ЦIуссалакрал райондалул делегациялул бакI дургьуну бия райондалул хъунама ХIажи Айдиев ва ДР-лул бакIчинал вакил Аьлибек Аьлиев. Делегациялуву бия ДР-лул Халкьуннал Мажлисрал председатель Зайнулла Мирзоев, Жяматийсса советрал председатель Магьди Оьмаров, Финансирттал управлениялул хъунмур Зарганат Гъазибуттаева, администрациялул аппаратрал хъунмур Султанат Цунтаева, Жагьилтурал политикалул комитетрал вакил Заур МахIаммадов, Культуралул управлениялул хъунмур ХIабибат Буттаева, субсидиярттал отделданул хъунама Амир Галбацев, ЦIуссачIурттащиял шяраваллил бакIчи Мовледин Исламаьлиев.
Андриана Аьбдуллаева
Сакскаллал райондалул Культуралул Дворецраву шадлугърал даражалий тIиртIуна райондалул ХIурматрал ула, лахъа-хъун бувна райондалул цIа бюхттул дуллалисса хьхьичIунсса инсантал. Цинявппагу хъамал барча буллалисса ихтилат бувна райондалул администрациялул хъунмур Галина Мирошниченкол ва райондалул советрал председатель Николай Россоловскийл. Юбилейрайн мукунма бувкIун бия Приморскаллал, Ленинградуллал ва Курскаллал областирдал делегациярду.
ДР-лул БакIчи Рамазан АьбдуллатIиповлул цIания Сакскаллал жямат барча буллалисса ихтилат бувна Аьлибек Аьлиевлул.
Мукунма Дагъусттаннал цIанияту жямат барча буллалисса ихтилат бунни ХIажи Айдиевлул.
— Жунма цинявннан кIулли махъсса чIун Къиримнал агьулданун захIматсса диркIшиву. Зу цIуницIакулгу Аьрасатнавух хIала буххаврия хъинну ххариссару. Зул аьрщарай паракьатшиву хьуннав, барачат ликканнав тIий ура, — увкуна ХIажи Айдиевлул.
ЦIуссалакрал райондалул чулуха Сакскаллал райондалул администрациялун дуллуна дакIний личIансса бахшишру. Гихуннайсса шадлугърал мажлисру нани бувну бия «Золотая рыбка» тIисса гостиницалий. Гиккугу хьунни «Сельские подворья» тIисса ярмаркартту. ТIивтIуну бия миллатирттал дукрардащалсса майданну.
ЦIуссалакрал райондалул майдан ляличIинува чIюлусса ва авадансса бия. Байрандалийн бувкIминнаща ккаккан бюхълай бия Дагъусттаннал миллатрал лаххи-ликкия, каруннах щавшсса хьхьичIазаманнул халичартту, тIаннуя дурсса кьай-кьуй, бархъаллал тIахIунттив, арцу-мусил чIюлушиннарду, цIа дурксса Дагъусттаннал конъякру ва чахирду, Дагъусттаннал халкьуннал дукрарду.
Тамашачитуравун гьавас бутлатисса къавтIавуртту ккаккан дуруна ЦIуссалакрал райондалул искусствалул школалул «Эдельвейс» ансамбльданул. Къиримнал агьулданун ляличIину ххуй бивзуна ДР-лул лайкь хьусса артистка ХIабибат Буттаевал увкусса лакрал халкьуннал балайрду. Концертрал программа най дия хьхьудяризаннин, чIун чIалсса дунугу, инсантал ппив хъанай бакъая.
Ва аьрххилул лагрулуву ЦIуссалакрал райондалул делегация Сакскаллал райондалул жяматращал бивунни Геройское тIисса шяравун, 9 Совет Союзрал Виричунан дацIан дурсса мемориалданул комплексрачIан. Ми Вирттавравух ур жула дагъусттанчу МахIаммад-Загьид Аьбдулманаповгу. ЦIуссалакрал райондалул делегациялущал архIал мемориалданучIа тIутIив дишин бувкIуна Ленинградуллал ва Курскаллал областьраясса хъамалгу.
Шадлугъру къуртал шайхту, Ялта шагьрулул зума-къирагърай хьуна АхIмад-Хан Султаннул цIанийсса Дунияллул даражалул боксрал турнирданул финал.
Хъирив ЦIуссалакрал райондалул делегация лавгунни Алупка тIисса Къиримнал шагьрулийн. Ми бивуна кIийла Совет Союзрал Виричу АхIмад-Хан Султаннул цIанийсса музейравун. Микку хъамаллурахь гьарта-гьарзану бувсуна АхIмад-Хан Султаннул оьрмулия ва мунал виричушивурттая. Ихтилатру къуртал хьуну махъ Виричунал гьайкалданучIа дирхьунни тIутIив.
Ва аьрххилий ЦIуссалакрал райондалул делегациялущал бувкIуна Къиримнавусса Дагъусттаннал диаспоралул вакилталгу.
Ва аьрххи кIирагу райондалун мюнпат бусса хьунни. Уттиния тихуннайгу дусшиву дачин дансса, хIала-гьурттуну бикIансса кьутIирду дунни.
