Октябрьданул 2-нний Ваччавсса Аьрасатнал халкьуннал аслийсса культуралул центрданул залдануву хьунни райондалийсса школардал дуклаки оьрчIал дянивсса «Очаг мой – родной Дагестан» цIанилусса конкурс. Конкурс хIасул хьуну дия шанна номинациялия: фольклорданул зумунусса къавтIаврия,
балай учаврия, музыкалул инструментирттай макьан дуцаврия. Конкурсраву бикIантIишиву бувсуна, гьашину Хъун дяъвилий Ххувшаву ларсун 70 шин бартларгун духьувкун, га байрандалун хас бувсса балайрду ва къавтIавуртту.

КIунурду бивчусса хIасиллайн бувну, цалчин сахIналийн бувккуна 2-мур ЦIувкIуллал школалул кIива душ. Вайннал «Катюша» балай увкуна. Хъирив сахIналийн бувккуна Ккуллал 2-мур школалул коллектив. Вайннал оьрчIру гьуртту хьуна шанмагу номинациялий. Ккаккан дурна фольклорданул зумунусса къавтIаву, увкуна балайрду ва Оьмаров Саэдлул дачIулий личIи-личIисса макьанну рурцуна. Хъирив сахIналийн бувксса СумбатIуллал школалул кIива душнил къавтIаву кка­ккан дурна. Ваччиял школалул оьрчIал ккаккан дурна «Бартукь» цIанилусса къавтIаву ва гьуртту хьуна балай учавриву. ЧIяйннал школалул душварал ккаккан дурна, варакъивгу хъарай бивхьуну, щинав нанисса фольклорданул зумуну­сса къавтIаву. Увкуна вайннал шанма душнил аьралий балайгу. ЦIуйшиял школалул душварал ккаккан дурна фольклорданул зумунусса къавтIаву ва цу­ппалусса ца душнил «ЧIавасса дачIучи» тIисса балай увкуна. Вихьуллал школалул душварал ккаккан дурна чIиви оьрчI цалчин кIанттуву бахIайсса аьдат. Гьуртту хьуна вайннал школалул оьрчI макьанну руцаврил номинациялийгу. Ванал ца-кIира макьан рурцуна синтезаторданий. Мирзаева Изал Расул ХIамзатовлул «Кьурукьру» балай увкуна. Къяннал школалул душнил «Катюша» балай увкуна. Хъювхъиял школалул коллективрал цал «ЩаращучIасса къавтIаву» тIисса хъярчийсса балай увкуна, яла ккаккан дурна фольклорданул зумунусса къавтIаву. Увкуна мукунма цувалусса оьрчIал «Смуглянка» балайгу. Хъусращиял школалул коллектив гьуртту хьуна шаннагу номинациялий. Ккаккан дурна фольклорданул къавтIаву, «Кьурукьру» балайлущал хъинну сантиравун дуртсса къавтIаву. ОьрчIал рурцуна дачIулий личIи-личIисса макьанну. Хъюйннал байбихьулул школалул оьрчIалгу увкуна «Катюша» тIисса балай.
Ахирданий, жямру дурсса чIумал, кIул хьуна цумур школалул цумур кIану бувгьуссарив. Фольклорданул къавтIавриву: 1. Ккуллал 2-мур школа. 2 ЧIяйннал школа. 3. Ваччиял школа. Балай учавриву: 1. Хъювхъи. 2. Хъусращи. 3. Вихьул. Макьан руцавриву: 1. ЧIяйми. 2. Ккуллал 2-мур школа. 3 Вихьул.
Конкурсравух хIарачатрай гьуртту хъанахъиминнангу буллуна дипломру.
Шиккува кIицI буван ччива ттулва ца пикригу. Укуннасса конкурс дурна инттухуннайгу. Вай конкурсру цаннил чIарав ца дирхьусса чIумал, чIалан бивкIунни инттухуннай дурмур конкурс ххуйну хIадур дурну диркIшиву. Ялагу конкурсирттаву хIисав хъанай бия гайва гай балайрду гьарцаннал тIутIаву. Ва иширал ялув УО-лул, конкурс дайдишиннин хьхьичI школардал завучтуращал хьунабавкьуну, кIул буллан багьлай бухьунссар цумур школалул цукунсса балай учинссарив, ци къавтIаву ккаккан дуванссарив. Акъарив конкурсру ца балайлул, гайра гай къавтIавурттал конкурсирттайн кIура даллай дур. ТIайлабацIу буваннав.