Ноябрьданул 3-нний Москавлив ПаччахIлугърал тарихрал музейраву зий дайдирхьунни выставка «Дербент, Дагестан, Россия». Га выставка ккаккан увкIун ия Аьрасатнал Президент Владимир Путин.
Экспозициялуву бур 6 бутIа, миннувасса 5 бутIул буслай бур Дагъусттаннал тарихрал шиннардия.
Выставка дурну дур хронологиялул принципрайну, гьарца чIумул манзилданий ккаккан бувну бур ДарбантуллацIун бавхIусса ишру.
Аьрасатнал Президентнахь ми иширттая бувсунни П. С. ХIамзатовал цIанийсса изобразительный искусстварттал музейрал директор СалихIат ХIамзатовал.
Экспозиция ххал дуллалисса чIумал Дагъусттаннал БакIчинал Аьрасатнал Президентнахь бувсунни жучIара дузрайн дуккан дуллалисса приоритетсса проектирдая. Ганал мукъурттийн бувну, ляличIисса къулагъас дуллай бур «Обеление экономики» (экономика чаннайн дуккан даврил) проектрах.
«Му программалуву ккаккан дурну дур гьарца кьини ва гьарца шинал дансса давуртту. ХIакьину Дагъусттаннал экономика хьхьичIуннай шаврил бущилун хасну ва промышленность хьхьичIуннай шаврил индексрал чулуха хьхьичIунми кIанттурду бугьлай бур. ХьхьичIва районнал ва шагьрурдал бакIчитал экономикалуха зий къабивкIун бур. Утти му хъанахъиссар миннал даврил ца яла агьаммур чул, на гьарца зуруй ххал буллай ура, циксса налогру дукIлай дурив ва экономика цукун лядуклай дурив районнай ва шагьрурдай», — увкунни ДР-лул БакIчинал.
Выставка ххал дурну махъ Владимир Путиннул ихтилат бунни элмийсса, культуралул, диннал ва жяматийсса организациярдал вакилтуращал.
«На зухь барча чин ччай ура Дарбантуллал юбилей. Шагьру хъинчулийнмай баххана хъанай бур, республикалийгу дахханашивуртту хъанай дур. Му цинявннан чIалай бухьунссар. На цалчин тиккун увкIсса чIумал Нарын-Къала къаххуйсса тагьарданий бия, утти ххуй хъанай бур», — увкунни АьФ-лул Президентнал.
Мунищала архIал В. Путиннул бувсунни чIявусса затру Дагъусттаннай ялапар хъанахъисса инсантурайн хъар хъанахъишиву. Ганал мукъурттийн бувну, дагъусттанлувтал хъинну пагьму бусса, цалла дуллалимунийн, цалла республикалийн дакI тIайласса инсантал бур, муния цинявннан хъинну кIулли. ЦIанасса ппурттуву халкьуннан цуксса захIматнугу, республикалий хьхьичIуннайшивуртту хъанай дур, тагьар ххуй хъанай дур. Му ххари хьунсса ишри.
ПаччахIлугърал бакIчинал махъ буллунни Дарбантлив учIан.
Выставка ххал дурну махъ, Рамазан АьбдуллатIиповлул выставкалий хьусса цалва асардая бувсунни журналистътурахь.
Выставка тIитIаврий гьуртту хьунни ДР-лул ХIукуматрал Председательнал 1-ма хъиривчу Анатолий Карибов, Аьрасатнал ПрезидентначIасса ДР-лул муданмасса вакил Зумруд МухIуттинова ва цаймигу.
ХIадур бувссар ХI. Аьдиловлул
