БакIрай бусанну инфляциялул хIакъираву паччахIлугърал статистикалул управлениялул ккаккиярттая. Му статистикалул органдалул интернетраву чивчумунийн бувну, Дагъусттаннай муштаритурансса багьри октябрь зуруй гьаз хьуну бур бувагу 0,9 процентрал, яни 1 процентралвагу ххи хьуну бакъар. 2015 шинал дайдихьулия шинмай мива багьри аьмну лавсун ххи хьуну бур анжагъ 13,7 процентрал.

ХIасан Аьдилов
Дукиялулсса личIину октябрьданий ххи хьуну бур бувагу 1 процентрал, шинал дайдихьулия шинмай тIурча – 10,5 процентрал.
Октябрьданий сельд (хIава) цIил щинавусса ххира хьуну бур 14,1 процентрал, ккунукру – 13,8 процентрал, варение, джем, повидло – 9 процентрал, консервартту дурсса ахънилсса (цIил щинавусса) – 7,9 процентрал, майонез – 6 процентрал.
Помидорду ва нисварти ххира хьуну бур кIийлва, лаччи – 9,1 процентрал. Мура чIумал кьюркьуну дур къур 8 процентрал, гьивхь – 7,9 процентрал, калан – 6,7 процентрал ва гьивч – 5,9 процентрал.
Му бакъассагу, статистикалул органдалул ккаккиярттайн бувну, аьнакIул дикI (аьнакIив) кьюркьуну дур 3,1 процентрал, чавахъ кьювкьуну бур 7,2 процентрал.
Къадукиялулми сурсатругу ххи­ра хьуну дур чан-кьансса. Масалдаран, арамтуннал касттунну ххира хьуну дур, статистикалул управлениялул ккаккиярттайн бувну, 13,4 процентрал. Пальто хъаннил интту-ссуттил лаххайсса – 9,4 процентрал, усру – 8,3 процентрал оьрчIансса ботинкартту – 6,7 процентрал.
Дарурттавату яла ххира хьумунин аллахол ва аспирин хIисавну бур, цалчинмур – 6,6%, кIилчинмур – 5,4%.
Утти буруганну ци тIий бурив Аьрасатнал статуправление. Мунил ккаккиярттайну, билаятрай инфляция хьуну дур гьашину 15-16 процентрал. МахIатталсса иш му бурхха, Дагъусттаннал статуправлениялун «хъамабивтун» бур оьлил дикI ххира шаврил процентрал хIакъи-хIисав дан. Оьлил дикI дия гьашину интту 240-250 къурушран кило, октябрьданий лархъуна 300-320 къурушран. Мигу хъанай дур 60-70 къурушрал ххира шаву, ягу 20-22 процентрал.
АьнакIул дикI гьашину интту дия 100-110 къурушран ца кило, цIана дур 130-135 къурушран кило, ягу 20-25 къурушрал ххира шаву. Чув дур кьюркьуну 3 процентрал?
Ккунукру ххира хьуну бур хIакь­ну 40-50 къурушрал. Интту бия клетка 120-130 къурушран, октябрьданий ккунукрал клеткалул багьа хьуна 160-180 къуруш. Цукунни кьювкьусса?
Лагавугу тамансса ххира хьунни. Гьашину интту лагаврил кило 230-250 къурушран диркIхьурча, октябрьданий хьунни 290-330 къурушран, хаснура Белоруссияналсса. Шиккува бусан, вай гьантрай жул даврил чIарав дур Белоруссиянал ярмукIа. Лагаврил кило дур шикку 430 къурушран! На бусав жучIара Белоруссиянал лагаву 330 къурушран душивуча, му Белору­ссиянал лагаву дакъахьунссар тIива даххул. Балугъгу ххира хьуну бур МахIачкъалалив сайки 50 процент­рал. Масалдаран, сом тIисса балугъ дукIу кIинттул бикIайва 150-180 къурушран килону, цIана бур 200-250 къурушран килону. Судакгу ххира хьуну бур сайки 100 къурушрал – цIана мунил кило дур базаллуву 250-300 къурушран. Мяйжанссар, сазан ляличIину ххира хьуну бакъар, цIана бур 150 къурушран, ганиву ххалаххив чIявусса буну тIий.
Помидор ххира хьуну дур сайки 100 къурушрал. ЦIана дахлай бур теплицардаву ххяххан дурсса помидор 100-150 къурушран ва ххишалассаннун килону. КIинттул ми дикIантIиссар 300-350 къурушран.
Гьа, хъамабитавай ливчIунни нисирал багьлул хIакъираву бусан. Базаллуву ккуллал нис дур 300-350 къурушран кило, амма так ца хъамитайпалучIа ккуллал нис дия 250 къурушран. Хъинну нахIуссагу, аьгъуссагу дур. Ялами нис ххира хьуну дур лапра. Яла кьюркьумур нис дахлай бур 280-300 къурушран, амма ми нисри чин къахьунссар.
Хъинну ххира хьуну дур бурчул усругу. Масалдаран, «Зенден» ттучандалий усру ххира хьуну дур сайки 100 процентрал. ДукIугума 2000-2500 къурушран диркIсса арамтуннал усру дур утти 3000-5000 ва ххишаласса къуруширттан.
Гьаннайсса, инфляция дуркьай хъунисса ххарххирдай най, амма харжру ва пенсияртту гьаз бансса пикри бакъар ттигу, кьукьирча бакъа.