бур, буттал къатрал чаннаннил къапу хIакьинусса кьинигу магъмунну бур ина тIайла уккан багьну тIий махъва-махъсса ххуллийх.
Ххирасса ккурккуллал арс! Ттуршвагу хIайп, вил дакIниву кьакьаву ччаврил щаращи.
Жуща къабюхъанссар тачIавгу ина хъамаитан, ливчIунна ина жул дакIурдиву жагьилна. Ина кIулну ивкIма хIакьинугу ур вил хъирив угь тIий. Шяраваллил шаэртал бур вияту шеърилул ххару базлай.
Ттигу гьанссар шинну, ацIра, кьура, ххюцIалла. ЛичIанссар вил иминсса цIа, инара дунияллий уна дурсса ххаллилсса давурттайну яхьусса.
Ккурккуллал жяматрал цIания Ханича Аьлиева
————————————————————————
ЗАХАРДУЛ АРС ШАКУЕВ МАХIАММАД
ЦIусса шин дайдирхьусса гьантрай аьпалул хьунни Шахьуйннал шяраву Буттал КIанттул цIанийсса Хъунмасса дяъвилул увагу ливчIсса ца ветеран, отставкалийсса полковник, Захардул арс Шакуев МахIаммад.
МахIаммад увссар 1924 шинал Шахьуйннал шяраву Захардул ва Ханичал кулпатраву. Буттал шяраву лавгун ур школалийн, махъ дуклай ивкIун ур чIаххуврайсса КIундиннал мяйра шинал школалийгу. Цаппара хIаллавун ванал ппу Лувмур Къазанишлив зун най, МахIаммадгу цащала увцуну ур, гихуннайсса дуккавугу ванал му шяраву дурну дур. Къумукьнан цанманияр ххуйну лавхьхьуну бур къумукь мазгу. Шиннардивун буттащал архIал зана хьуну ур цалла шяравун. Махъ дуклан увххун ур Финансирттал ва экономикалул техникумравун. Цалчинмур курс бувккусса чIумал байбивхьуну бур Хъун дяъви. МахIаммадлул цалва дустуращал цимилгу лавхъун бур военкоматрал бухкIулу, аьрайн буцира тIий, амма чIун къадирну къабуцлай бивкIун бур. Цува кунмасса комсомолтуращал архIал МахIаммад цимилгу хьуну ур захIматралмур фронтрай, окопру, траншеяртту, пулеметирттансса «кюртти», танкардайн къаршисса хъунтIуллив дуклай, дяъвилул къинттуллух цукссагу захIмат бивхьуну бур ванал. Ахиргу увцуну ур МахIаммад фронтрайн. Ереваннай аьрали училище къуртал бувну, хьуну бур МахIаммад хIаласса жагьилтурая хIаписартал. Дяъвилий ивкIун ур полкиравусса минометирттал батареялувусса взводрал командирну, батареялул, стрелковый роталул командирну. Дяъви къуртал хьуну махъгу цимирагу шинай лахъи лавгун бур ванал аьрали къуллугъ – аьмну 32 шинайсса. 1945-ку шинал июньдалия тинай дуклай ивкIун ур Харьковрай ва Хабаровскалий аьрали идарарттаву, аьралуннаву ивкIун ур Одессалий, Симферополлай, Днепропетровскалий, Чукоткалий ва чIявусса цаймигу кIанттурдай. МахIаммад Шакуев лайкь хьуну ур 4 ордендалун: «За боевые заслуги», «Отечественной войны» цалчинмур даражалул ва кIира «ЯтIул ЦIукул» ордендалун; «За оборону Кавказа», «За победу над Германией», «За боевые заслуги», «Ветеран Вооруженных сил СССР» ва чIярусса цаймигу медаллан, личIи-личIисса наградарттан.
Дагъусттаннайн зана хьуну ур 1964 шинал. Зий ивкIун ур Дарбантлив аьрали комиссарнал хъиривчуну, цимирагу шинал лахъишиврий Ахттиял райондалул военкоматрай аьрали комиссарну. Ларсун дур полковникнал цIа. МахIачкъалалив личIи-личIисса кIанттурдай зий ивкIун ур военрукну. Пенсиялийн увккун махъ МахIаммад Захарович ивкIссар МахIачкъалаллал Кировский райондалул Ветерантурал советрал председательнал хъиривчуну.
Шакуев МахIаммадлул цIа дурхссар 2005 шинал бувксса «Аьрасатнал язими инсантурал энциклопедиялувун».
Лавгунни Шахьуйннал шяравасса Хъун дяъвилул махъа-махъсса ветеран, оьрму бусравну бувтсса Шакуевхъал уссурвавравасса (ХIасанхIусайн, Сулайман) махъа-махъма МахIаммад. Ванал бивкIулул жижара буллай буру кулпатрахь Жамиятлухь, арснахь Сергейхь, душнихь Зайнаблухь, вайннал оьрчIахь, ванал уссил душварахь, махъсса цинявппагу гъан-маччанахь. МахIаммадлул барачат махъ ливчIун лякъиннав, ванан алжан нясив баннав. Махъминнал оьрмурдив лахъи баннав.
