ХIурмат бусса лак! Барча зул ЦIусса шин!
Ларгсса шинащал гьаннав зул циняв буруккинтту, дард-ха­жалатру. ЦIусса шин духханнав зул ужагъирттавун чаннащал, тIайлабацIулущал, ххаришивурттащал, барачатращал. Бартлаганнав цинявппагу зул мурадру ва хияллу. Дунияллий паракьатшиву хьуннав.
Аьдатравун багьсса куццуй, гьашинугу оьрмулуву хьу­сса дакIний личIансса иширттая ва асардая цIухху-бусу буллай буру махъ нанисса, сий ду­сса лакрахь.
Андриана Аьбдуллаева

МахIаммадхIажи Айдиев,
ЦIуссалакрал муниципал сакиншиндарал бакIчи:

2015 шин ЦIуссалакрал райондалун оьккисса дакъая. Дан дакIний диркIсса мадарасса давуртту дузрайн дурккунни.
ЦIусса миналий цIу-цIусса объектру буллай оьрму ялу-ялун нирхиравун багьлай бур. Ши­кку цинярда шяраваллаву школарду бувну, Гьамиящиял шяраву бан ливчIун буссия. Ларгсса шинал шиккугу барду ттизаманнул тIалавшиннардайсса 315 оьрчIансса школа. Му школа тIитIлатIисса кьини Чапаевкаллал шяраву тIитIарду, 140 оьрчIансса кIану бусса, цIуминалий цалчинсса оьрчIал багъ «Солнышко». Му бакъассагу, «Буратино» тIисса оьрчIал багъ тIи­тIарду ЦIуссалакрал шяраву, ЦIуссамехельтIиял шяраву тIитIарду мадраса.
Ххаллилсса давурттацIун, мюнпатсса аьрххи-ххуллурдугу хьунни шинал лажиндарай Хъунмасса Буттал кIанттул цIанийсса дяъвилий Ххувшаву ларсун 70 шин хъанахъисса юбилейрацIун бавхIуну. ЦIуссалакрал райондалиясса 22 дуклаки оьрчI лавгссар бусалардавун багьсса Виричу-шагьру Волгоградрайн. Ми бивссар Совет Союзрал Виричу Ханпаша Нурадилов ув­ччусса Букановская станицалийн. Райондалул делегация гьуртту хьуссар Къизилюртуллал райондалийсса Султанянгиюртуллал школалий Совет Союзрал Виричу ХIажи Бугъановлул гьайкал тIитIлатIисса шадлугърал мажлисрай.
Хъуннасса агьамшиву ду­сса ва дакIний личIансса хьунни Къиримнавунсса аьрххи. Райондалул делегация гьуртту хьунни Къиримнал республикалул Сакскаллал райондалун 80 шин бартлаглагисса шадлугърай. Ва аьрххилул лагрулуву жул делегация Сакскаллал райондалул жяматращал бивунни Геройское тIисса шяравун, 9 Совет Союзрал Виричунан дацIан дурсса мемориалданул комплексрачIан. Мура кьини шикку хьуссар АхIмадхан Султаннул цIанийсса Дунияллул даражалул боксрал турнирданул финал.
Лавгру жу Алупка шагьрулийсса АхIмад-Хан Султаннул цIанийсса музейравунгу.
Мунияр махъ Сакскаллал райондалиясса делегация бувкI­ссар ЦIуссалакрал райондалийнгу.
Октябрь зуруй ЦIумина­лийсса ЦIуссаккуллал школалий тIайла дуккарду ва школалун АхIмад-Хан Султаннул цIа дизлазисса байран.
ЦIуссалакрал район мудангу чялишну гьуртту шайссар рес­публикалий дуллалисса цинярда мероприятиярттаву. Гьурттушинна дарду жу Дарбант шагьрулул 2000 шинал юбилейрай, Къизлар шагьрулун 280 шин хъанахъисса байрандалий.
Ноябрь зуруй райондалул Культуралул центрданий лахъа-хъунну тIайла дуккарду Да­гъусттаннал лайкь хьусса культуралул зузала Ярагъи Аьлиевлун 75 шин хъанахъисса юбилей.
Ххарисса иш хьунни Новостройрай туркнал компаниялул проект зун дайдишаву.
2015 шин ттун ттуннагу даркьусса дия. Дагъусттан миллатирттал культура ядавриву ва хьхьичIуннай давриву бивхьусса захIматран кьимат бишлай, Ккавкказнавусса Мировой Артийский комитетрал вице-президент Ауеса Бетугановлул чулуха ттуйн бувкIунни барчаллагърал чагъар. Ноябрь зуруй хьусса Райондалул Мажлисрал депутатътурал сессиялий, циняв депутатътурал чIурду буллуну, на цIунилгу увчIунна райондалул бакIчинал къуллугърайн. Му цал ттигу ттуйнна дурсса хъуннасса вихшалдарах барчаллагь тIий ура райондалул жяматрахь.
ЦIусса шинащал барча буллай, чIа тIий ура ЦIуссалакрал жяматран цIуллушиву. Бизан баврицIун бавхIуну зунгу, райондалул каялувчи хIисаврай ттунгу чIярусса захIматшивуртту хьунадаркьунни. Ми хъамадитан дан­сса ххаришивуртту дияннав жула ялун. Барачат хьуннав жунна цIусса мина.

