Лакрал театрданун 80 шин хьуссар. Амма, жула бюхттулсса даражалул аьлимчу Эса Аьбдуллаевлул тIийкун, жущава жулва театрданул тарих лажин кIялану бачин бан бюхъайссия 1914-ку шинал Гъумук Гьарун Сяидовлул му чIумалва чивчусса, дагъусттаннал литературалуву драмалул гьану бивзсса «Къалайчитал» тIисса пьеса бивхьуния шихунмай.Сайки каниччул хьусса махъру: «Театр – му миллат балугъравун бияврил лишанни». Театр бусса, литература дусса, кказит бусса миллатрахсса цайминнал буругаву, ккалли-сан баву личIиссар. Мунияту жувагу чантI увкусса, чIумул тIалавшиннардащал архIал бавцIуну нанисса халкьру. Учин мукъунва – цала космонавт усса, дунияллийх машгьуршиврул цIарду ларгсса вирттал, аьлимтал, культуралул зузалт бусса миллат – цалва театрданулгу заллуну бикIан буржлувссар.

Качар ХIусайнаева
Лакрал театр ттулгу эшкьигу, ччавугур. АцIния арулла шинал лажиндарай нагу гьан дурссар ттулла, таний жагьилсса оьрмулул ххари-пашмансса шинну, Лакрал театрдануву зий: цал – литературалул бутIул хъунмурну, яла – Москавлив ГИТИС-раву шинайсса директоршиву дан лахьхьайсса курсругу бувккуну, кIира шинай директоршивугу дуллай, кказитрай зун гьаннин. Къаоьккину хьусса ххай бура ттущара му даву дуван. Пахру-ххаралун ккалли мабару, амма бюхттулсса даражалул гьунарданул заллу­сса, аьпа биву Валерий Эфендиевлущал архIал, Да­гъусттаннай цалчин Интнилхьхьу театрдануву дуллай байбивхьусса жуя. Гьарца жулла мероприятие Лакрал гимналийну къуртал дуллай байбивхьуссияв. Спектакль, чIал хъанахъиминнах къаялугьлай, ккаккан дурсса чIумуй байбихьлан бивкIссияв. Тамашачиталгу чIумуй букIлай тарбия хьуссия. Гьарца спектакльдания мукьах, сайки хьхьудярирзсса чIумал, артистал ва зузалт шагьрулул нигьачIисса кIичIирттавух театрданул автобусрай шаппа-шаппай биян буллай байбивхьуссияв. Гьарца театрданул сезон «Къалайчитурая» дайдихьлай бавчуссияв (масалдаран, хIакьинусса кьинигу гьар сезон Къумукьнал театрданул «Айгъазилия» дайдишайсса кунна). Ххуйсса ккаккияртту сававну, Обком партиялул чулуха Занази ЯтIул ттугъ лавсъссия. Коммунистурал замана къуртал хьун бувассия. Вай ишру биттур буллангу бигьа бакъассия. Мунийн бувну, ттулагу бусансса бухьувкун, ялугьи буссияв, театрданул 80 шинал байрандалий ттухьхьунмагу махъ булунссар тIий. Къабуллуния мукьах, кказитрайхчин бусанна, чан-кьансса ттунма дакIний ливчIмуния, театрдануву зий бивкIсса шиннардия.
Тай шиннардийсса Лакрал театрданулгу, тамашачитуралгу талихIран ккалли бан бучIиссар ганил каялувчину куртIну цалва пишалул элму СССР-данул яла цIанихмур вузраву лархьхьусса, европанал зумуну дурккусса, гьунар бусса, ххишала акъа ла­кку мазралгу, лакку миллатралгу патриотсса Валерий Эфендиев ивкIшиву. Цинярдагу шиннардил хъирив лаллай, букку азурда къаанна. КIицI лаганна так яла дакIний ливчIмур. Пьесарду, спектакльлу хьхьарассагу шайва, гьунттий-сара хъама битансса. Ккавкнан оьрмулий хъамакъабитанссагу шайва. Гьарца давриву кунна, мунинсса сававртту-багьанарттугу чансса бакъая. Театрданул дакIния къадуккайсса, ттуннагу дакIний лирчIсса цалчинсса байран хьуна 1973-ку шинал ноябрь зуруй Ереванная Лакрал студия, тийхсса Культуралул институтгу бувккуну, бучIаву. Агь, ца ку­ццуй бювхъусса оьрчIру-душру бия! Цаннаяр ца бакI-чурххал ххуйсса, гьунардал итххявхсса. Театрдануву ляличIисса байрандалул атмосфера бия. Сценалий вайннал дипломрал давурттал махъра-махъсса репетицияртту най дия. Щалвагу миллат байран дайдишиннин ссавур дакъа ялугьлай бусса хханссия. Вайннащал вайннал педагогталгу бувкIун бия. Спектакль бихьланнинсса ссавур дакъа, цайми театрдал зузалтгума кувннал хъирив кув букIлай бия жулва жагьилтурах ябитан. ЧIявуми мяшлил щекьи бувккун лагайва, жулва оьрчIал, душварал ххуйшиврий хIайран хьуну. ДахIалай Лакрал театрданун тIий бия. Нагу дахьва бувкIун бивкIра театрданувун. Вай гьантрай пахрулулгу, ххаралулгу увцIусса директор, театрданувух цалла ххаришиву кьюлтI дан къахъанай заназисса СалихI Алимовлул на гьан бунна театрданул «Кубань» автобусращал 100 къурушрансса тIутIив ласун базаллувун. Тани ми диялсса арцуя. БувкIру тIутIал бувцIусса автобусращал. Аьнтсса ссутнил тIутIал (дубки) кьункьал бувцIунни театр. Сценагу сайки бахьлавгунни тIутIавун. Та хьхьуну студиялул оьрчIру-душру цала дипломрал спектакльданийну театрданул сезон тIитIлай бия. Хъамакъаритайсса кьини, жагьилталгу, театрданул бугьарами артисталгу кувннащал кув кIул хъанахъисса. Цуксса ххуйсса, гьунардал чавхьа тIисса ялун бучIантIимур бурив ккаккира театрданул тIий бур театр ххирами, спектальдания мукьахгу шаппа-шаппай гьан къаччай. Амма театрданул оьрмулул ххишала бакъа захIматсса прозалущал хьунабавкьукун, чIявуми студиялул жагьилтал цамур, бигьамур, ххишала узданмур маэшатрал хъирив лавгунни. ЛивчIми – Шамил Керимов, ПатIимат Керимова, Сяид Мусалаев, МахIаммад МахIаммадов, Ларина Оьмарова — театрданул рухIгу- жангу, пахругу хьунни.

