Декабрьданул 23-нний Аьрасатнал Президент Владимир Путиннул каялувшиврулу хьусса АьФ-лул ПаччахIлугърал Совет­рал батIаврий ххал бивгьунни билаятрай аьмсса дуккаврил сис­тема ххуй даврил масъалартту.
Госсоветрай гьуртту хьунни ДР-лул БакIчи Рамазан Аьб­дулла­тIипов.

Мажлис тIитIлай, В. Путиннул бувсунни паччахIлугъ мюнпатну хьхьичIуннай дачиншиврул дуккаврил бутIувусса проблемартту щаллу баврил агьамшиврия.
«ЖучIава уттигу чIявусса бур щаллу къабувсса проблемартту, му темалучIан жува зана хъанан аьркинссар, му муданна хьхьичIмур пландалий дикIан аьркинссар», — увкунни Путиннул.
Билаятрал каялувчинал увку­сса куццуй, жущава бювхъунни ххуй дан оьрчIал дуккаврил шартIру, шагьрурдай дакъасса, шяраваллавугу. ЦIанасса ппур­ттуву сайки циняв школардай зий дур интернет, школардай дур ттизаманнул кьай-кьуй, спортзаллу. Учительнал пиша цIунилгу бусравсса даражалийн букIлай бур. Хъуни хьунни учительтурал харжру. Педагогикалул вузирдаву хъуни хьунни конкурсру. «Майрал» указирттаву масъала бивхьуну бур учительтурал дянивсса харжру биян бан дянивну лавсъсса экономикалувусса харжирдал даражалийн.
ПаччахIлугърал бакIчинал бувсунни мукунма ганал тапшур бувну бушиву школардай 3-мур смена духлаган дуван.
Масъала ххал бигьаврия цал­вамур пикри буслай, Рамазан АьбдуллатIиповлул увкунни: «ХIакьину бувсун бивкIсса пикрирдавасса ца хъанай бур кулпатравугу, школалийгу, ялапар хъанахъисса кIанайгу щаллу даву цIусса, ххуйсса дуккаврил тIабиаьт (среда). Мукунсса тIабиаьтрал оьрчIру кIункIу буллан аьркин­ссар кIулшивурттайн, пишарду лахьхьаврийн, лайкьсса инсан, гражданин шаврийн. Мукунсса тIабиаьт сакин дурну диркIссар Совет Союзрал чIумал. Техника ва технологияртту та чIумал чансса дикIайва, амма бия учитель ва ученик, миннал бияла лап хъунмасса бия, мунияту дуклайгу бия, лайкьсса даражалий дарсру дихьлайгу бия.
ХIадур бувссар
ХI. Аьдиловлул