Сяид Сулайманов,
Ккуллал райондалул муниципал сакиншиндарал бакIчи

Таксса инсаннан кунма, на кунасса къуллугъчинан шинал мутталий дуван ккаккан дурсса ва ттунна биттур дуван ччай диркIсса давурттив чансса дакъая. Зунттавусса тIабиаьтрал хасият аьнтсса душаврийн бувну, кьатIухсса давурттив цумур чIумал цуми дулланссарив кIюрх дучIайхту дакъа кIул дуван къахъанахъисса ишругу хъанан бикIай. Гьай-гьай, яла агьаммур, дакIний личIанмур хьунни гьашину щалагу Аьрасатнаву кIицI ларгсса Ххувшаву ларсун 70 шин бартлаглагисса байран. Ва кьининин Ваччавсса майданнив дацIан дуварду кIийла СССР-данул Виричунал цIанин лайкь хьусса АхIмад-Хан Султаннул гьайкал. Мукунна ЧIяйннал шяравун буххайсса шанбачIулий дацIан дуварду СССР-данул Виричу ЦIаххуй Маккаевлун хас дурсса стела-гьайкал. Ваччавсса Аьрасатнал Халкьуннал аслий­сса культуралул къатрал хIаятраву буварду Ккуллал райондалия бувк­сса вирттаврал суратру мармарчарий абад дурсса «Вирттаврал Аллея». Ларгсса шинал октябрь зуруй АхIмад-Хан Султан ниттил увну 95 шин там хьунни. Ва кьинилун хас дурсса байранну хьу­ссар 1-мур ЦIувкIуллал шяраву ва МахIачкъалалив. Школалий дук­лакисса оьрчIал чирчуссар дяъвилул шиннардий жанну харж дур­сса цалва гъан-маччанаясса сочиненияртту, шеърирду. Хьу­ссар цаймигу Ххувшаврил кьинилун хас дурсса конкурсру. Райондалул циняв (14-рагу) шяраваллавух бувкссар «Книга памяти».
Ххарисса иш хьунни Ваччиял шяраву уттизаманалул циняв шартIру хIасул дурсса цIусса школа тIитIаву 1-мур сентябрьданий. Вара кьини Хъювхъиял шяраву тIивтIуссар, шяраваллил чиваркIуннал кумаграйну бакьин бувсса, оьрчIал багъ. Райондалул майданнийх ва ваничIан нанисса ххуллурдайх бювхъунни асфальт бакьин. Ваччату Вихьлив нани­сса ххуллу бакьин бувссар ва ламурдал парапетирттал тумбарду бакьин бувссар.
Ккуллал райондалий яхъанахъисса инсантал ятту-гъаттара ябуллай, гайннуйну мяишат буллалисса инсантал бур. Гьашинусса шин баян бувну бия Литературалул ва Багъирдал шинну. МуницIун бавхIуну, шинал лахъишиврий райондалий най диркIссар чичултращалсса, шаэртуращалсса хьунабакьавуртту ва бувгьуссар багъру. Шинал лагрулий биттур дуван бювхъусса циняр давурттив кIицI къадуварчагу, шин оьккисса къархьунни.
Миллатрал кказитрайхчIин барча буллай ура Ккуллал райондалул жямат ва щалва лакрал миллат ЦIусса шинащал, чIа тIий ура цала дакIнил кьамул буллалимур бартбигьинсса цIуллушиву цинявннаннагу.