ЦАМУР КЬИНИ

Театрданул тарихраву ккавкнан тачIав хъамакъабитансса, аьсатIиннал драматург Раиса Хубецовал чивчусса «Ниттия дурксса цIа» («Материнская слава») тIисса пьесалиясса спектакль. (Режиссер В. Эфендиев). Щалва труппа гьурттусса. Караматран чаннасса, дакI марцI дуккан дуллалисса трагедия. ЛяличIи бюххансса ва исвагьи­сса музыкалул бувцIусса (Валерий Аьбдулович музыкалул чулухунайгу хъинну итххявхсса, вкус бусса ия). Шагьун ххюя-ххюя арс аьрай ливчIсса ниттил роль дургьуну. Шамил Керимов, Сяид Мусалаев, МахIаммад МахIаммадов кунмасса, бюрнирду хьусса арсру. КIирагу пьеса наниссаксса ссятрай – зал ссихI бигьин сикъаслай. Спектакль къуртал хьуну мукьах тIурча, щалва зал, цийнма цуппа бучIан къахъанахъисса кунма, пахъ багьну, авансценалийн хIурхIацIакул бувккун, яргсса чаннаву бавцIусса Шагьуннул трагедийсса симандалий хIайранну. Яла цакуну циняв, макьругу лихьлай, бивзун бавцIуну, сайки кьура-зувира минутIрай хъатру ришлай. Шагьуннухьхьун тIутIив дулун бувкмигума, канихьхьун дуллай бакъарча, цинявппагу дяъвилул дард ккурхIусса ниттихъансса гьайкалданул хьхьичI кунма, Шагьуннул ччаннацI хIурматрай дихьлай бур. Уттигу иттав макь дукIлай дур.

