Ноябрь зурул 6-нний МахIачкъалаллал Хъун мизитраву, нюжмар кьинисса вяъзалий, имам МахIаммадрасул Сааьдуевлул баян бунни МахIачкъалалив Ися Идавсил (аь.с) цIанийсса РувхIанийсса центр буван бакIрайн лавсшиву дагъусттаннал миллиардер Зиявуттин МахIаммадовлул. Му мизит буван тIий бур МахIачкъала ва Каспийск шагьрурдал дянив. Мизитрал гьанурду танийва цIакь бувссия жямат бувккун. «Жу биялсса хIарачат буварду му даву жуйнна ласун, агьалинал мизитрал гьанурду бивзссар, гихуннаймур даву жу дуллантIиссару», — тIий ур бизнесмен.

П. Рамазанова
Му Соборная мизит исламрал кIулшивур­ттал центр хьунтIиссар, му хъунмасса комплекс бикIантIиссар, тIий бур социал сетирдай бизнесменнал дувантIисса даврия цIарду дуллалими.
Шагьрулул властирдал му комплексран личIи дурссия газовиктурал райондалий, МахIачкъала-аэропорт шагьраххуллучIа, 20 гектар аьрщарал. Проект дурминнал бусаврийн бувну, исламрал университетрал корпусру, автомобильлан­сса паркинг, цимурца дикIан тIий дур микку агьалинан къулайсса куццуйсса ва ххуй­сса даражалийсса. Нюжмар кьинирдай мизитирттачIа машинартту бацIан був­ну хъунисса пробкардая шацI хьусса агьалигу бур, республикалул хъун мизит бувкун, чак буван ччими мивун занай, шагьрулувусса пробкардугу чан хьунссар тIисса умудрай. Бур, муданма кунма, школа бувссания, ччюрклилсса бувай завод бувссания, оьрчIансса садик бувссания тIутIиссагу. Садикру ва заводру булланшиврулли жура налогру дулайсса, мири аьркиннийн къадиллалисса. Рязийра чIявусса мизитру буваврил иман душиву исват къабуллалиссар тIутIиминнащалгу. Амма жулва къуллугъгу бакъар бизнесментуран, инвестортуран арцу чун ва ссан харж дулланссарив лахьхьин буллан.
Хъиндайдихьу дурсса Исламрал комплекс ва мизитгу хъинмунинсса хьуннав!