ДР-лул Халкьуннал Мажлисрал Председатель Хизри Шихсаидовлул дунни парламентрал 55-мур сессиялий ххал бигьинсса масъалартту хIадур буллалисса батIаву.
ХI. Аьдилов
Парламентрал спикернал увкусса куццуй, 54-мур сессия ххуйну хьунни, амма цаппара масъаларттах къулагъас ххи дан аьркинни.
СМИ-рдай хъуннасса резонанс дунни аьрщарал реформалуцIун дархIусса законнал проектирдал. МуницIун бавхIуну цалчин дурккуну кьамул дурсса «О регулировании земельных отношений в Республике Дагестан» тIисса ва цаймигу аьрщарацIун дархIусса законнал проектру агьалинал ххал дигьин аьркинну дур, цалва пикри-зикрирду бусаншиврул. Миккун кIункIу бан аьркинну бур аьлимтал, СМИ-рду. Аграрий политикалул комитетрал председатель Жяъпарбаг Щамххаловлуйн тапшур бунни «ккуркки столлу» батIлан, парламентрал слушанияртту дуллан, телевизорданул передачартту дуллан, агьалинан аьрщарал реформалул мяъна-мурад бувчIин баншиврул.
Яла Хизри Шихсаидовлул депутатътурахь бувсунни 15 наблюдательная сакин хьусса Дагъусттаннал делегация гьуртту хьуну бивкIшиву Азирбижаннал Республикалул Милли Мажлисрал депутатътурал бувчIавурттай ноябрьданул 1-нний. Делегациялул члентал лавгун бивкIссар 2 шагьрулийн ва 3 райондалийн, хьунабавкьуну бур избирательтуращал, Дагъусттаннал диаспоралул вакилтуращал. БувчIавуртту ххуйну сакин дурну диркIун дур, ххуйну щаллугу хьуну дур.
Ганал, мукунма, бувсунни хIала-гьурттушиву гьарта дуллан аьркиншиву, хаснува агропромышленностьрал комплексраву, къатри дуллалавриву ва чIявусса цаймигу бутIраву.
Азирбижаннал чул хIадурну бур хIала-гьурттуну зун, цIакь дуллан аьркинни жулла дахIавуртту кIивагу чулийн мюнпатсса шартIирдайну.
ЦIанасса ппурттуву ДР-лул Халкьуннал Мажлисрал ва Азирбижаннал Республикалул Милли Мажлисрал дянив хIадур дурну дур уртакьну зузаврил Рязишиврул кьутIилул проект. Документрал проектрацIун бавкьуну бур Аьрасатнал МИД ва хъинчулий ккавккун бур АьФ-лул ХIукуматрал.
Хизри Шихсаидовлул бувсунни ноябрьданул сессиялий депутатътуран аьркинну бушиву цалчин дурккуну ххал дигьин 2016 шинайнсса республикалул бюджетрал хIакъиравусса закондалул проект. Бюджет чIурусса бикIан тIий бур, мунияту давугу захIматсса дикIан тIий дур циняв разделлаву.
БатIаврий ххал бивгьунни цаймигу масъалартту.