ЦАМУРГУ ПЬЕСА

СССР-даний хъинну машгьурну бивкIсса, цIанихсса режиссертурал хъунисса сценардай бихьлай бивкIсса Григорий Гориннул «Герострат хъамаитан» тIисса пьеса. ДинмахIаммад ДинмахIаммадовлул роллаву таксса магьирну дургьусса роль ттунна цамур дакIний да­къар. Учайхха «артист купается в роли» куну. Муна мукун. ДинмахIаммад, аьпа биву, таний жагьилгу акъая. Амма танал чурххал пластикалул тивталшиву махIаттал ансса диркIшиву ва спектакльдануву ашкара хьуна. Танал кьадарсса геройнал, аьмаллу ххисса жанаварданул кунна, дичлачисса къутри… Цавагу пьесалуву ПатIимат Давыдова (Клементина) таксса ябатIин къахьунну бакIрал чурххал исвагьину дакIний бакъар. Абадлий цалла цIа дунияллий личIаншиврул цихрасса ччаврил цIаний дував, аллагь-щарссанин хасъсса цIанихсса храм ччу­ччаврил мурдалшиву уча тIий, мардимазанначIан ханнакьравун бувкIсса чIумал, ПатIимат мяйжаннугусса паччахI хъамитайпа бия. Хъуслилгу, кашилулгу, цила нязшиврулгу, хьхьарасса паччахI — ласнал хъихъи ласаврилгу ялтту бишин бувсса. Хъамакъаитай ва пьесалуву паччахIнал роль дургьу­сса ХIажиаьли ХIажиаьлиевгу. Хьхьарасса, щарссанил кIун­ттийн увцусса, оьрмулуву ккаркцири кьадаршивурттал, оьрмулул тIин-тIааьн бухлаган бувсса. Амма миккува дуниял даххана дан къашайшиву, къархьушивугу кIулсса философ. Мяйжаннугусса философ, дунияллул дарккумунищал талай оьрму гьан бувсса, Геростратнайн къарши уккан каши дума – Креонтлул роль дургьуну уссия хъамакъаитайсса Шамил Керимов. Театрданух эшкьи хьуна­сса, му эшкьилия щакъаливхна дунияллия лавгсса. Ца даркьуну дия ганал исвагьисса чурххай грекнал хьхьичIазаманнул янна. Симандалуву нурданул чани бия, щалла инсаниятрал дард-хажалат цайнна ларсун дия. Залданувунгу ганаясса энергия мугьали хьуну най бия.

