ШАМСУТТИННУЛ АРС АЬЗИЕВ ЯХIЪЯ
Вай гьантрай, захIматсса азаруннища ххассал хьунсса кьисмат къавхьуну, оьрмулул 84 шинаву аьпалувух ивхьунни хIакьсса зун­тталчу, шяраваллил жяматрайгу, цува гьуртту хьунийгу цIу-цIанпир байсса инсан, шавхьсса насихIатчи, аькьлулул заллу, ДучIиннал шяраватусса Шамсуттиннул арс Аьзиев ЯхIъя.
ЧIивину уна нину-ппугу яла лавгун, чIярусса захIмат-жа­пашивурттугу хьунадаркьусса, цалва мюрщими уссу-ссурвавран нину-ппу бакъашиву кIул хьун къаритлай ивкIсса, хъинну чIарав ацIайсса инсан уссия ЯхIъя.
Оьрмулуву цанна аьркин дансса диялсса кIулшивурттугу ларсун, ЯхIъя зий ивкIссар ЦIуссалакрал райондалийсса идарарттай бусравну, лавайсса хIурмат-кьиматрай. ЯхIъяначIа чIяруя цаймигу сянатру, ва ия ка мусилсса, бакIрал пикри чаннасса, гьарзадрала усттар.
Жяматраву, лагма-ялттуначIа хIал бавкьусса, иминсса хасиятрал заллу, ххишала акъа лак ххирасса, авцIу кIану ххуй байсса ЯхIъя аьпа­лухьхьун лагаврил къумашивугу кIидачIлай, мунал уссу-ссурваврахь, кулпатрахь, гъан-маччанахь, щалвагу ДучIиннал жяматрахь жижара буллай буру.
Цув алжаннул ххари аннав, гьав нурданул дуцIиннав. Махънал оьр­мурдай барачат бишиннав. Амин.
ЯхIъянаха алхIам ккалаккисса, жула дянив му ххишала акъа бусравну ивкIсса дустал

——————————

ЯРАГЪИНАЛ АРС ЮСУПОВ КИРОВ
Ноябрь зурул 8-нний, чан-кьансса хIаллай къашавайгу хьуну, оьрмулул 77 шинаву ахиратрал хьунни хъинну хIал бавкьусса, дакI тIайласса инсан, Хьурттал шяравасса Юсупов Киров Ярагъинал ва Ххадижатлул арс.
Киров увну ур 1938 шинал февральданул 22-нний Хьурттал шяраву. Дянивмур даражалул школа къуртал байхту, увххун ур дуклан Дагъусттаннал шяраваллил хозяйствалул институтравун. Га къуртал бувну махъ, цуппагу марцIну ххювардай, тIайла увккун ур зун Элмулул техникалул институтравун элмийсса зузалану. Ди­ссертация дурурччуну махъ ивтун ур хъунама элмийсса зузалану. Цаппара шиннардива тIайла ув­ккун ур Шяраваллил хозяйствалул министерствалийн агьаммур отделданул хъунаманал кумагчину. Пенсиялийн увккун махъ зий уссия Аграрно-экономикалул колледжраву педагогну.
Чув зурчагу, ванал даврин лавайсса кьиматгу бивщуну, мадарасса грамотартту ва бахшишру дуллуну дур.
Киров ия хъинну ххаллил­сса кулпатчигу. НТИ-раву зий унува, цащалва архIал зузисса, ЧукIнатусса Чарандаева Жамсиратлух эшкьи хьуну, цанма бувцуну бур. ЦаннацIун цагу бавкьуну, цалва оьрчIругу щаллу бувну, гайннал оьрчIангу тарбия дуллай хъинну бавкьуну буссия. Ванал хIарачатрайну, оьрчIру марцIну лакку мазрай гъалгъа тIий бур. Аьпа биву, Киров оьрчIал оьрчIангу лахьхьин банна тIий уссия лакку маз, ччяни ахиратрал хьунни, амма Хьурттал ва ЧукIуннал жяматирттаву Киров ия хъинну хIурмат буну.
Киров Ярагъиевичлул бив­кIулул кьурчIишиву кIидачIлай, жижара буллай буру Жамсиратлухь, оьрчIахь, уссурваврахь, ссурваврахь ва цинявппагу гъан-маччанахь.
Кировлул рухI хъинний дишиннав, гьав нурданул лахъаннав, махънал оьрмурдай барачат бишиннав. Амин.
Хьурттал ва ЧукIуннал
жяматрал цIанияту Арбухан МахIаммадов

