Багьу-бизулул лув дагьмур (цIинцI, ччюрк) салкьи дурну, шагьрулува, шяравату дуккангу дурну, ккаккан бувсса кIанайн дичаву – му кIанттул цилакаялувшиврул органнайн багьайсса масъалар, миккусса диялдакъашивуртту ашкара дуллалаву, марцI-чапалшиврул ялув бацIаву дуллан аьркинссар паччахIлугърал экологиялул надзорданул органнан, яни ДР-лул ТIабиаьтрал луртаннал министерствалун, мукунма ДР-лул Роспотребнадзорданул управлениялун.
ХIасан Аьдилов
ЦIусса шинал байрандалул гьантрай Дагъусттаннал Роспотребнадзорданул зузалт бивкIссар шагьрулий марцI-чапалшиврул ялув бацIаву дуллай. Миннал кIул бувну бур МахIачкъалалив багьу-бизулул лув дагьмур (бытовой мусор) шагьрулува дукьлай бакъашиву. Агьалинал аьрзардал ва СМИ-рдал информациярттал анализ дурну, Роспотребнадзорданул шагьрулул администрациялия тIалав дурну дур шагьрулува цIинцI-ччюрк дукьаврин хасну дуллалисса давуртту. Дайдирхьуну дур административ хъиривлаявуртту «Эко-М» УК ООО-рал хIакъираву.
ЦIинцI-ччюрк шагьрулува дуккан къадуллалаврил хIакъираву хIадур бувну бур иск инсантурал аьрзарду гьанулун лавсун.
Шагьрулуву хьусса тагьардануву хъунмур масъалану бур цIинцI-ччюрк дукьаврин хасну балжисса сакиншинна дакъашиву. Роспотребнадзорданул управлениялул санитар надзорданул отделданул хъунмур Лариса Пантинал мукъурттийн бувну, республикалий чувчIав дакъар муниципалитетру марцI буккан баврил схемартту. Мукунна МахIачкъалалив дакъар шагьру марцI буккан баврил генеральная схема, му схема хIадур дурну дикIан аьркинссар генеральный пландалул гьанулий. Мунияту тагьаргу оьнийн дагьну дур – биялну бакъар контейнерду цIинцI-ччюрк дичаван, диялну дакъар мукунна спецавтотранспорт цIинцI-ччюрк дукьан шагьрулувату, контейнерду бишайсса площадкарду дузал бувну бакъар багьайкун, миннуву дезинфекция дуллайгу бакъар. Лув дагьмур, личIу-ххичIу дукьайсса компаниярттал кьутIирду чичлай бакъар къулкращал, кIуллащал талатаву дачин даврил хIакъираву.
Шагьрурдай марцIшиву къадуручлачаврил хIакъираву республикалул агьалинаяту тамансса чагъарду букIлай бур Роспотребнадзорданул управлениялийн, амма идаралуща бюхълай бур даву дачин дан так закондалийн чул бивщуну.
Роспотребнадзорданул муданна ххал дуллай бур шагьрурдал санитар тагьар. Ашкара дурсса диялдакъашивурттал хIакъираву шагьрурдал ва районнал администрациярттал бакIчитурайн тIайла дуклай бур диялдакъашивуртту духлаган даврил хIакъиравусса предписанияртту, ми биттур даврил чIунгу ккаккан дурну.
2014-2015 шиннардий санитар законодательство лиян даврихлу ДР-лий дирхьуну дур 7 млн. къуруширттансса 557 аьчIа, судирттайн тIайла бувккун бур 228 иск, 148 материал тIайла дурккун дур прокуратуралийн.
