Октябрьданул 11-нний Ккуллал райондалийн Хъузалал кьини хъун дан увкIун ия ДР-лул ХIукуматрал Председательнал хъиривчу Шарип Шарипов, ДР-лул Шяраваллил хозяйствалул министерствалул управлениялул хъунама Шагьимардан Мудуев ва цаймигу.
ХIасан Аьдилов
Ккуллал райондалул бакIчи Сяид Сулаймановлущал архIал хъамал гьуртту хьунни Хъузалтрал кьинилун хас дурсса совещаниялий.
Миккун бувкIун бия мукунма шяраваллал бакIчитал ва хозяйстварттал каялувчитал. Совещаниялий ххал бигьлай бия райондалул АТК-лул масъалартту.
БакIрай ихтилат буллай, Ш. Шариповлул бувсунни Дагъусттан гьуртту хьуну бивкIшиву «Золотая осень-2015» тIисса Аьрасатнал выставкалий, республикалул ларсун душиву Гран-при ва чIярусса наградартту, конкурсирттай гьуртту хьуну.
Ганал бувсмунийн бувну, Дагъусттаннал экспозициялийн бувкIун бур чIявусса хъамал, миннавух – федерал министерстварттал ва ведомстварттал каялувчитал, регионнал бакIчитал ва цаймигу. Ми циняв рязину бивкIун бур жулла экспозициялий ккаркмуний.
Ш. Шариповлул увкусса куццуй, Дагъусттаннал агропромышленностьрал комплексраву хьхьичIуннайшивуртту хъанай дур. Муниву лайкьсса кIану бугьлагьиссар цайми районнащал архIал Ккуллал райондалулгу. «Зул район, республикалул ца яла агьаммур аграрий район хIисаврай, лайкьну гьуртту хъанай дур чIярусса республикалул АПК-лул проектирдаву. Ттул пикрилий, ми проектру дузрайн дурккун махъ ххуйсса хIасиллу хьунссар шяраваллил хозяйствалул чIяруми бутIраву», — увкунни ганал.
Совещаниялий ххал бивгьунни шяраваллил администрациярттаву хозяйстварттал учетрацIун бавхIусса, инвестициярду дучIан даврицIун ва шяраваллал чIалачIин ххуй даврицIун бавхIусса масъалартту.
Байрандалийн Ваччав бувкIун бия щалла райондалул ва чIаххувсса районнал захIматкаштал, цалла-цалла дукиялул сурсатирттащал ярмукIалий даххан.
Дагъусттаннал БакIчи Рамазан АьбдуллатIиповлул цIанияту Ккуллал райондалул захIматкаштал барча бувна вице-премьернал.
Выставка-ярмукIа дуллалисса кIанай райондалул культуралул къатрал артистурал ккаккан дуруна байрандалун хас дурсса ххуйра-ххуйсса концерт.
Ва байрандалиясса гьарза-гьартамур макьала дуккантIиссар хъиривмур номерданий
