Кказит-журналлай зузисса жун радио-телевидениялий зузими пишакартурал даву бигьа дизлан дикIай, жул дяниву цIа ларгсса «телевизионщиктал», тIурча, тамашачитурал хьхьичIун къабуккайсса жулмур пиша бигьасса бур тIун бикIай.

Ноябрьданул 21-нний кIицI лагай Дунияллул телевидениялул кьини. Мунияту ттун пикри хьунни халкьуннаву машгьурсса ва хъинну ххира хьусса медиа-холдинг «Прибой» телеканалданий ведущийну ва радиолий ди-джейну зузисса жулва лакку душ Алиса Шагьназароващал ихтилат буван.

— Алисай, цукун багьра ина му цIана инава зузисса холдинграл радиолийн?
— Радиолийн бучIаннин, на зий бивкIра Финансирттал ва экономикалул колледжраву. Щар хьуну, цаппара хIаллава миччасса декретрал отпускалий буна, ттун гъира бия чIири-хъунсса даврихун багьан. «Прибойращал» тIурча зий ия ттул лас. Ца ххуллух мунан, цала чивчусса балай лавсун лавгун уна, бавну бия микку зузиминная радиолий цIусса хавардал рубрика дачин дансса инсан ххал уллай буру тIий. Бюхъайхха буцин нава тIисса пикрилущал лавгун, чIиви-хъунсса ихтилат ттущал бувайхту, миннал на даврийн кьамул буллай бушиву баян бувна. КIира шинай зий буссияв микку. Яла ххал бувссия ттущава ди-джейнал даву дачин дан шайрив. Мугу бигьанма хьуна, цанчирча муниннингу зий бивкIсса кIира шинал даврил вардишшинна диркIун тIий. ХьхьичIва цIусса хаварду ккалаккисса ведущийну бивкIхьурча, ди-джейналмур даву хъиннура хIазсса ва ттулла дакIнин ччисса ляркъуна. Ва дия халкьуннащал, жухва вичIидирхьуминнащал дахIаву дусса, нахIусса мукъуйну ва ххуйсса балай бивхьуну миннал макьу дакьин дуван бюхъайсса даву. Яла, медиа-холдинграл бюхъурду гьарта-гьарза хъанан бивкIукун, ттухь телеведущийну зун къабю­хъанссарив, куну цIувххуна. ХIасил, цIананин микку зий бухьувкун, му давугу ттущара дан бювхъуссаннун ккалли давияв.
«Прибойрай» зий бунугу, на ттулва преподавательналмур пишагу къакьабитав. Ингилис мазрацIун бавхIумур пиша ттул чIивинияцIавасса хиялъя. ЧIал къавхьуну умуд бур хъунмур чIун цалчинмур ттулва пишалун хас дуллансса.
— Вил пиша бур гьар кьини цIу-цIусса ягу гайва гай тамашачитуращал яхши-хашрайсса пиша. Цукунсса ур «Прибойрал» тамашачи?
— Мяйжаннугу, жул даву дур гьар кьини цIу-цIусса хияллу, пик­рирду чантI учин буллалисса. Республикалий «Прибой» щурун бивкIния шинмай, так му радиолух вичIидишайсса хIакьсса тамашачитал жун чIунийнува утти бувчIай. Миннан кIулну бикIай гьар цимурца жучIа хъанахъимур. Архсса зунттал шяраву ялапар хъанахъисса жул тамашачитуран жу буру гьар кьинисса тирхханну. Жул балайрдах, хъярч-махсарарттах най дур миннал бигьабакъасса оьр­мулул, багьу-бизулул кьини. Гьарза канилусса, гьарзатрая бувччусса ва ца-ца чIумал думуний щукру бан хъамаличIайсса шагьрулул халкьуннах бурувгун, щархъавами бур жух мюхтажми ва мякьми тамашачитал. Жул тамашачи ур дакIнийхтуну барчаллагь учин карчI дакъасса, жухь нахIусса бакъа махъ къаучай­сса. Жух вичIилий, жучIан оьвчай даргиял къур-нувщи бугьлагьисса давурттал чIумал, Лаккуй зунттаву ятти-гъаттарачIасса ризкьичитурал, хъуни ххуллурдайх лахъисса манзилданийх нанисса жулва дальнобойщиктурал ва пулансса балай бишара, ягу цая ссалам бусияра тIий.
— Алиса, ина бура Да­гъус­ттаннал шоу-бизнесрал вирдакI кIулсса, сайки гьар кьини учирчагу, миннащал хьунабакьайсса инсан. Цукунсса ци даражалий дур жулламур шоу-бизнес Ккавкказуллал вайми регионнах бурувгун?
— Шоу-бизнес увкукун, жула халкьуннал бакIурдивун буххай личIи-личIисса пикрирду ва мисаллу. Ттухь цIуххирча, Дагъусттаннал шоу-бизнесраву бур, жува гьарма куна, цаннал ца чIаравгу бацIайсса, цаннал цагу бувгьусса, цащара шайкун цалла даву дуллалисса халкь. Яла, ми цукунсса бухьурчагу, миннах вичIидишинмагу чан хъанай акъархха. Гьарца балайчинал буссар цалва даражалул вичIидихьулт. Цаннай вил дакI дакьлай духьурча, гаманал балайрду гьич вил дакIнил ласлай бакъахьурча, ганал балайрдах мякьссагу ляхълай ур. Мукунсса чIун дур цIана. Яла чIумул ккаккан бувай цуманаву ци гьунар буссаривгу. Гьунар бакъама чIумул цила ят уцан увай шоу-бизнес тIисса ххурупIайлия.
Цурда Дагъусттанналмур шоу-бизнес чIаххуврайсса вайми регионнах бурувгун цимивагу шачIанттул лахъну дур. ХIакьину Чачаннал, Ингушнал, АьсатIин-Чаргаснал шоу-бизнес хханссар Дагъусттаннай 10 шинал хьхьичI диркIсса шоу-бизнес. Жуятура цIа дан чансса, кIицI лаганна цаппара шиннардил хьхьичI Ухссавнил Ккавкказуллал регионнай зузисса циняв тяхъашивурттал ва музыкалул радиостанциярттал дяниву баян бувну диркIсса конкурсраву жулмур «Прибой» цалчинмур кIанттун лайкь хьуну диркIшиву. ЖучIа бур мяйжаннугу цалла давугу ххирасса, дакIнийхтуну цалва пишалий зузисса инсантал. Мува зун цинявннан кIулсса Расул Аьлибеков, Адам Будагилов, Юлия Диброва ва цаймигу.
— Инава зузиссаксса хIаллай эфирдануву хъянсса ягу пашмансса цичIав ишгу хьуссарив?
— Цикссагу. Хъамакъаритай нава цIусса хаварду ккалаккисса ца эфирдануву ца аьлагъужалущал, ца ттявх-шявхлищал ттула хьхьичIсса микрофон багьну, му багьсса кIанайн кьусгу бивкIун, хаварду бувккусса эфир.
— Алиса, ахирданийгу ци чIа учинна ина зулва тамашачитуран ва жул бу­ккултран?
— Цал цIубакIрай хъунмасса барчаллагь учин ччива ттувура ттулла чIиримур Ватандалух хъуннасса ччаву дирхьусса ттулва нитти-буттайн. Ттул ппу ур цала буттал кIану ххирасса, хьусса оьннасса кьинигу Лаккуй КIамахъалив гьан дан ччисса инсан. Нинугу, мува куццуй, жун ци хъинбала бан хъинавав, жу ссал ххари бан хъинавав тIисса. Мукун тарбия бувну буру жу ссищал жул нитти-бутталгу, дуллалисса даву дакIнийхтуну дуван ва хьуссаксса ва оьрмулий щинкIуй къаччан бикIан къабувну яхъанан. Гьар кьини ттулва тамашачитуран кунна, зул буккултрангу чIа учин ччива паракьатсса дуниял. Дунияллий дусшиву ва аслахIшиву духьурча, оьрмулул нигьачIишивурттугу яла ласун кунна чIалан дикIай.
Ихтилат бувссар
Залму АьбдурахIмановал

