Октябрьданул 19-21-нний МахIачкъалалив Къумукьнал театрданул сахIналий хьунни муниципал сакиншиндардил культуралул идарарттал – Аьрасатнал халкьуннал аслийсса культуралул центрдал дянивсса конкурс «Буттахъал традицияртту граждан агьалинал культуралуву» тIисса цIанилу.
Бадрижамал Аьлиева
Конкурс хьунни «Укрепление единства российской нации и этнокультурное развитие народов России» федерал целевой программалул лагрулий. Му проект щаллу дуллай бур ДР-лул Культуралул министерство, Республикалул Халкьуннал творчествалул къатта, культуралул зузалтрал ва идарарттал чIарав бацIаву, культуралул зузалал агьамшиву, сий ларай даву мурадрай.
Конкурсравух гьуртту хьунни республикалул шагьрурдаясса ва районнаясса творчествалул коллективру, ансамбллу, цивппалусса балайчитал, къавтIалт. Конкурсравух лайкьсса гьурттушинна дунни лакрал шаннагу райондалиясса коллективиртталгу. Гьарцагу Центрданул зузалтран аьркинну бия цанна личIи дурсса 20 минутIрал дянив ккаккан дуван цалла даву, халкьуннал аьдатру, багьу-бизу. Мукун, ЦIуссалакрал райондалул Аьрасатнал халкьуннал аслийсса культуралул центрданул ккаккан дунни ххуйсса программа. Центрданул директор Султанова Оксанал бувсунни цалла дурсса давурттая ва дуван дакIнийминнуя. Жюрилул члентуран буллунни ва конкурсрайну хIадур бувсса жуж (65 чIапIи), Центрданул дурсса давурттал барашиннану хъанахъисса суратирттащалсса. СахIналийн бувккунни фольклорданул коллектив «Дараччи», арамтурал квартет «Чаргудай» ва Аьлиевхъал кулпатрал ансамбль. ЦIуссаккуллал школданул 3-мур классрал дуклаки оьрчI Султанов Батирханнул дурккунни Совет Союзрал кIийла Виричу АхIмад-Хан Султаннуясса назму. Конкурсрал хIасиллу ттигу кIул хьуну дакъар, амма щак бакъар ЦIуссалакрал райондалулмур Центр республикалий хьхьичIунминнувух бушиврийн.
Конкурс нанисса гьантрай сахIналийн буклакиминнал гьунардан кьимат бишлай бия республикалий ва мунил кьатIув машгьурсса инсантал, культуралул аралуву зий цагу-кIирагу шин къадурсса.
Конкурсрал хIасиллу дурну, язиминнун ккалли бувсса коллективру гьуртту хьунтIиссар ноябрьданул 3-нний МахIачкъалалив Дагъусттаннал паччахIлугърал филармониялул гъинтнилмур майданнив хьунтIисса «Ттул Дагъусттан» гала-концертрай.