САДИКЬЛУЯ

Ванаву ца аьжаивсса макь­на­тIис дия. Ва ххирая гьарнан. ВаначIан кIункIу тIун бикIайва циняв. Ванал хьхьичI къатIитIинсса лаккучунал нуз дакъая. Мунийн бувну гьарца къуч аьркинсса кIанайн театр­данул Садикь тIайла уккай­ссия. Гастроллайсса труппалул каялувчигу мудан Садикь-я. Ванал артистшиврул гьунардания цичIав тIий бакъара. Аьркиншиву дакъар. Га ия миллатрал кумир. Укунагу ххишала акъа интереснайсса инсан ия. Оьрмулуву цукунчIавсса комедиант акъая. Ялунгума ххишала акъа куртIсса, аькьлу бусса, цалва кьадру кIулсса, къакIулнан кIул бан каши дусса. Миккува – чIиви оьрчI кунасса. Цала хъунисса, чаннасса яругу явш бивтун, мурччивгу дартIун щяивкIрив, да итирартал на, тIисса, няз бурувччуну ччисса, муна му цалва кьадру кIул бан ччисса чIунни. Чара цир. БуруччинтIиссия. Садикьлухь къабанна, къашай учинсса лаккучу акъассияхха. Кказит тIивтIукунгу, Садикьлул кумаграй жу 7 азарунния ливчу­сса «Илчилул» подписка дурссия. Алжаннул ххари иву, ттущал циняв къутаннайх, циняв лакрал щархъавух увкссар. Ва ялагу, мяр лякъин, чатан лякъин, бензиндарал бак буцIин бан къашайсса чIумал (дуссия, дуссия мукунсса чIун), Садикьлун кIулссия цумур складрай цу лаккучув уссарив. Цуманал ци кумаг бантIиссарив. Бугу-байва. Хъамакъабитай, чун нарчагу, Садикь шупирнал чIарав щяивкIун икIайссия, хьунабакьлакьими циняв ххарисса, тяхъасса, оьрчIру ххаришиврул тIанкIру дуллалисса бикIайва. Щала тирххандарал генераторгу Садикь, ганаясса ххаришиву душиву. Садикь яла цIакьсса лакрал патриотгу ия. Ванал ихтилат лакращал лакку мазрай бакъа бакъая. Душманъя ванан «жула чIивисса миллат» тIутIима. «Да, матIурдувар ттул миллатрая чIивисса тIий! — учинтIиссия сситтуй. – Ссаллияр ва чIивисса? Щиярдияр ва чIивисса?»

ХIАМЗАТ ИБРАГЬИМОВЛУЯ

ХIамзат ялун уруган сса­вучIав артистнаха лавхьхьусса инсан акъая. Ялагума учинссия, учительнаха, школалул директорнаха, дянивсса даражалул къуллугърал къуллугъчинаха лавхьхьусса ур куну. Хъинну цала цува увгьусса, кIусса, къирият дусса адамина ия. Аьркин бакъа ихтилатравух, театрданул агьулдануву чан къашайсса аварарттавух хIала къауххайсса. Амма цавува цува – хъунасса, Аллагьнала гьунар буллуну ляхъан увсса артист. ХIазран бакъаяхха ганал, цимилгу цамур пишалий дузал хъанан бюхълай унува, ца ссятрайссавагу театр къакьабивтсса. Режиссер Геннадий Иванович Якунин дахьа-дахьа Дагъусттаннал Оьрус­нал театрданул хъунама режиссерну Аьрасатнава увкIсса чIун дур. (Яла махъ ганал Лакрал театрдануву цимигу хъамакъабитайсса спектакльлу бишинтIиссар). Оьрусналгу, Лакралгу театрду ца залдануву бусса чIун дия. Га кьини сцена лакрахь бур. Сценалийгу, цирив ца хьхьара-марасса пьесалул репетиция дур, ХIамзат хIаласса. ЧIараввасса Лакрал театрданущал кIул хьун ччисса Геннадий Ивановичгу увххун щяивкIунни залдануву. Цаппара хIаллава цIувххунни: «Это что за артист?» куну. Бусав. — Да это не артист, а глыба! – увкунни ванал. — Какой артист! Какая внутренняя пластика! Из него же веревки вить можно, любую роль сыграет! Я бы с ним поработал! – куну. Мукунсса угу-ия Дагъусттаннал халкьуннал артист ХIамзат Ибрагьимов.