 

Алиса бувну бур МахIач­къалалив КIамахъаллал шяравасса Исупов Исуплул ва ЧукIнатусса Аьшурал кулпат­раву. Ва школалий дуклай буна, МахIачкъалалия вайннал кулпат бивзун бур чIаххуврайсса Къалмукьнал хъуншагьру Элисталийн ялапар хъанан.

Школагу къуртал бувну, Алиса дуклан бувххун бур Къалмукьнал паччахIлугърал университетравун романо-германнал факультетрайн. 2001 шинал университетгу къуртал бувну, Алиса, зана хьуну МахIачкъалалив, зун бивкIун бур Финансирттал ва экономикалул колледжраву ингилис маз дихьлай. Алиса щар хьуну бур чIявучин кIулсса яруссаннал балайчи ва музыкант АхIмад Шагьназаровлун. Ва ххаллилсса ва бавкьусса творчествалул кулпатраву хъуни хъанай бур арс ва душ. Ванил ссу Имара ХIажимиевагу «Дагестан» РГВК-лий ведущийну ва корреспондентну зий буссар.
«Прибой» медиа-холдинграл радиолий зий байбивхьусса Алиса цIана вайнналла телевидениялийсса «На лавочке», «Привет», «Прибой!» тIисса передачарттал ведущийгури. Мукунна Алисал дувайссар жулва халкьуннан ххира хьусса «Прибойрал» сакиншиндаралу лагай­сса эстрадалул концертирттал конферансьенал давугу.