Дагъусттаннал УФСИН-лул ва Бусурманнал духовное управлениялул дянивсса хIала-гьурттуну зунсса икьралданийн бувну, уттигъанну республикалул Муфтиятрал ва Динийсса идарарттащал зузисса комитетрал вакилтал бивунни №2, №7 исправительный колониярдайн.
Вайннал мурад бия дуснакь бувминнащал хьунабавкьуну, мюнпатсса ихтилатру баву.
Дуснакь бувминнащал хьунабакьин бувкIун бия Динийсса идарарттащал зузисса комитетрал председательнал хъиривчу Расул ХIажиев, МахIачкъалаллал Жумяъ-мизитрал имамнал хъиривчу МахIаммад Кьурбандибиров, республикалул Муфтиятрал вакил АхIмад МахIаммадов ва ЦIусса Тюбе поселокрайсса имамнал кумагчи Шамил ХIажиев.
Ва хьунабакьаврий ихтилат буллай, УФСИН-лул хъунаманал хъиривчу Аьликьади МахIаммадовлул кIицI лавгунни, АьФ-лул УИК-рал 14-мур статьялийн бувну, дуснакь бувминнахь ччимур дин дан ихтияр душиву, амма цалла язи дургьусса дин дуллай, цивппа бусса идаралувусса низамрава буккан къабучIишиву, мукунма цайминнал ихтиярду ссуссукьу дуллан къабучIишиву. Дуснакь бувминнахь ихтияр дуссар диндалул аьдатру дан, диндалуцIун дархIусса затру ва динийсса литература ишла дан. Республикалул УИС-рал идарарттай личIи бувну буссар диндалул аьдатру дансса къатри: 4 мизит, 7 чак бансса къатта. Миннува 3 къатта – ххачпараснансса, 1 килиса.
Дуснакь бувминнащал ихтилат буллай, МахIаммад Кьурбандибировлул бувсунни дуаь даврил инсан оьккимуния уруччайшиву, яхIирава уккан къаитайшиву. Цуксса чIявуну дуаь дуллай урив инсан, муксса цIакьсса дикIайшиву мунал Аллагьнащалсса дахIаву, мукссава урувччуну икIайшиву му бунагьирттая.
Ихтилатру къуртал хьуну махъ Муфтиятрал ва Динийсса идарарттащал зузисса комитетрал вакилтурал УФСИН-лул идарарттаву тарбиялул даву дачин дурсса зузалтращал архIал ххал дунни колониярдайсса библиотекалувусса ва мизитравусса литература, миннувух экстремизмалул пикрирду буссарагу дакъарив кIул бан. Дуснакь бувминнащал хьунабакьин бувкIсса диндалул идарарттал вакилтурахь хъунмасса барчаллагь увкунни Аьликьади МахIаммадовлул. Ванал кIицI лавгунни укунсса хьунабакьавурттая дуснакь бувминнащалсса тарбиялул даврил даража гьаз бан ва ми тIайласса ххуллийн буккан бан хъунмасса мюнпат хьунтIишиву.
ДР-лул УФСИН-лул
пресс-служба
ХIадур бувссар
А. Аьбдуллаевал
