Сентябрьданул 29-нний Ккуллал райондалул администрациялул батIавуртту дай залдануву бунни Дагъусттаннал МЧС-рал учебный центрданул преподавательтурал дарс дирхьусса семинар.
Семинар бачин бувну бия кIицI бувсса центрданул зузалт Жабраилов Ризван ва Давудов Залимхан. Вайннал семинар-совещаниялул темалун цIа дия «Принцип защиты и способ защиты населения от ЧС в быту и природных катастрофах» тIисса. Семинарданий гьуртту хьун ва вичIи дишин оьвкуну бия райондалийсса школардал завучтурайн, оьрчIал багъирдал бакIчитурайн, ххисса кIулшиву дулайсса идарарттал хъуниминнайн, школардай ОБЖ-лул дарс дишайсса учительтурайн, 1-4-ми классирттаву дарсру дишайсса учительтурайн. Семинар-совещание бачин бувну ия Ккуллал райондалул администрациялул ГО ва ЧС-рал отделданул бакIчи Кьурбайтаев Ажуб.
Гьарта-гьарзану сайки кIира ссятрал лахъишиврий МЧС-рал зузалтрал залданувун бавтIми кIул бувуна цукунсса тагьарданий дуссарив Дагъусттаннайсса инсантал буруччаврил даву. Такну гьарца бала-апатI къахьун битаншиврул ва хьуну махъ (ца-ца чIумал тIабиаьтравуми апатIру инсаннайн хъарну къабикIайхха) цукун инсантал буруччин аьркинссарив бувчIин бувуна. Муданмагу цалчинмур кIанай бикIан багьлагьишиву бувсуна, бюхълахъисса куццуй, инсаннал оьрму ябувансса чаранну лякъин.
Аьщуйн щун буллай, бувсуна вайннал бала-апатIру ялун бивсса чIумал цукун буручлан аьркинссарив ва ГО ва ЧС чулуха цукунсса кумагирттах ялугьлан аьркинссарив. Бувсуна цаймигу хъинну чIявусса оьрмулуву хьунабакьин бюхъайсса затру.
Хъамаллурал бавтIминнал буллусса суаллахьхьунгу жавабру дуллуна.