Юсуп МахIаммадов,
Лакрал райондалул муниципал сакиншиндарал бакIчи:

Жуятура нанисса шин тту­ннагу, нара каялувшиву дуллалисса райондалунгу тIай­лабацIу бусса дия учин бю­хъанссар.
Шинал ахирданий, циняв­ппа депутатътурал чIурду буллуну, на шамилчингу увчIунна Лакрал райондалул бакIчину. ХIарачат банна райондалул агьалинал ттуйнна дурсса вихшала лайкь дан.
Райондалул тарихраву ли­чIансса, ххарисса иш мугу хьунни, 2014 шиналсса социал-экономикалул ккаккиярттал хIа­силлайн бувну, Республикалул БакIчинал Грант ласунсса конкурсраву зунттал районнал дянив Лакрал райондалул 1-сса кIану бувгьунни.
Февраль зуруй Оьруснал театрдануву бюхттулсса даражалий кIицI лагарду Лакрал райондалул магьирлугърал кьини. Ва кьинигу жун МахIачкъалалив дан пикри хьунни шагьрулий ялапар хъанахъисса, ччя-ччяни Лаккуйн бучIан къахъанахъисса лакгу цачIун батIин, миннангу райондалий хъанахъимур кка­ккан бан.
Магьирлугърал кьинилул маж­лисрай республикалул лавайсса дуккаврил идарарттаву хьхьичIунну дуклакисса жулла райондалиясса студентътуран дуларду бахшишру. Кка­ккан дуварду ххуйсса концертгу. Нава рязи­сса ххуйсса даву хьунни райондалий махъсса шиннардий хъамадитала хьу­сса, хьхьичIра хъинну сийлий диркIсса Ризкьичинал кьини, цIу дуккан дунну, лахъа-хъунну кIицI даву. Му байрандалуцIун бавхIуну, чIярусса шиннардий шяраваллил хозяйствалуву зий захIмат бувсса зузалтран бахшишру дарду.
Ларгсса шин республикалий Багъирдал шинну баян бувну бу­ссия. МуницIун бавхIуну 17,5 га аьрщарай бугьарду личIи-личIисса мурхьру. Ларгсса шинал райондалий дуварду 5 оьл­лал ферма.
Цаймигу дан дакIний бивкIсса давуртту цаппарасса дурну къуртал дан бювхъунни, цаппарасса – дуллай дайдишин. Шяраваллил диц-куц ххуй даву мурадрай, бакьин барду Гъумучиял бяр. Ттуп­лий буккансса чIивисса майдан буварду Гъумучиял паркраву. Хъунмасса цила бикIайкунсса ттуплий буккайсса майдан буссар цIуну дуллалисса школалул къат­рал чIарав. Гъумучиял школа бусса кIанттурдай 60 оьрчIансса кIану бу­сса детсад бансса давурттив дайдирхьуну дуссар.
Най дуссар Буршиял, Ххюлуссуннал шяраваллал чулухунмайсса ххуллурду буллалисса давуртту. Ми давуртту ччяни къуртал дан хIарачат банну. Дурмургу чансса дакъар, дулланмургу чIярур.
Ми бакIуйн дуккан дан жувагу хIарачат банну, Аллагьналгу кабакьинссар, ЦIусса шингу жуцIунна даркьусса хьунссар тIисса умудрай ура.
Ялун нанисса ЦIусса шин барча тIий ура цинявппагу лак­рахь, хаснува шяраваллаву мина дирхьуну, шяраваллу ядуллалиминнахь, жулва мазгу, культурагу дуруччавриха зузисса «Илчи» кказитрал редакциялухь, Лакрал театрданул зузалт­рахь. ЧIа тIий ура цинявннан цIуллушиву. ЦIусса шинал гьарица инсаннал ужагъраву ххаришивуртту чIяру даннав, дунияллий паракьатшиву хьуннав!

