Декабрьданул 1-нний Дагъусттаннал паччахIлугърал педагогикалул университетрал актовый залдануву хьунни мушакъатсса оьрчIал фес­тиваль «Равные возможности, достойная жизнь для всех!» цIанилусса. Ва фестиваль хьунни мушакъатминнан кумагран сакин дурсса «Жизнь без слез» Дагъусттаннал регионал жяматийсса организациялул сипталийну.

Бадрижамал Аьлиева
«Равные возможности, достойная жизнь для всех!» фестиваль жулла республикалий гьашину ря­ххилчинни дуллалисса. Цалчинмур фестиваль дурссар 2010 шинал.
— Ва аьдатравун дагьсса фестивальданийнугу жу цал ххишалагу баян буван ччай буру мушакъатсса оьрчIахьгу душиву обществалуву лайкьну оьрму бутлансса ихтиярду. ХIакьину дурсса байрандалул агьаммур мурадгу – цIуллу-сагъшиврул ссуссукьусса оьрчIру бусса кулпатру цачIун бавтIун, бигьалагавуя, — буслай бур ва суккушиндарал председатель Аьйшат ХIамзаева.
Фестивальданувух гьуртту хьунни МахIачкъалаливсса ва респуб­ликалул цаймигу кIанттурдайсса школа-интернатирттавасса, мушакъатсса оьрчIансса цаймигу идарарттаясса тарбиячитал.
Шиккура хьунни мушакъатсса оьрчIру дяхтта бикIайсса Къатлул тарбиячитурал каруннил дурсса давурттал ихIсаниятрал выставка. Миккура хъанай дия ччинаща ччимур машан ласунгу. Дарххумуних­сса арцу гьантIиссар мушакъатсса оьрчIан ва жагьилтуран буллалисса дяхттасса Центрданул къатрансса харжлугъравун.
Фестивальданул ахирданий цинявппагу оьрчIан дуллунни спонсортурал чулухасса бахшишру.