САЛИХIАТ

СалихIат, аьпа биву, хIакьсса лакку хъамитайпа бия. Цила кьурчIисса кьадарданийн мукI­русса. ЩийнчIав, ссайнчIав аьрза бакъа, рухIгу, жангу ганиву дирхьуну, цилва къуллугъ биттур буллалисса. Костюмерный цехрал хъунмунил къуллугъ бигьасса бакъая. Шиккува кIицI лаган, танийгу Лакрал театрданул яннардал цех бия-биялну авадансса бия. Цалчин, цалва театрданул, аьпа биву, Минкаил Аьлиевлул хIарачатрайну дартIсса лакрал хъами – арамтурал дуллусса яннарду дия ( цаппарасса бучIия музейраву дишин, караматсса дурухрулул хатI ккаккан ччива, хьхьичIарасса лакрал хъаннил каруннил усттаршиврул багьа бищун), царай – театрдануву дурурххусса. Царайгу директор СалихI Алимовлул Москавлия Малый театрданул костюмерный цехрава тIалав дурссар тIисса европанал ва оьруснал классикалул лаххан бучIисса сунттул, аьтIласрал, бархатIрал, парчлул яннарду. ХIасил, янналул цех ккуччу тIий бувцIусса бия. СалихIатлун тIурча, цумур гьухъа, чухъа, карщи, кьяпа, чакма, ккуртту, шляпа чув бу­ссарив кIулссия. Ца артистнансса ккасттун дузал дуллай артистурал, режиссер, художниктурал, ца-ца чIумал СалихIатлул цехраву бакIу янналул хIала-ккала дирчуну дикIайссия. Ванил гай, ссихI-чIитI дакъа, хъинну аякьалий, гай сагъсса рухIру дусса затру кунна, кIани-кIанттай дишайссия. Цахьвагу кумаг за ба уча, юхссагу, мукссава ургъил бакъа мазурду уча увкукунгу: «Букьугъар, — учинтIиссия. – Вай бур артистал. Ттуршра хасият­равух бувксса (роллу тIиссия). Миннащал ттул маз лаяйссарив?» — куну.

ТУРКМАННАВУНССА АЬРХХИ

1992-ку шин. Аьратталсса, цалий къадарцIусса, ци ялун наниссарив бувчIин къашайсса чIун. На муни кказитрай бура. Гьарца кьини тIиссакссагу, театрданувугу бура. Ттул пикрилий, лакрал миллатрал мукьахчу, гьарцагу лаккучунал цIуцIи кIанай ка дишин хIадурсса Шалласу Шалласуевлул сипталийну, пикри хьунни Лакрал театрданущал Таканавун гьан, тийхсса, та чIумал биялсса бусса лакращал хьунабакьин, театр ккаккан бан, лакку мазрахссагу, лакрал балайрдахссагу тайннал мякь ли­ххан бан. Шалласул таний тийхсса хIалтIухъантураву мадарасса гъан-мачча бия. Тайнналгу баян бунни цивппа ххишала бакъа ххарину бушиву, ва яла ххирами хъамаллурал кунма, жул лув бацIангу хIадурну бушиву. Гьай-гьайкьай, циняв ххари хьунни. Ттунгу жулва идаралия командировка чирчунни, тийх хьумуниясса репортажру жулва кказитрайн дуван. (Дугу дурссия, сайки кIива зурул лажиндарай). Шалласул дакIнийн бувтунни революциялул чIумал лакрал бурттигьалтралгу тихун бувну бивкIсса аьрххи. Жущаварив къашайсса тIий буру. Бакуйн бияннин театрданул автобусрай (мадара ккавксса «Кубань» бу­ссия, байчара) лавгссияв, Бакуя хьхьирийх – Шевченколийн, ялагу – жулва автобусрай, туркманнал дагьантту хьусса ххуллурдайх. Къабусланна тийх жунма ккавкмуния, хьумуния. Чивчу­ссия цила чIумал. ЦIанакуллив дакIнийн дутан ччай бура тийх, жува хъатлия хъатлийн бичлай, ччими жул нязру буручлай, жуха паччахIнал вакилтураха кунма къуллугъру буллай бивкIсса инсантурал цIарду, ва цIунилгу миннахь дакIнийхтунусса барчаллагь учин ччай бура. Цалла давурттивгу кьадиртун, жуха зий бия. Ашхабадрай ХIамза Кьубатаевлул, Чаржаврай Загьиди Аьбидовлул, Бухарнаву ХIусман-ХIажи Шалласуевлул ва Шяпи Шяпиевлул театрданул цIаний бивхьусса захIмат хъамабитайссарив. Гьарманан аьркинмур дузал дуллай, Чаржаврайсса клубру тIалав буллай, прессалущал дахIаву дуллай. Артистуран дакIний личIансса хъамалушиннарду, хьунабакьавуртту дузал дуллай. Жулва халкь та чIумал Таканаву (Дянивмур Азия) хъинну бусраврай бия кIанттул халкьунначIа. Узданну, марцIсса цалва захIматрай, пишалул цалва ччатI хIалал буллай буну тIий. ЧIявусса инсантурал, кувннаща кувннал зехлай, жу хъамалу буллай бияв, паччахIтуран кунмасса ссупрарду тIитIлай бия. Жу цIанихну хъамалу хьуссару Туркменбашинал тIалавшиндарай аьнтIикIасса ссур кьяпа бурувххусса Кьурбанрамазан КьурбанрамазановлучIагу. Яла ттунма бювхмур, яла дакIний ливчIмурдив му бия – цинявннал, цинявннал! мажлис тIитIин хьхьичI барчаллагь учайва, цивппа кьамулгу бувну, цалва маэшатгу щаллу буллалисса буллугъсса чил аьрщарахьгу, дакI-аьмал ххуйсса, цащала бавкьусса туркманнал миллатрахьгу. Мунакьай хIакьинусса жагьилтурангу лахьхьин аьркинсса мяърипат. Яла, дуниял аьраттал дурккун, Таканава лакран шихунмай бизан багьсса чIумал, жущава тайннал чIарав багьайкун бацIан хьусса ххай бакъара. Ватандалийн зана бикIаву тайннан бигьасса къархьуна.

