Октябрьданул 13-нний Нальчик шагьрулий Аьрасатнал Террорданийн къаршисса комитетрал председатель, ФСБ-лул директор Александр Бортниковлул каялувшиврулу хьунни НАК-рал ярглийсса заседание. Тикку ххалбивгьунни цаппара агьамсса масъалартту.
Заседаниялий гьуртту хьунни НАК-рал члентал, АьФ-лул Президентнал СКФО-райсса вакил Сергей Меликов, СКФО-равун бухлахисса субъектирдал бакIчитал, федерал органнал исполнительный властьрал каялувчитал ва жаваблувсса зузалт, ихтиярду дуруччай органнал ва спецслужбардал вакилтал.
Александр Бортниковлул дакIнийн бувтунни хъуннасса нигьачIаву диян най душиву дунияллул халкьуннал террорчишиву чялишну къуццу тIутIаврия. Ганал мукъурттийн бувну, «Исламрал паччахIлугъ» тIисса террорчитурал кьюкьлул, Баргълагавал чулийсса билаятирттал баччибакъашиву дурну, Гъанмур Востокрай дяъви сукку бунни. ИГИЛ-данул кьюкьри муданна щаллу дуллай дур, цIакь дуллай дур цалла луртаннал ва арцул базардал, цалва асарду ппив буллай дур чIаххувсса регионнайн.
Мунийн бувну дунияллул халкьуннал уртакьну му террорчишивриясса нигьачIаву духлаган даву – хъинну агьамсса масъала хъанай бур. Мунил тIалав буллай бур циняв террорчишиврийн къаршисса гужру цачIун баву, террорчитурал инфраструктура духлаган даву, Сириянал закондалийнусса хIукуматран кумаг баву радикалтуращалсса талатавриву.
НАК-рал председательнал бувсунни чан хъанай душиву СКФО-рал субъектирдаву террорчитурал къуццу тIутIаву. Гьашину 9 зурул мутталий, дукIумуних бурувгун, 3-лла чан хьуну бур террорчитурал ишру. Сайки 4-ва гьарза хьуну бур ми иширттая ябуцан бувми.
Мунищала архIал, А. Бортниковлул мукъурттийн бувну, региондалий тагьар чIурунна личIлай дур ттигу. Аьркинну дур террорчитураясса нигьачIаврил хьхьичIалу кьукьинсса чаранну ттинияр тихунмайгу гужлан буван, миннал кумагчитурал база ссуссукьу буллан, дазул кьатIату Ухссавнил Ккавкказуллал аьрщарайн, тагьар оьлукъин дуллалисса хIарачатирттал хьхьичIалу кьукьлан.
НАК-рал заседаниялий ххалдиргьунни мукунма жулва билаятрайн дазул кьатIату арцу тIайла дуклакисса ххуллурду лакьаврин хасну федерал органнал дуллалисса давурттал хIасиллу.
Ахирданийгу ккаккан дунни террорчишиврул иширттайн къаршину дуллан аьркинсса давуртту, оперативсса ва дунияллул халкьуннал дянивсса тагьаргу хIисавравун ларсун.
