Гьар шинах кунна, гьаши­нугу Сочи шагьрулий хьунни щалагу Аьрасатнал журналистал бавтIсса прессалул байран.

Качар ХIусайнаева
Муданма кунма, гьашинугу бия-биялсса делегация буссия фестивальданийн Дагъусттаннаягу. Мудан куна, Дагъусттангу, дагъусттаннал прессагу ххуймур чулуха ккаккан бан хIарачатрай щуруй ия Дагъусттаннал Журналистурал союзрал хъунама Аь. Камаловгу, дагъусттаннал СМИ-рдал хъунимигу. Дарбант шагьрулул юбилейрал шин духьувкун, ччай бия му темагу Сочилийсса фестивальданий яргну ва ябацIанну кIицI лаган. Мунийн бувну чIумуйра хIадур дурну дия кIира мадарасса лагрулийсса баннер, Дарбант шагьрулул усттарну рирщусса суратирттал чIюлу дурсса. Дагъусттаннай махъппурттуву итабавкьусса луттирдал, цинявппагу кказитирттал чIюлу бувну бия жунма ккаккан бувсса фойе. Дагъусттаннангу, Ккавкказуллал СМИ-рдал дард-хажалатирттан ва ххувшавурттан хас дурну ккаккан дурну дия ца щаллу-ккурккисса кьини. Яла-яларив, циняв мякьну бия, программалуву кIицI лавгсса, Дагъусттан Республикалул БакIчи Рамазан АьбдуллатIиповлул фестивальданий лахъантIисса, мудан кунма, пасихIсса ва яргсса мукъух вичIи дишин.
Гьашинусса фестивальданул цIа – лозунг дия «Вся Россия». Мяйжаннугу, гьар билаятрал кIанттавату бавтIун бия журналистал. Бия хъамалгу. Утти дазул кьатIалу хьусса Къазахъис­ттанная бия унгу-унгуну хIадур хьуну бувкIсса делегация. Дия вайннал кинорду. Документалгу, исвагьи журалулгу. Дия эмаратсса полиграфиялул хъусру. Бия Къазахъисттаннай махъ ппурттуву тIутIайх дирчусса туризмалиясса мунил ишбажаранчитурал хаварду. Хъамал бия Болгарнава бувкIсса, хьхьичIарасса дусшиврух мякьсса. Арманинал журналистуралгу гьан дурну дия уттизаманнул оьрмулун хас дурсса кино фестивальданун ссайгъатран. Амма яла язими хъамалну хъихъи лавсун бия Къиримнава, Симферополь, Севастополь шагьрурдая бувкIсса, цIунилгу гъирарай Аьрасатнал журналистурал давривух хIала бухлахисса журналистал. Ссайгъатран вайннащал архIалгу бия цIанихсса балайчитурал коллектив.
Москавлия биялсса цIанихсса журналистурайн оьвкуну бия цанма-цанма хасъсса лекцияр­тту буккин, журналистуращал агьамсса бяст-ччаллай хьунабакьин. Гьарца кьини ххюва-ряхва залданувун батIлай бия Москавуллал цIанихсса ва машгьурсса журналистурал лекциярдах вичIи дишин. Ва ппурттух Аьрасатнал Журналистурал союзрал хъуниминнал хъунмасса захIмат бивхьуну бия фестивальданийн Москавлия тIалав бан хъунисса къуллугъчиталгу, архния бувкIсса журналистуращал пресс-конференцияртту буван. Цурдара ва фестивальданул яла агьаммур тема дия коррупциялущал ва контрафактсса продукция дуллай дахлахиминнащалсса талатаву. Микку бан шайсса ва буржлувсса журналистурал кумаграя, хIала-гьурттушиврия. «Дагомыс» гостиницалул ххишала бакъа гьарта-гьарзасса ва чаннасса фойе чIюлу бувну бия гьарцагу регионал прессалул баннердал выставкардал. Ураллая, Ссибирнава бувкIми журналистурал цанна хасъсса яннарду, пурмарду дия, цивппа гьарнал итталун багьаншиврул. Тобольск шагьрулия, масалдаран, 25 журналистнал бригада бия цалла лишаннащалсса футболкардаву, мудан архIал заназисса. ЦачIун бавтIун, цалва пишалун хасну цалва ляхъан бувсса балайрду тIутIисса. Цив­ппа ца кулпат кунмасса, цаннал ца бувгьусса бушиву чIалачIи буллалисса.
Амма, хъунма махъ бакъар, циняв гъирарай ялугьлай бия Дагъусттанналмур даву дайдишиннин. Жулламур мероприятиялийн кунма, чIявусса халкьгу царагу цамур батIаврийн къабувкIуна. Я уттинин къабатIайва. Гьай-гьайкьай, учинссар тикку мудан Аьли Камаловлул ва ванал дустурал хIарачатрайну гьарцагу аьрасатнал инсаннан ххирасса къизлардал коньякрал ва дугърину (?) тIивтIусса ссупралул ишгур куну. Амма халкьуннан кIулну ччай бия Дагъусттаннай хъанахъисса иширттая, коллегахъал оьрмулия, даврия. Жух бурувгун, жулва багьу-бизулия цанма бувчIлачIимур жухь аьч буллай бия.
Ккаккан дурсса ссятраву жулла республикалул БакIчи Рамазан АьбдуллатIипов учIайхтурив, жун ккаккан бувсса зал шапI куну бувцIуна. Цанма вардишсса журалий хъярч- махсарардугу хIала буллай, яргну ва усттарну сайки кIира ххишалагу ссятрай бувсса жула бакIчинал ихтилатрал циняв хIайран бувна. Ихтилатрая мукьахгу журналистал лагма лавгун, автографру тIалав дуллай, цалла-цалла республикарттаясса ссаламру буслай, цалва-цалва луттирду пишкаш буллай, цанма ванал махъ хъинну ххуй бивзшиву буслай, итакъаакьавай, хъинну лахъи лавгуна. АьбдуллатIипов лавгун мукьахгу журналистал жучIан гъан хъанай, цивппа хIайран хьуну бушиву буслай бия. ДахIалай бакъарив укунсса бакIчинал чIарав цIакьлин бацIан тIий бия. Жухсса бургаву хъиннура, учиннуча, ттюнгъасса дия.
Дагъусттан Республи­калул БакIчи Рамазан Аьбдулла­тIиповлул Аьрасатнал журналистурал фестивальданий лавхъсса махъ буккияра «Илчилул» хъиривмур номерданий.