ДР-лул Халкьуннал Мажлисрал Председатель Хизри Шихсаидовлул завардансса (призы) лачIун буккаврил тIиртIусса Щалвагу Аьрасатнал турнир хьунни октябрьданул 24-25-нний Буйнакскаллал райондалий Буглайннал шяраву.
ХIасан Аьдилов
Бяст-ччаллал наградарттал цIаний лачIун буклай бия 200-я ливчусса лачIунбуккулт Аьрасатнал циняв регионнаяту ва чIаххувсса республикарттаяту: Дагъусттаннаяту, Тюменнал, Ростовуллал областирдаяту, Краснодардал ва Ставрополлал крайрдаяту, Санкт-Петербурглияту, Ухссавнил АьсатIиннавату, Чачаннавату, Къабардин-Балкарнавату, Къарачай-Чаргаснавату, Азирбижаннавату, ТаджикIисттаннавату, Украиннавату ва Канаданавату.
Ва утти 12-мурну хъанахъисса турнир тIиртIунни шадлугърал тагьарданий. ТIитIаврий гьуртту хьунни Дагъусттаннал парламентрал спикер Хизри Шихсаидов, цаппара къуллугъчитал, личIи-личIисса даражалул депутатътал, Буйнакскаллал райондалул ва цаппара шагьрурдал ва районнал вакилтал, цIа дурксса спортсментал, спортрал ветерантал.
Турнир тIитIаврий бавтIминнахьхьун аьла-ссалам буллалисса махъ лавхъунни Буйнакскаллал райондалул бакIчи Малик Маликовлул. Ганал Хизри Исяевичлухь барчаллагь увкунни Буйнакскаллал райондалий спортрал давуртту лядуккан дуллалаврихлу.
Турнир тIиртIуну махъ республикалул каялувчинал цIанияту циняв спортсментал ва бувкIсса хъамал барча бунни ДР-лул ХIукуматрал Председательнал 1-ма хъиривчу Анатолий Карибовлул.
Махъру лавхъунни мукунма Аьрасатнал лайкь хьусса тренер, Азирбижаннал лачIунбуккаврил федерациялул вице-президент МахIаммад Аьлиоьмаровлул ва Аьрасатнал лайкь хьусса тренер, Ставрополлал крайрал командалул вакил Петр Саргасовлул.
Шадлугъралмур бутIуя махъ ккаккан дурунни кIанттул артистурал концерт. Яла байбивхьунни бяст-ччаллу 57,74 ва 97 килордал кIушиврий.
57 килорал кIушиврий ххув хьунни Къаяккантуллал райондалиясса Нариман Исрапилов. КIилчинмур кIану бувгьунни Къизилюртлиятусса Абу МахIаммадовлул. Шамилчинми кIанттурду бувгьунни Азирбижаннавасса Париз Ибрагьимовлул ва МахIачкъалалиятусса Рамазан Ферзаьливлул.
74 килорал кIушиврий ххув хьунни Хасавюртлиятусса Камал Маликов. Арцул медаль ларсунни МахIачкъалалиятусса Шамил ХIусмановлул. Шамилчинми кIанттурду бувгьунни МахIачкъалалиятусса Расул Шяпиевлул ва МахIаммад Иманшяпиевлул.
97 килорал кIушиврий мусил медальданун лайкь хьунни МахIачкъалалиятусса Тажуттин Мухтаров. Арцул медаль ларсунни Санкт-Петербурглиясса Станислав ХIажиевлул. Чарвитул заварду ларсунни Буйнакскалиясса Аьбдуссамад Аьбдусалимовлул ва Ухссавнил АьсатIиннавасса Сослан Хумаровлул.
Хъиривмур кьини ччалли буклай бия 65, 86 ва 125 килорал кIушиврий.
ЛяличIину тамашасса дия 86 килорайсса ччали буккаву, цанчирча ххув хьуманан пишкаш бан баян бувну бия «Фольцваген Поло» машина. Га кIушиврий ччалли уклай ия 38 лачIунукку. Ахирданий Даурен Куругълиев ххув хьунни МахIачкъалалиясса Аьлихан Жабраиловлуяр.
65 килорай ахирданий хьунабавкьунни Буйнакскалиясса Аьли МахIаммадханов ва Къаяккантлиясса Шихсаид Жалилов. Микку МахIаммадханов ххув хьунни 8:3 счетрайну.
125 килорай пьедесталданул яла лахъмур шачIанттуйн лахъан нясив хьунни МахIачкъалалиясса МахIаммадхIажи Нурасуловлун, МахIаммадхалил ХIусайновлуяр ххув хьуну 6:1 счетрайну.
Циняв ххув хьуминнан пишкаш бунни телевизорду ва дуллунни арцуйнусса наградартту — гьарцаннан 70 азарда къуруш, кIилчинмур кIану бувгьуминнан – 50 азарда къуруш, шамилчинмур кIанттухлу – 25 азарда къуруш.
Чемпионтурал тренертуран дуллунни гьарцаннан 50 азарда къуруш.