Миясат Муслимова, шаэр, публицист:

Дунияллий дяъви ва дакьаву даврил ихтиярду цала кIунттихьхьун ларсъсса цаппара инсантуран чаран лякъин къавхьунни дунияллул халкьуннаща тIисса пашмансса асардацIун дархIусса дия жуятура нанисса шин. БувчIлай бакъар дунияллул политикалул масъаларттаву циваннив Европа США-нал биялдаралусса, миннал тIутIимунива къабуклакисса.
Дуниял ливну нанисса къатлуйн дурккун дур. Мунил хъуннасса ццахханну рутлай дур. ХIакьину дунияллийсса тагьар оьлукъин дуллалисса ИГИЛ-данул мурад бур къирмишанну ва чапхунну. Миннал ттигу инсантурал бакIурдичIан циксса баларду буцивив къакIулли. Жагьилтураву чансса бакъар оь экьибутIаву диндалуцIун бахIлахIисса.
Хъунмасса вас-ццах, буруккин бутлай бур инсан оьрмулуцIа аву миннан ттугъ бищаврил ххуллий­сса давуну ккаклакаву.
ЦIусса шинал чIа тIий бура жулва лакран талихI-тирхханну, ххаришивуртту, хъиншивуртту. Лакку билаятрай барачат ликканнав, лакрал миллатрал иш бачиннав.

Лариса ХIажиева,
Дагъусттаннал халкьуннал артистка:

Жуятура нанисса шин ттун оьрмулувугу, творчествалувугу ххарисса, тIааьнсса ишир­ттайну дакIний лирчIунни.
Ва шинал на ттула дакIнил лавсъсса инсаннащал ташу бав.
Ттулла творчествалуцIун бавхIусса иширттал чулухагу авадансса шин дия.
Гьуртту хьура Дагъусттаннайгу, республикалул кьатIувгу хьусса хъуннасса агьамшиву ду­сса культуралул мероприятияр­ттай. Хъинну лавайсса даражалий, чIявусса бусравсса хъамалгу бувкIун, дазул кьатIатуссаннайн бияннин, кIицI ларгунни Да­гъусттаннай тарихравун багьсса Дарбант шагьрулул 2000 шинал юбилей. Дарбантливсса байрандалийгу, ва юбилейран хасну Москавлив Кремлилул Дворецраву хьусса шадлугърал мажлисрайгу гьуртту хьура. Мукунма на гьуртту хьура Халкьуннал шаэр Сибирбаг Кьасумовлул творчествалул вечерданий. Вечерданийн бавтIминнан ххуйсса бахшишну хьунни жуна цинявннан ххира­сса Муслим Даххаевлун хас був­сса ттул балай.
Ноябрь зурул 7-8-нний Нижний Новгородрай, А.С. Пушкиннул цIанийсса ПаччахIлугърал опералул ва балетрал театрдануву, бюхттулсса даражалий ларгунни Ширвани Чаллаевлул чивчусса «Казаки» опералул дунияллул премьера. Спектакль къуртал шайхту, цукссагу хIаллай бивзун бавцIуну, кьакъабагьавай хъатру ришлай бия тамашачитал. ДакI ххари хъанай, пахрулул дуцIлай дия жула лаккучу, ттула шяравучу Ш. Чаллаевлул гьунарданун лайкьсса кьимат бишлай, ва укун лахъа-хъунну кьамул аврия.
ЦIусса шинал на чIа тIий бура гьарица инсаннан цIуллушиву, давурттаву тIайлабацIу, оьрмулуву талихI-тирхханну, ужагъирттай нахIу-хIалимшиву.

