Райондалул циняв шяраваллавусса дяъвилий жанну харж дурсса вирттавран хас дурсса гьайкаллал лагмасса кIанттурду марцI бунни школалул оьрчIал. Хъиннура ххуй дурну, лагмасса чарттайхгума сир бувккун, дакьин дунни 1-мур ЦIувкIуллал школалул оьрчIал цала шяравусса АхIмад-Хан Султаннул гьайкал.
ХIажимурад ХIусайнов
Райондалийсса шяраваллавусса бугьарасса ветерантурал шаппай лавгун, оьрчIал гайннан кумагру бунни. Школардайсса тарихрал дарс дишайсса учительтурал АхIмад-Хан Султаннул оьрмулия бусласисса дарсру дирхьунни. ЧIявуми школалул оьрчIал цалва классруктуращал тIутIив дирхьунни Ваччавсса гьайкалданул хьхьичI. Школардай дунни спортрал турнирду Виричунан хас дурсса. Школалул оьрчIал чирчуссар АхIмад-Хан Султаннун хас дурсса сочиненияртту, ляхъан бувссар шеърирду, дирхьуссар суратру. Вай давурттаву ххув хьунни, сочинение чирчуну, 1-мур ЦIувкIуллал школалул 7-мур классраву дуклакисса Ванатиева Залина, шеъри чичавриву – ЧIяйннал школалул 9-мур классраву дуклакисса СутIаева Гуржигьан.