Шахьуйннал жямат
————————————
КЬУРБАНМАХIАММАДЛУЛ АРС ДАУДОВ МАХIАММАД-ХIАЖИ
Январьданул 11-нний, оьрмулул 93 шинаву, дунияллия лавгунни дяъвилул ва захIматрал ветеран, цалва щалва оьрму оьрчIан кIулшиву дуллай лавгсса, ГьунчIукьатIатусса Даудов МахIаммад-ХIажи КьурбанмахIаммадлул арс.
Увну ур МахIаммад-хIажи 1922 шинал ГьунчIукьатIув, 7 классгу бувккуну, увххун ур Гъумуксса педучилищалувун. 1942 шинал январьданий 2-мур курсирава дяъвилийн лавгун ур. Талай ивкIун ур Белоруссиянал фронтрай снайпертурал отделениялул командирну. Ххувшаву хьунадаркьуну дур Кенигсберграй. Лайкь хьуну ур «Отечественной войны» ордендалун, «За Победу над Германией 1941-1945 г.г.» юбилейный медаллангу. Шавай зана хьуну ур 1948 шинал ахирданий. Зий ивкIун ур Гъумук уголовный розыскрай, кIиккува къуртал бувну бур педучилищагу. Гания махъ учительну зий ивкIун ур. 1969 шинал заочнайну къуртал бувну бур ДГУ-лул тарихрал факультет. КIамахъаллал даэлий ванал хIарачатрайну бувну бур дянивмур даражалул школа-интернат, ризкьичитурал оьрчIру дуклансса. Ванал тарбия дуллусса оьрчIру, личIи-личIисса касмучитал хьуну, ххуй-ххуйсса давурттай зий бур.
Школалия лавгун махъ Даудов МахIаммад-ХIажи цаппара шиннардий зий уссия ГьунчIукьатIрал ва КIямашрал цачIусса «ЯтIул ттугъ» колхозрал председательну. Ва даврийгу ванал хъунмасса захIмат бивхьуна колхозрал ахIвал лавай буван. Ванал щалва оьрму шяраву лавгунни. Ванал хIурмат-иззатгу, ччарчан даэлийминначIа, ччарчагу шяравуминначIа лавайсса бия.
МахIаммад-ХIажинан аьрщигу буттал шяраву нясив дурунни.
МахIаммад-ХIажинал бивкIулул кьурчIишиву кIидачIлай, жижара буллай буру ванал кулпатрахь, арснахь, душваврахь, цинявппагу гъан-маччаминнахь.
Я, Аллагь, цинявппагу ваксса хьуннин битаннав.
Цал рухI хъинний дишиннав, алжаннул ххари аннав.
ГьунчIукьатIрал
ва КIямашрал жямат
————————————-
МАЖИДЛУЛ АРС МАЖИДОВ МУХТАР
Декабрьданул 16-нний 2015 шинал, кIул акъасса душманнал бивтун увтун, Москавуллал шагьрулий, оьрмулул дязаннаву, 35 шинаву, жуятува лавгунни Цалчинмур ЦIувкIратусса Мажидов Мухтар Мажидлул арс.
Мухтар увну ур ЦIуссалакрал райондалул ЦIуссаккуллал шяраву 1980-ку шинал апрельданул 14-нний Мажидов Мажидлул ва Зинаидал кулпатраву. 1997-ку шинал къуртал бувну ЦIуссаккуллал дянивмур даражалул школагу, увххун ур ДГПУ-рал физфакрал военно-прикладной отделениялийн. 2002-ку шинал хъинну ххуйну къуртал бувну мугу, зун айивхьуну ур частный компаниялий. 2005-ку шиная шинай бизнесрахун агьну ивкIун ур. Мухтар щарнил жяматран хъинну хьхьичIунсса, ххирасса, бусравсса, гьарцаннангу дакIний личIансса тIуллу дайсса ия. Му ия хъунанай ламус ххисса, чIивинай хатир байсса, къашайнай цIими бусса, ккашил хIал кIулсса, мискиннал чIарав ацIайсса, ятинтуран кумаг байсса, захIматсса иширттаву халкьуннал дяниву маслихIат байсса инсан. Ххирая мунан хъамал, чIявуя мунал дустал.
Мунал махъ ливчIунни мюрщисса 3 оьрчI, жагьилсса кулпат. Миннал чIарав бацIан жу мудангу хIадурну буссару. Мунал барачатшиву оьрчIавун ларгун лякъиннав.
