КIулсса куццуй, гьашину Апанни Къапиевлул цIанийсса Лакрал музыкалул ва драмалул театр кIицI лаглай бур 80 шинал юбилей.

Юбилейрал хьунийн театрданул итабавкьунни театрданул авадансса ва яргсса тарихраясса лу. Му сакин бувну бур Аьрасатнал магьирлугърал лайкь хьусса деятель, Лакрал театрданул зав­лит Гулизар Султановал.
Луттираву балжину бувсун бур Гъумук жагьилтурал сакин дурсса кружокрая, муния шихунмай Лакрал театрданул гьану бивзминная, му ччаннай бацIан буллай бивкIминная, хьхьичIунсса режиссертурая ва актертурая, театрданий каялувшиву дуллай бивкIминная ва жагьилсса актертурая. Сакин бувния шихунмай хIакьинусса кьининин театрданул оьрмулуву агьамсса кIану бувгьусса спектакльлая, театр­данул хьхьичIуннайшивурттая ва тIайлабацIурттая. Луттираву цачIун бувну бур 80 шинай театр­данул бивтсса захIмат-жапасса ва мунищалва архIал яргсса ва авадансса ххуллу.