Гулизар Султанова,
искусствовед:

2015 шин ттун тIайлабацIу бусса шин дия. Цаппара дакI­нийсса пикрирду дузрайн був­ккунни. ЧIярусса шиннардий театрдануву зий, вайксса луттирду итабакьлай, Лакрал театрданун хас бувсса лу чичинна тIийнма бикIайссияв. Ларгсса шинал му даву бартдигьин бювхъунни.
Лакрал театрданул юбилейран хасну итабакьав «Лакрал театрданун 80 шин» тIисса лу.
Ххарисса иш хьунни ттунна ПаччахIлугърал премия дулаву.
Июль зурул 28-нний ДР-лул БакIчинал хIукмулийн бувну, 2013 шинал элмулул, техникалул, литературалул, публицистикалул, искусствалул ва архитектуралул аралуву хьхьичIун ливчуминнал рес­публикалул ПаччахIлугърал премиярду дуллай бия. «Многонациональный театр Дагестана. Очерки истории» луттирахлу нагу лайкь хьура му премиялун. Мугу ттул захIматран лавайсса кьимат бищаву хъанай дур. ЧIявусса бия му премия ласун цалла давуртту дирхьусса, миннува ттулмур язи дургьуну дия.
Ларгсса шинал дакIний ли­чIан­­сса ххарисса иш хьунни, ХIу­куматралгу, Министерствалулгу, жяматралгу вакилтал, махъ нанисса инсантал чIарав бавцIуну, лавайсса даражалий Лакрал театрданун 80 шин шаврил юбилей кIицI лагаву.
Оьруснал театрданунгу, Лак­рал театрданунгу 80 шин шаврин хасну буклетру итабакьин бювхъунни. Лакрал театрданул юбилейрацIун бавхIуну чIявусса театрданул зузалт лайкь хьунни личIи-личIисса бахшиширттан. Цума ухьурчагу театрданул зузалал тIайлабацIу, хьхьичIуннайшиву ттулвагу тIайлабацIулун ккалли дувара, дакI­нийхтуну ххари шара.
НукIува тамашачитуран ххира хьусса гьунар бусса Лакрал театрданул артистал Саният Рамазанован ва Луиза Шагьдилован Дагьусттаннал Халкьуннал артист тIисса бусравсса цIарду дуллунни.
Аьвдулнасир Апанниевлун дуллунни «Заслуженный работник культуры» тIисса цIа. Театрданул артист ва режиссер Аслан МахIаммадов «Аьрасатнал лайкь хьусса артист» тIисса цIа дулун ккаккан уварду.
Театрданул цайми зузалт лайкь хьунни Республикалул БакIчинал чулухасса ссятурдин, ХIурматрал грамотарттан ва Барчаллагьрал чагъардан.
Ва шингу, мазгу, культурагу дуручлачисса театрданунгу, жунма бакъа чара бакъасса «Илчи» кказит­рангу тIайлабацIусса хьуннав.
«Илчи» кказитрал, ганз хьуну, буккулт ва чичулт чIяву хьуну, иш бачиннав. Гьарицагу лаккучунал бувсний махъ бацIаннав, бивз­ний ша бакьиннав.
ХIадур бувссар
Андриана Аьбдуллаевал