Ларгмур шинал ахирданий, декабрь зуруй, «Илчилул» буккулт, хаснува МахIачкъала шагьрулул ва Новостройрал учительтал, аьрзирай бия, октябрь, ноябрь зурдардил харжру къабуллунни, кказитру чичин бюхълай бакъару тIий.
Му иширал хIакъираву жу оьвчарду ДР-лул Финансирттал министерствалийн. Министрнал хъиривчу Аьбдурашид Аджиевлул бувсмунийн бувну, ларгмур шинал ахирданийра циняв министерстварттайн ва ведомстварттайн дирчуну дур зузалтрал харжирдал арцурду, так ца-кIива ведомствалийн личIаннин (ми цуми ведомствартту буссарив балжи къабунни). Цалчин ярглий дирчуну дур ДР-лул КIулшиву дулаврил ва элмулул министерствалийн ва ЦIуллушиву дуруччаврил министерствалийн, мунияту учительтурал ва духтуртурал ласун аьркинссия харжру цIусса шин дучIаннинма.
Ганалва увкусса куццуй, харжру къаласаврил хIакъираву учительтурал ва духтуртурал баян буван аьркинссия цалва-цалва районная администрациярдайн, кIул бан аьркинссия харжру циван къабуллуну буссарив.
Аьбдурашид МахIмудовичлул мукъурттийн бувну, харжирдал ва цаймигу выплатарттал арцурду бюхъайссар Финансирттал министерствалия ведомстварттайн нани ххуллий чув-дунугу аглан хьуну дикIан, ци-бунугу багьана хьуну, мунияту му масъалалул хIакъираву бакIрайва цIуххин аьркинссар райондалул администрациялухь.