«УДРИДА БАВА»

Театрданул яла агьаммур масъала, бурж – цалва миллатрал драматургия гьаз давур. Лакрал театрданул хъун кьинилун ккалли дан бюхъайссар Казбек Мазаевлул «Удрида бава» бивхьусса кьини. Га кьини Дагъусттаннай ца бюхттулсса гьунарданул заллусса драматург ялун ливчуссар. Лакрал театрданул ххазналувугу ца ттиркьюкьи ххи хьуссар. Казбек Мазаев Дагъусттаннал чичултраву цанмалу хасъсса, лява-личIисса хатI бусса чичу ур. Ванал пьесагу хъинну ттюнгъа­сса ва пашманну чаннасса асарду чантI учин буллалисса бия. Махъ бакъа, агьаммур рольгу, сийгу Удридал роль дургьусса Шагьун Ибрагьимовай дия. Амма ттунна ляличIи ттюнгъану дакIний лирчIунни Уди Аьлиевал дургьусса пайхамбарсса, авдалтуравухсса душнил роль. Мугьали кунма кьючлай ялун бивгьуну нанисса цIу оьрмулул, элмийну учин, глобализациялул гуж-къиялул лякIин бувну, бухлаган бувну нанисса, буттал буттахъая бивсса, жунмалу хасну бивкIсса ва бухлагантIисса оьрмулул лишан чIалачIи дурна га образраву Удил. Залдануву щяивкIсса гьарцагу лаккучунал дакIнивугу кьурчIисса асарду хIасул буллай бия.

