МУРАДЛУЛ АРС МАХIАММАДКЬАДИ АМИРОВ
КIюрххицIуннайсса пахъдагьру ххядуккан дуллалисса, язугъсса хавар бувххунни ГьунчIукьатIрал шяравусса МахIаммадкьадихъал Мурадлул ва Загьидатлул къатравун.
Вайннал, 11 классгу бувккуну, дуклан увххун МахIачкъалалий яхъанахъисса, буттан цIа дирзсса арс МахIаммадкьади апатI хьуну, ацIния урчIра шинал оьрмулуву дунияллия лавгунни тIисса.
Нитти-буттал кумаграх къаялугьлай, зугу-зий, дугу-дуклай, цаннамур цува ляхълай, хIарачат буллай уссия. Инсаннал чIарав ацIан хIадурсса, дайсса даву усттарну дувайсса, яхI-намус ххисса, оьрчI ия МахIаммадкьади, оьрмулуха къалавхьхьуну.
ЗахIматшиву бивкIулул, оьлушиву кьадарданул! Ссалли нитти-буттал, уссу-ссил, бугьара хьусса буттал ниттил, ниттил ниттил, буттауссурваврал дакIру паракьат дантIисса? Гьаяхха шиннардил хьхьичI мукьа-мукьа инсаннал рухI цал архIал ларсъсса — МахIаммадкьадинал жагьилсса кIия буттауссу, ссурахъу, буттауссил кулпат. Къахьунмур хьуну къагъ лаган бувунну. Цибанссар, ажалуннин мажал бакъассар учайхха. МахIаммадкьадинал чIун дакъасса бивкIулул аьсившивугу кIидачIлай, жижара буллай буру буттахь Мурадлухь, ниттихь Загьидатлухь, ссихь Аьшурахь, уссихь Иминнухь, буттал ниттихь Хамислухь, буттауссурвал МахIаммадлухь ва Русланнухь, МахIаммадкьадихъал агьлу-авладрахь. ЯхI бара, кьянкьа дара, Заннал чирчусса чичрулун чаран бакъар.
Ххишала бивкIулул жагьилсса жаннайн хъап къаучиннав, махъминнал оьрмурдай барачат бишиннав, МахIаммадкьадинан къабуллумур оьрмулул бутIа мунан ххирану ивкIнан ххи баннав. Пирдавс-алжан нясив баннав. Амин!
ГьунчIукьатIрал школданучIасса «Дараччи» клубрал коллектив,
учительтал, дуклаки оьрчIру ва жямат
—————————-
Амиров МахIаммадкьадинал аьпалун
Зумалул ххару чичин кару зурзу тIий дурхха,
Шакилданух бурувгсса яру къявхъа тIий бурхха.
Ва чурх, ва бакI, ва гьайбат акъасса тIайлассарив,
Нитти-буттан макI куна ккаккан увну ивкIссарив?
Ххувзанналгу цачIанма ххуймирихха буцайсса,
Цал ттигу тасттикь дунни ва калималул мяъна.
Нитти-буттал дакIруми паракьат ссалли дайсса,
Вайннал дакI-къюкIлин дарман цу хIакинналли байсса!?
Вил ппугу ухьунссия арсная ххари хъанай,
ХъачI-бакI архIал дацIлайсса кумагчи хъанай ур тIий.
Нинугу духьунссия хияллал ххихху ритлай,
Агьлу-тухум ххуй бансса авкьат чув вия хъанай.
КьурчIишиву, Зал, ина тIайла бувк кьадарданул.
Угу Ина уллуна, лагу Ина лавсунни.
Пирдавс-алжан нясив ба, гьав нурданул дуцIин да.
Жуяту уцарчагу, виява уцан маав!
Щалвагу агьлу-авладрахь кьурчIишиву кIидачIлачIисса КIямашрал жяматрал цIания Загьрани
—————————-
МАХIАММАДЛУЛ АРС ЮСУПОВ ДАВУД
Декабрьданул 7-нний, чан-кьансса хIаллай къашавайгу хьуну, ахиратравун лавгунни ГьунчIукьатIрал шяравасса Юсупов Давуд МахIаммадлул арс.
Давуд увну ур 1940 шинал Ахъушиял райондалийсса Щукьттиял шяраву.
Ванал оьрмулул 2 шин хьуну вайннал кулпат бивзун бур ГьунчIукьатIрал шяравун. Цува ликкурай авцIуну махъ Давудлул оьрму лавгун бур ятти-гъаттараха зий зунттурду, арду, ххуллурдал манзиллу битлай, захIматрай ччатI ляхълай. Чув зий ухьурчангу, дакI марцIну захIмат байсса бивкIун бур. АрхIал зузиминнал дянив мудангу ванал хIурмат хъунмая. Цимилгу ва лайкь хьуна правлениялул чулухасса барчаллагьран.
