ОРВИ-рал ва гриппрал чIявусса дуклаки оьрчIру къашавай хьуну бур тIий баяврицIун, Роспотребнадзорданул тавакъюрайн бувну, хIукму хьуну бур ца нюжмардийсса «Центр одаренных детей» тIисса республикалул лицей-интернат лакьин.

З. АьбдурахIманова
Аьмну дуклаки оьрчIал 20% бявкъу-гъили шаврил азарданул къашавай хьувкун, хъуннасса нигьачIишиву хьуну дур ва идаралувусса цинявннан. Вайксса оьрчIру ва лицейрал пишакартал цал архIал къашавай шаврил сававрал хъирив лаллан бивкIукун, ялун ливчуну бур цаппара хIаллал хьхьичI МахIачкъалаллал кIулшивуртту дулай циняв идарарттай дурсса гриппрал вакцина ва лицей-интернатраву къадурну лякъаву. Ва иширал хIакъираву Роспотребнадзорданул ДР-лул Минздраврайн тIайла бувккун бур мугьлат бакъа хъирив лаян тIалав буллалисса чагъар.
ХIакьинусса кьини санитар хIакинтурал тIимунийн бувну, лицейраву ккалаккисса оьрчIал ва шикку зузисса пишакартурал цIуллу-сагъшиврун заралсса тагьарданува ливчуну бусса бур ва ялун нанисса нюжмардий карантин дукьан тIий бусса бур.
Роспотребнадзорданул хъиривлаявурттайн бувну, республикалул халкьуннал 32,5 % прививкарду дурну дусса дур, миннува – 534 976 оьрчIайн. Гриппрайн къаршисса вакцина итабавкьуссар федерал харжирацIух.
ХIакьинусса кьининин Да­гъусттаннай гриппрал ва ОРВИ-рал къашавайсса халкьуннал даража бусса бур лагьсса, нигьачIишиву дакъасса.