Ахъушиял райондалий хьунни Миллатирттал политикалул министерствалун 25 шин шаврин ва Аьрасатнал цашиву цIакь даврил цIанийсса федерал программалуву «Куначество» проект зузи даврин хас дурсса Хъамаличунал кьини.

Зулайхат Тахакьаева
Муний гьуртту хьунни ДР-лул миллатирттал политикалул министр Татьяна Гамалей, Ахъушиял райондалул администрациялул бакIчи АхIмад МахIарамов, Аьхьхьахъиял райондалул бакIчи Исмяил МахIаммадшарипов, Лакрал райондалул администрациялул бакIчинал хъиривчу Соня Макьаева ва цаймигу районнаясса делегацияртту, министерствардал, магьирлугърал ва кIулшиву дулаврил идарарттал каялувчитал ва зузалт, проектраву гьурттусса дуклаки оьрчIру ва миннал нитти-буттахъул.
Мероприятие тIитIлай, Татьяна Гамалейл цилва ихтилатраву кIицI лавгуна хъамаличушиву Ухссавнил Ккавкказнаву ца яла хьхьичIарасса аьдат душиву, му аьдатрал халкьуннан кумаг байсса бивкIшиву ккаши бусса дяъвилул шиннардий бакI буккан.
— Хъамаличушиву – му укун­на­­сса дусшиву дакъар, му ля­личIисса дусшивур, мунил цала гьалмахчу-хъамаличунай хъуннасса тIалавшинна дихьлахьиссар, — увкуна ванил.
Шадлугърал тагьарданий кувннащал кув кIул бувна хъамал кьамул буллалисса кул­патру. Лакрал райондалия ва проектраву гьуртту хьунни Гьун­чIукьатIрал шяравату­сса Къушиевхъал ва ТIагьировхъал кулпатру. Ахъушиял райондалиясса АьбдулхIалимовхъал кулпатрал кьамул унни Нариман Къушиевлул оьрчI НухI. Юсуп ТIагьировлул кулпатрал кьамул унни Ахъушиял райондалиясса АьбдулхIалимовхъал кулпатравасса оьрчI МахIаммад.
Соня Макьаевал вай кулпатирттал буттахъахьхьун буллунни «Хъамаличунал кодексру», оьрчIахьхьун – цивппа кьамул бувсса кулпатирттаву цукун къу­ццу тIун аьркинссарив бусласисса программартту.
Вайми районнаясса кулпатир­тталгу мукунма кьамул бувна проектирттаву гьуртту хъанахъисса оьрчIру. Бувсуна миннал оьрмулия ва дуккаврия, ми ялапар хъанахъи­сса шяраваллая, районнал тарихрал ва магьирлугърал ирсирая.
Проектраву гьуртту хъанахъиминнан Татьяна Гамалейл буллуна Дагъусттаннал миллатирттал политикалул министерствалул чулухасса барчаллагьрал чагъарду.
Мероприятие къуртал дурна Ахъушиял ва проектраву гьуртту хъанахъисса районнал магьирлугърал зузалтрал концертрайну. Лакрал райондалул магьирлугърал зузалтрал увкуна аслийсса лакку балайрду, ккаккан дуруна лакку къавтIавуртту.
Муния махъ хъамал гьуртту хьу­на «Хъамаличунал миллат къа­бикIайссар» тIисса темалун хас бувсса дискуссиялий. Школарттал дуклаки оьрчIал, студентътурал ва администрациярттал вакилтурал цачIу ххалбивгьунни проект гихуннайгу хьхьичIуннай даврийн, Да­гъусттаннал аьдатру ва магьирлугъ ядаврийн багьайсса суаллу.
Районнаясса хъамал ялагу гьуртту хьунни спортрал бяст-ччал­­лавугу. Лакрал райондалул спорт­рал хьхьичIунсса пишакар Малик ХIусмановлул каялувшиндаралу жулва оьрчIал бувгьунни 1-мур кIану. ХьхьичIунсса кIанттурду бувгьунни Гъумучиял лицейрал 10-мур классрал дуклаки оьрчIру Давуд МухIадовлул ва Ситтикь МахIаммадовлул, Гъумучиял школалул 10-мур классрал дуклаки оьрчI Рамазан Алхасовлул. Ххув хьуминнан дуллунни грамотар­тту.