Жу кьурчIишиву кIидачIлай буру мунал нитти-буттащал, оьрчIащал, кулпатращал, гъан-маччанащал, мунан къабуллумур оьрму махъминнан булуннав тIий. Мунал гьав нурданул дуцIиннав, алжаннул къапу тIивтIунма личIаннав.
ЦIуссаккуллал
ва ЦIуссалакрал райондалул жямат
—————————————
РАМАЗАННУЛ АРС МАХIАММАДОВ ХIАЖИ
Ххаллилсса, хIал бавкьусса лакку инсан Рамазаннул арс МахIаммадов ХIажи, цIуцIи шаний хъунма хIалгу къабувну, оьрмулул 79 шинаву, дунияллияту лавгунни.
ХIажи увну ур 1936 шинал СумбатIуллал шяраву, муххал ххуллул зузалал кулпатраву. 1955 шинал мунал къуртал бувну бур школа Минеральные Воды шагьрулий. Дуклакинийва мунан спорт ххирасса бивкIун бур, лечаврил чемпионну ивкIун ур. 1960 шинал къуртал бувну Ставрополлал педагогикалул институтрал физвоспитаниялул факультетгу, увкIун ур Дагъусттаннайн. Зий ивкIун ур Дагъусттаннал Мединститутрал физвоспитаниялул кафедралий ассистентну.
1961-1963 шиннардий зий ивкIун ур Жагьилтурал спортшколалул директорну, цивугу хIадур бувсса дунияллийх цIа дурксса спортсментал: Аьли Аьлиев, Станислав ХIажиев, Султан ва Сулайман Апанниевхъул ва цаймигу. Мунияр мукьах зий ивкIун ур Министртурал советрал спортрал консультантну. 1965 шиная тIайла хьуну, 40 шинал мутталий зий ивкIун ур «Урожай» ДСО-рал председательнал заместительну, Дагъусттаннал шяраваллил хозяйствалул академиялул физвоспитаниялул кафедралул хъунаманал хъиривчуну, 1986 шиная шинай – му кафедралул каялувчину. ХIажи ия СССР-данул спортрал мастер. Мунан дуллуну дур «Заслуженный работник физической культуры Дагестана» тIисса цIа.
ХIажи дунияллия лагаврил кьурчIишиву кIидачIлай, жижара буллай буру ванал кулпатрахь, арсурваврахь, уссурваврахь, ссихь ва махъсса гъанчунахь. ХIажинал гьав нурданул дуцIиннав, рухI хъинний дишиннав!
СумбатIуллал жямат
———————————————
Вай гьантрай ца ттигу ххаллилсса ва уздансса чувнацIа хьунни ГьунчIукьатIрал жямат. Цала щарнил жяматран куна,
Даудов МахIаммад-хIажи
хIурматрай ва бусравну икIайссия аривсса КIамахъаллал ва Ппалассуннал жямат яхъанахъисса Сангардал шяравугу. Цанчирча ва шяравусса школалул тарих хъинну цIакьну бавхIуну буну тIий МахIаммад-ХIажинал цIаницIун ва ванал педагогнал пишакаршивруцIун. МахIаммад-ХIажи Сангардал жяматрал ва цува директоршиву дуллай ивкIсса школалул дуклаки оьрчIал ва душварал дакIурдиву личIантIиссар яла язими ва чаннами асардаву. Ва директоршиву дуллай ивкIсса 70-80-ку шиннардий школа къуртал бувсса оьрчIру, цалла кIулшивурттайну бувххун, дуклай бивкIссар республикалул вивсса ва кьатIувсса вузирдаву.
Хъуннасса кьурчIишиву кIидачIлай, жижара буллай буру щалвагу ГьунчIукьатIрал жяматрахь, МахIаммад-ХIажинал кулпатрахь ва уссурссуннахь. Цал рухI алжаннуву дишиннав, махъминнахьхьун цIуллушиву дулуннав! Амин!
Сангардал жяматрал цIания Залму АьбдурахIманова
———————————————
ДакIнийхтуну хъуннасса кьурчIишиву кIидачIлай, жижара буллай буру Ризваннул арс МахIаммадов Русланнухь, ххирасса ссурахъу Мажидов Мухтар Мажидлул арс оьрмулуцIа аврийн бувну. Мухтардул рухI алжаннаву хьуннав, гьаттай нур дизаннав.
ЦIуссалакрал райондалул УО-лул коллектив, ЦIуссаккуллал № 1 ва № 2 школардал коллектив.
———————————————
ДухIан, лялиян дуван захIматсса дард ялун дирсса, аьзизсса арснацIа Мажидов МухтардуцIа хьусса ХIажинал душ Мажидова Зинаидахь жижара буллай буру. Аллагьнал вихьхьун ссавур дулуннав.
Арсгу алжаннул ххари уваннав. Мунан къабуллумур оьрму махъминнан булуннав.
ЦIуссаккуллал шяраваллил администрациялул
ва культуралул зузалт