ХIАСАН БУТТАЕВ

Дурккусса акъанугу, ХIасан Буттаев хъинну интеллигентсса, гьанна бусса инсан ия. Цалва пишагу ганан тирхханнугу, дардгу дия. Дард дурккусса акъашиврия, гьарзат цанма кIулну ччимур кIулну бакъашиврия дия. Циняв цалва гьунарданий ххигу-ххишалану мукIруну бухьурчагу, ХIасан чIявумур чIумал ташвишну икIайва. Москавлив фестивальданийн «Кречинскийл хъатIувасса» ванал дургьусса Расплюевлул рольданувасса монологращал тIайла уклакисса чIумал, ХIасаннун хъинну гьан ччай бия. «Москав ккаккан, аьлахъан гьан гъирарай акъара,- увкуна ганал. – Мяйжаннугу гьунар бусса артистрав нава, юхссагу вай оьванма махърурив кIул хьун ччай ура», — куну. ХIасаннущал режиссернан зун, ца чулуха, бигьа къабикIайва. Гьарца цала геройнал реплика ванан шашан дурну, лялиян дурну диян дан ччан дикIайва тамашачиначIан. Гьарца мукъул, гьарца хIарпирал, гьарца интонациялул бакIрай ацIлай икIайва. «Ва циванни укун тIисса, на укун ацIан циванна аьркинсса» тIий, режиссер авара айва. Хасиятрал иш бакъая. Га мяйжаннугу дардирай икIайва, цала геройнал дакIниймур, цаламур дакIниймур кунма кIулну ччай. «Хъинни, хъинни, варч, ссибизлай циван ура? На ина увкумур баннахха. Ттун так ва нара дуллалимур циван дуллалиссараври кIул хьун ччисса!» – учайва режиссернахь. Цахьва цува мур-мургу тIий, мудан канихьнасса пIапIрусгу ссупI тIий, гьантIиссия кулисардахун. Амма спектакль тамашачинал хьхьичIун бувккукун, залдануву ганал гьунарданий хIайрансса тамашачитуран хъис пикри къабагьантIиссия, циксса дард-хажалат ккурхIуссарив муниннин хъунасса артистнал. ХIасан так сценалийн уккаву гьа шайва сцена буцIиншиврул, тикку хъанахъимунийн тамашачи вих хьуншиврул. Амма мудангу, дакIнийн багьтари, хIайп учара. ХIасан хъинну хIадур хъанай уссия цалла 70 шинал юбилейрайн. Къакьисматну ляркъунни.

ХЪАМАЛ

СССР-даний болгарнал драматургиялул фестиваль дусса чIумал, Лакрал театрданулгу бивхьуссия Панчо Панчовлул ( укунсса дунуккива авторнал фамилия) «Мукьличалт» тIисса пьеса. Хъуними роллу дургьуну буссия Шамил ва ПатIимат Керимовхъул. Спектакль ххуйсса хьуну, Москавлиясса критиктурангу ххуй бивзун, га ккаккан хъуншагьрулия увкIунни кIия критик, ца Михаил Швыдкой ( ди, ди, яла Аьрасатнал культуралул министр хьусса, уттигу хъун къуллугърайсса) ва ца цамагу. Вай кIиягу тани хъинну сий дусса «Театр» журналданий зий бия. На спектакль таржума буллай бура миннан. Цалва яла къалагай бурж цукун-бунугу яла гьан бан тIисса кунма, гъира бакъа, чIун гьан дуллай бур хъамал, вайнначIагу я бацIансса ци дикIан бюхъайссар тIисса кунма. Яла хIурхIа-хIурхIацIакул сценалухух лаглан бивкIунни. Хъян аьркинний хъяй бур. Сценалия я батIлай бакъар. Ахирданий хъатру ришлай бур. «Да! Оказывается, и в провинциальных теат­рах бывают большие артисты!» – увкунни Швыдкойл. «Артистка (ПатIимат) мне напомнила Нину Дорошину», (тани Дорошина хъиннува машгьурну бу­ссия) – увкунни ваманал. СССР-данийсса фестивальданий ххув хьуну, Шамилгу, ПатIиматгу, режиссергу лавгссия Москавлив хъуннасса премия ласун.
Буслан чIявусса хьунссия. Ванийну цалсса гьашиву данна. Лакрал миллатрахьгу барча тIий бура жулва театрданул цIанихсса лахъазан. Театр – жунна цинявннангу аьмсса, цинявнналгу дуруччин аьркин­сса язисса хъусри. Жува уздансса миллатирттавухсса бушиврул барашиннар. Жулва цинявнналвагу буржри жулва театрданул кашигу, кьудратгу ххи хьуншиврул чIарав бацIан.