Ларгсса хамис кьини Лакрал театрдануву лавайсса даражалий хьунни къумукьнал чичу М. Кьурбановлул пьесалиясса «Малла Насруттин» спектакльданул премьера.Театрданул сезон тIиртIуния мукьах кIилчинсса спектакль.

КъакIула бюхттулсса даражалий бивхьусса «Хан-Муртазяли» спектакльданиясса гьавас тамашачитурал дакIурдиву гъилинува буссияв, юхссагу Малла Насруттиннуясса хIазсса хаварду, анекдотру чIявурхха Дагъусттаннал гьарцагу миллатраву, му бунияла хIазсса бушиву кIулнуяв, театрданул зал щяикIансса кIану бакъа бувцIуну бия. Му бакъассагу, оьрмулул хъуниминнан ххуйну дакIнийссар, спектакль Лакрал театрданул хьхьичIвагу бивхьуссар. Ттунмарив ва къямадия дакIний ливчIссар чIивинийва телевизорданувух ккавккун. Малла Насруттиннул роль дургьуну уссия жула хъунасса артист Садикь МахIаммадов, аьпа баннав цал.
Залданувун буххайтува лап ххари хьура тамашачитураву чIявусса жагьилтал ххал хьуну, кьатIув театрданул хьулуву ккавккукуннив, ттулва яруннийн вих хъанай ба­къассияв. Махъсса шиннардий лакрал жагьилтал кIиссурттай буккинукссавагу ххал къашайссия театрдануву, (школарттай билетругу бав­ххуну, оьрус мазрай бихьлахьисса патриотическийсса темалиясса спектакльлайн бакъасса). Жунна ятсса идеологиялул чул бувгьуминнал ялун бигьаву магьирлугърайгу асар хъанай дурхха, миннах вичIидиширча, театргу хIарам бур. БувчIуну лякъиннавча жулва жагьилтуран ссаву ци буссарив. Ттунмарив чIивинияцIава театр – му оьрмур. Гьарцагу спектакльдануву ттун чIалай бикIай хIакьинусса оьрму, ттула лагма-ялттуми, ганил текст чичул цимирагу шинал хьхьичIва чивчусса бухьурчагума. Жагьилсса ник театрданувун кIура баяву – му хIакьинусса оьрмулул шартIирдаву ххари къахьунсса иш бакъар. Мунияту «Малла Насру­ттин» спектакльданул цалчинсса тIайлабацIулун на ва иш ккалли буллай бура. КIилчинсса тIайлабацIу – спектакль цуппа ххаллилсса даражалий шаву. Тамашачиталгу сахIналий хъанахъимунивух хIала-гьурттуну бусса кунма бия. Театр хъяхъаврил гургу тIий бия.
Махъсса зурдардий билаятрайгу, щалла дунияллийгу дакIниву буруккин бутансса, гьунттийсса кьинилул ххажалат ялу-ялун хъунна хъанахъисса гьантрай, ххишалдаран, хьхьичI кьини Туркнал дазуй Аьрасатнал самолетгу руртун, халкьуннал дакIру аьраттал дурксса ппурттуву, чIумуйсса бухьурчагу бявххиху бан, гукун тяхъасса хIазсса спектакль бикъавхьуну къабучIия.
Пардав гьаз даннинна итадаркьусса зюннав-дачIулул чIунил нава чIивинийсса шяравусса хъатIи хьхьичI бацIан бувна. Пардавлуха залданувун бувккун нетIакурттаву, ляличIисса увинтращал къавтIисса артистурал тамашачитал биялну тяхъа бувна. Гара ца макьулий, янил ляпI учиннин спектакльгу къуртал хьуна.
Малла Насруттиннул роль дургьуну ия Дагъусттаннал Халкьуннал артист Аслан МахIаммадов. Ванал тIуркIулух буруглай, аьпабиву Садикь МахIаммадов хьхьичI ацIлай ия. Махъ, чIарав щябивкIмигу бия оьрму наниссаксса Асланнул сахIналийсса къуццу буттаха лахьлай бур тIий. Малла Насруттиннул кулпатрал Жумайсатлул роль дургьуну бия Дагъусттаннал лайкь хьусса артистка Саният Рамазанова. Муданна кунна ва рольгу яргсса дия. Та бавал айнива увччу хьуну увсса урвав, увччу хьусса роллу дургьуну акъа та оьрчI ккаккан увар, мукун усттарну дугьлай урхха цувагу, тIий бия Хасайл роль дургьусса Сухраб Шуаьев сахIналийн уккайхту. Цалнияр цал магьир хъанай бур тти­гъанну театрдануву зун бувкIсса жагьилсса актертурал Ибрагьим Мусиевлул ва Юсуп Саркиевлул бюхъу-гьунаргу. МахIаттал бувна цинявппа тамашачитуран ттинин, балай тIий акъа, роль дургьуну нажагьвагу къаккаккайсса Ямлихан ХIажиевлул Чавушнал роль усттарну дугьаврилгу.
БурцIил роль дургьуну ия Да­гъусттаннал лайкь хьусса артист ХIажиаьли ХIажиаьлиев. Ярг-я курчIущарнил роль дургьусса Да­гъусттаннал лайкь хьусса артистка Юлиана МахIаммадовагу. Юзбашинал роль дургьуну ия Аьбдул Давыдов.
Спектакль цуксса хIазсса бухьурчагу, байбивхьуния къуртал хьунцIа тамашачитурал хъяхъисса бакъацIарцагу, спектакльданул ахир-мурад цумацагу пикри уллали буллалисса бур. Инсаннан хьхьичIва-хьхьичI аькьлу булуннав. Шярайх уклай тIисса кунма оьрму бутлатисса Малла Насруттиннул цалва аькьлулул куртIшиврийну на акъа цура тIий заназисса аваданчу БарцIгу хъуслицIа унни (ганиннин цанна хъус Аллагьнал дичай тIий ивкIсса инсан, Малла Насруттиннухь ур Аллагьнал цукунни ттул ашрапиртту вин бивчусса, ми на бичав тIий. Малла Насруттингу ур, на вай Аллагьнахь чIа тIий уссияв, КIаналгу ттун бивчунни, ашрапиртту бичлай ина ттун къаккавккуннахха тIий), хIатта чурххайсса яннагума лирккун кьаивтунни, хъунасса Юзбашигу цала чулий диван кьукьин унни.
Спектакльданул режиссер – Аьра­сатнал магьирлугърал бусрав­сса зузала Скандарбек Тулпаров, декорация – Дагъусттаннал лайкь хьусса художник Аскар Аскаров, костюмру – Вера Агошкинал.
Лакрал театрдануву уттинин Скандарбек Тулпаровлул хIадур дурссия Валерий Эфендиевлул аьпалул вечер. Буслай ур Малла Насруттин спектакль хIадур буллалиссаксса хIаллай цанма Лакрал театрданул коллектив ххира хьушиву. Бюхъу-гьунар ххисса, цалла даву ххирасса актертал бур, тIий ур. Яла-ялагу ванал кIицI лавгунни Аслан МахIаммадовлул ва Саният Рамазановал усттаршиву. Жагьил­сса актертуравугу ялун буккансса актертал бур увкунни.
Спектакль «Малла-Насруттин» буссар хIакьинугу.