Ва ия кару мусилсса усттар, шяраву акъа-чара бакъасса халкьуннал чул бищай кIану. Цума инсан цачIана учIарчангу, цалласса даву кьадиртун, щаллу байва жяматрал мурад.
Ва ия дакI хъинсса ттатта, ванал къушлия оьрчIал чIурду чан къашайва, Давуд-ттаттачIан цалва-цалва мурадирттащал бувкIсса.
Давудлул бивкIулул кьурчIишиву кIидачIлай буру ванал кулпатрахь, арсурваврахь, душваврахь, куявтурахь, арснал хъаннихь.
Гьав нурданул дуцIиннав, алжан нясив баннав вин, Давуд Амин!
ГьунчIукьатIрал школданучIасса
«Дараччи» клубрал
коллектив, ГьунчIукьатIрал ва КIямашрал жямат
——————————
МУСТТАПАЛ АРС МУСТИЕВ АБУТIАЛИБ
Декабрь зурул 22-нний хар-хавар бакъа дунияллия лавгунни Цалчинмур ЦIувкIратусса захIматрал ветеран, щалвагу оьрму хъу-лухччал даврий гьан бувсса цIанихсса захIматчи Мустиев АбутIалиб. Увссар му ЦIувкIрав 1933 шинал.
Буйнакскалий къуртал бувссар механизатортал шайсса техникум. ЗахIматрал оьрму байбивхьуссар буттал шяраву трактористнал даврий зий. Муния махъ 1995 шиналнин АбутIалиб трактористну, комбайнерну зий уссия. Шяраваллил жяматрал хъунил парча букъавгьуну къабитайсса шиннардий АбутIалиб шяраву яла аьркинма инсан икIайва, мунал кьимат лахъну бикIайва. Яржа бивхьуну мунал хъирив бачайссия жямат. ЧIярусса шиннардий бувсса захIматран лайкьсса кьимат бивщуну бур хIукуматралгу. АбутIалиблун дуллуну дур соцсоревнованиялуву ххув хьума тIисса тамансса хIурматрал лишанну, грамотартту ва медальлу. АбутIалиблул ва мунал кулпат Ххадижатлул, цивппа кунма, захIмат ххирану, халкьуннаву хIурмат багьанну къуццу тIунну хъуни бунни мукьа арс ва кIива душ. Миннан духIан багьунни ххаллилсса арснацIа ва ххуйсса куявнацIа шаврил хажалатгу. Махъсса шиннардий АбутIалиб кулпатращал шагьрулийн ивзун, МахIачкъалалив яхъанай уссия.
Цалва бюхъу-хIарачатрай дюхъан дурсса хъуру урттурахьхьун лагаврия буруккинттарай икIайва АбутIалиб. Му ия буттал кIанттул аьрщарах куртIсса ччаву дусса хIакьсса захIматчи, жагьилтурал насихIатчи. Диндалул аьдатру, дуаьрттугу лархьхьуну, инсан махъва-махъмур ххуллийн тIайла уккайни, кьулгьу байссия.
АбутIалиб дунияллия лагаврил кьурчIишиву кIидачIлай, жижара буллай буру кулпат Ххадижатлухь, арсурваврахь Залимханнухь, МахIаммадлухь, Артурдухь, душваврахь, миннал наслулухь, Ххадижатлул ляхъиндалухь ва цинявппагу гъан-маччацириннахь. Цув Алжаннул ххари уваннав, рухI бигьаний дишиннав, махъминнахьхьун цIуллушиву дулуннав!
Цалчинмур ЦIувкIуллал
жямат
———————————
АЬВДУССАМАДЛУЛ АРС РАТМИР
Жагьилсса оьрмулий, 35 шинаву, захIмат-жапасса азаруннил жуятува батIул унни ТтурчIиял шяраватусса Аьвдуссамадлул ва Миясатлул арс Ратмир.
Му нязаннивсса бивкIу бухIан Аллагьнал ссавур дулуннав ванал нитти-буттахьхьун, агьлу-авладрахьхьун.
БухIан захIматсса бивкIулул кьурчIишивугу кIидачIлай, дакIнийхтунусса жижара буллай буру ванал ниттихь, буттахь ва махъсса цинявппагу гъан-маччанахь.
Ратмирдул бунагьирттал аьпа баннав, махъминнал оьрмурдай барачат бишиннав. РухI алжаннул ххари даннав.
ТтурчIиял жямат
Зумалул ххару
Дадал аьзизсса Ратмир,
РатIайх бивщу къарчигъай,
Ми вил чаннасса яру,
Чинарданун хьусса чурх
Гьаттаву аьяйссарив!
Ина жуйн бивтсса баргъ-яв,
Ина жул хIурулэнъяв.
Ина акъасса дунъял
ЛухIину чIалай дури.
КIива мюрщисса оьрчIгу
Щийн аманат бав, дадал?
Вил оьрчIахгу ялугьлай,
Яхъанавув утти жу?
