Ххирасса «Илчи» кказитрал редакциялийн, МахIачкъала шагьрулул школардаясса лакку мазрал учительтурал чулуха­сса барчаллагьрал чагъар.

Уттигъанну ттуйн оьвкунни пулансса кIанайн бучIан аьркинссар куну. Нагу лавгссияв. Миккун бавтIун бия шагьрулул школардаясса лакку мазрал дарсирал учительтал. БатIаврил сиптачигу бия «Дараччи» клубрал президент Илиясова Мариян ЧIибиевна. Му цурдагу дия Учительтурал кьини.
Мариян ЧIибиевнал, жу Учительтурал кьинилущалгу барча бувну, бувсуна батIаврил мурад. Ванил итабавкьуну бия нажагь хьунабакьайсса, сайки бакъа хьусса, 1963 шинал чансса тиражрай итабавкьусса, МахIаммад-Хан Пашаевлул сакин бувсса лакрал магьрал лу. Вайннуясса луттирду школардангу буллуна ванил. ЦIанасса чIумал вагу хъанай бур ца дакI ххари хьунсса иш. Ларгсса шиналгу Мариян Илиясовал оьрчIансса назмурдал «Мюрщи щаращал щурщу» цIанилусса лугу школардан буллуссия.
Ва бигьа дакъасса чIумал ва хъамитайпалул миллатрай дакI-лякьа цIий, лакку мазгу бухкъалаган, лак­рал лавгмунил ва бучIантIимунил пикри-дард дуллай къуццу тIутIаву багьа бищун къашайсса даву хъанай дур.
Жун, шагьрулул учительтуран, ва хъинну хъуннасса бахшишну хьунни, цанчирча жул библиотекарттай дакъар оьрчIащал зунсса миллатрал литература, буми лу­ттирдугу шяравусса школардансса бур.
Жу цинявппагу, МахIачкъала шагьрулул лакку мазрал дарсирал учительтал, дакIнийхтунусса хъунмасса барчаллагь тIутIи­ссару Илиясова Мариян ЧIи­биевнахь, жулва миллатрал цIаний дуллалисса хъунна­сса мяъна дусса давурттахлу. Аллагьнал кабакьиннав ина дуллалимуницIун вания тинмайгу, тIиртIунийн ка дияннав, цIуллушиву дулуннав вихьхьун уттигу хъин-хъинсса давурттив дуллансса. Я Аллагь, вихьхьун кьудрат дулуннав ялунчIилгу вайннуярвагу ххуй­сса луттирду итабакьинсса, ми бачIлай жува хьунабакьиннав.
Зина ХIусайнова,
МахIачкъалаллал школардал лакку мазрал дарсирал
учительтурал цIания