ХIурмат лавайсса Ккуллал жямат! На ттула буттал шяраваллицIун бавхIусса цаппара пикрирду бусаннин, ттун ччива цал ттигу тикрал бан жула Ккуллал шяраваллин цIа куну чивчусса шаэрнал махъру:
Лакку Ватандалул
кьибла дагьани,
Кьудратрал ва чIумул
чивчу кьиблама,
Душманнал турлил ххют КьукIмайн дагьаннин
Гьаз шайссагу бивкIссар
кьисасрал лама.
Кьиблалий кьянкьану
бавцIусса ккуллал
Кьамул байсса бивкIссар
цалчинсса ккулла.
Ккуллардал бакIрахсса
душманнал аьрал
Буччин байсса бивкIссар
гьаттал аьрщарал…
Укун куртIсса асар биян буллалисса, бюхлахисса ххару чивчуну бур Руслан Башаевлул жула шяраваллияту ва агьулданияту.
ХIажихъал Дундардул цалва луттираву жула Ккуллал шяраваллил ва жяматрал тарих аьщуйн щуну ккаккан бувну, чивчуну бухьурчангу, ялагу жула тарихрал аслийсса симан щаллу хъанай дакъар. ЧIявур гьаз хъанахъисса суаллу, жаваб дулунма къаляхълахъисса кIанттурду.
Жунма кIулли жулла шяраваллил оьрму даин рахIатну най къабивкIшиву, цикссагу талатавурттавух ванил арсру цимилагу хIала бувхшиву. Ми талатавурттал ва жяматрал багьу-бизулул яла хъунмур баранугу бивкIшиву кIулли «Хъун-ЧIюй», цувгу, аьш-бакI къалирчIун, ванияр хьхьичIсса ттуршукулул дянив левкьун лавгсса.
Жуявату гихунмайсса наслулул жува жулва ппухълуннал оьрмулул ца яла язисса гьайкал ядан къавхьуминнавух ккалли бувну кьабитанссарухха.
Ккуллал шяраваллил зума-къирагърайсса бюхттулшиврий цимирагу ттуршукулий жард къакуну бавцIуну бивкIсса «Хъун-ЧIюй» цIунилгу жува буржлувссару ччаннай бацIан бан. Жула шяраваллил авадансса ва ххаллилсса тарихраясса яла хъунмур бусалану хъанахъиссар «кIа Къала».
Ча, на оьвтIий ура гьарцагу чантI увкусса ккуличунайн, лаккучунайн, кIа жула тарихрал эмарат утта дуккан дансса ниятрай, чIарав бацIияра, лагма лагияра тIий.
Шиккува дакIнийнгу бутан ччай ура, тарихрал ва культуралул ядан аьркинсса аьнтIикIасса гьайкал хIисаврай, кIа жула Къала хIисаврайн лавсун бивкIшиву Дагъусттаннал ва Аьрасатнал лагрулий.
ЦIанасса чIумал сакин дуллай буссар «Кулинская крепость Хъун-ЧIюй» тIисса ихIсандалул фонд. Мунил Советравун бухлахиссар вай урчIа инсан:
Юсуплул арс Гьарун ХIасанов
МахIаммадлул арс Дундар ХIажиев
ХIасаннул арс ХIадис МахIаммадов
Абакардул арс Киров Султанов
Аьлил арс Оьмар Оьмаров
Ибрагьиннул арс Аьвдурашид Зирбуев
Малланал арс Рамазан Маммаев
Кьурбаннул арс АьвдурахIман МахIаммадов
МахIаммадлул арс Абакар Аьлиев
Фонд сакин дурну чулийн дуккайхту, банкрайсса счетрал реквизитругу кказитрай рищунну.
Зул дивандалий бишин кунма, тIайла буклай ура вай ттула дакIнил куртIнивасса цаппара назмурдал ххаругу.
***
Аьвзалзаманнул хьхьичIсса
Ца-ца дагь мащал вирттал,
БакIрачIан кьини дуркIун,
ЦачIун хьусса уссурвал!
Щил дирзнавав зун «Ккул» цIа?
Щил бувнавав ЧIюй-Къала?
Заллу цIа дирзма уну,
Ккул ябуван бувнавав?
Виричунал бакIрайсса
Бухар аьнтIикIа кунма,
Буссияв, Хъун-ЧIюй-Къалай,
Ина Ккуллан пахруну.
Щарнил хъачIрайсса ина,
Хъунзунттуйсса ав кунма,
БачIи къаливчI чурххащал
ДакIнийссара ттун мудан.
КьатIаллил къачагътурал,
Шагьтурал зулму ккухIлай,
Бакъаяв ина багьсса,
Жан Ккуллахлу дуллуну?
ТIабиаьтрал гьайкаллуй –
ХханацIалуй, БартбакIуй,
Утти щунни жул иттав
Зуйн щай чанна бургъил нур.
Идавсил ца чичруну
ДучIанхьуви ттигу чIун.
Нагу
Яча-Аьлилхъал Абакар