———————————

Душнил душ ПатIимат дакIнийн бутлай
Къашавай шаний хъунмасса хIал къабувну, августрал ахирданий аьпалухьхьун лавгунни, захIматсса азаруннища ххассал буван къавхьуну, нитти-буттал ца бакъа-бакъасса ттул душнил душ, ца шин хьусса оьрчIгу аьпалун кьаивтун.
ПатIимат бувссар Къизлардал шагьрулий МахIаммадов Зубайрдул ва Мамедова Рамелал кулпатраву. Ванил ппу Зубайр яруссаннал миллатрал инсан ия. Нину Рамела ттул, ЧIятусса Мамедова Басиратлул, душри. Най бунува гьарца чулинмай итххявхсса душ буссия. Школданий дуклай бунува, диндалул рукнардугу дуручлай байбивхьуна. Школа къуртал бувайхту, бувххун институтравун, мугу къуртал бувну, дахьва диплом лавсун буссия даврийн бухлай. Аллагьнал цачIанма лавсунни. ТIутIи ххуймурди риттайсса тIун бикIайхха. Ца-цассанналгу кьадиртсса дунниялли ва. Укун чивчуну бухьунссия ттул Фатишкан. Аьрщи-ссав аьтIи дунни жул хъамал кьамул бай ххуй душнил, зума авхънахь хъяй, бачира, буххира къатлувун тIийнма бикIайссия.
БивкIу цалли шайсса цумур бу­нугу. Я Аллагь, оьмур чивчуну къалякъиннав щинкIуй, оьрмулул къаувччуну цукIуй ахиратравун къагьаннав. Укун­сса бивкIу щинчIав нясив къабаннав. Ва хъамабитансса хъиншиву цукун хьунссар ттул Рамелан. Душнил оьрчI хъуна хьуну, ваная ва хъамабитансса хъиншиву ккакканнав.
Ва Фатишка яла лагаврил кьурчIишиву кIидачIлай буру ванил буттахь Зубайрдухь, ни­ттихь Рамелахь, уссурваврахь, ниттил ссурваврахь, махъсса цинявппагу гъанссаннахь.
Ттул Фатишкан алжан нясив баннав, гьав нурданул дуцIиннав, рухI чаннаний хьуннав, чурх бигьаний бишиннав.
Ниттил нину Басират
Мамедова,
ш. ЧIяйми
Барчаллагьрал чагъар
Августрал 27-нний жул душ аьпалул хьуну, жучIан къумашиву кIидачIин бувкIунни хIисав дуван къашайсса агьали районная, шагьрурдая, яруссаннал ва лакрал агьлу. Я Аллагь, жучIан бивзсса ша чирину хьуннав, дуниял тIитIиннав. ХъатIайн-хъиншивурттайн бакъа гьан нясив къабаннав. Укунсса бивкIу душманнанвагу нясив къабаннав.
Басират Мамедова,
ш. ЧIяйми

 
Душнил душнин хас бувсса шаммарду

Ттуруллул бувгьунни
КIюрххил ххяххабаргъ.
Силул ччуччин дунни
Жул хъункIултIутIи.

Дахьра хъякусса тIутIи,
Силул ччурччун ларгунни.
Щукру банну Аллагьнайн,
Ялун бувкI кьадарданийн.

Вих хьун бюхълай бакъару,
Ялун бив балаллуя.
Хъинну захIматсса щаву,
КъюкIлил дугьан къахъанай.

Хъунмасса шукру банну,
Ляхъан бувсса Аллагьнайн.
Укун ххаллилсса душ
Тарбия бан бювхъунайн.

Элму мунил дурккуна,
Диндалийн кIура бавна.
Вай яруссаннал агьлу
ХIайранну личIан бунни.

Ххарину бикIу, бавал,
Вила ххира душния.
Алжаннул агьулданул
Дянив цIана бушиврий.

Жабраил малаикнал
Хъаттиралу ябаннав.
Идавсил шафиаьтрал
Циняв ххари буваннав.

Ливасирал ххютулу
КIану гьартасса хьуннав.
Кавсар щаращул шинал
НахIала нясив баннав.

Аьрщи лаллай, дакI лаллай,
ДакIру лаяйссаритIар.
Аммарив къюкIлив къюву
ТакIуй къадукканссари.

Ниттин къабуллу оьрму,
Халид арснан булуннав.
Му ниттил барачатгу,
Халид арснавун гьаннав.

ДикIуча Фатишкай,
Вил гьаттай ххяхлай,
Халид куннасса,
ОьрчIисса тIутIив.

Мамедова Басират,
ш. ЧIяйми

Суратрай: МахIаммадова ПатIимат