Сентябрьданул 28-нний Дагъусттаннал БакIчи Рамазан АьбдуллатIипов гьур­тту хьунни ДР-лул Халкьуннал Мажлисрал 53-мур сессиялий.

Парламентрал фракциярттал вакилтурал ихтилатру къуртал хьуну махъ Рамазан АьбдуллатIиповлул бувсунни гьаз бувсса масъалартту агьамсса бушиву ва миннул буруккин инсантуралгу буллай бушиву.
Мунил хIакъираву ганал ХIукуматрал Председательнайн ва Халкьуннал Собраниялул Председательнайн тапшур бунни ятинсса оьрчIру къатрал щаллу баврил бутIувусса тагьарданул анализ дуван ва му программа бакIуйн дуккан дансса чаранну лякъин.
Рамазан АьбдуллатIиповлул мукунма бувчIин бунни депутат Ражав Фикретовлул гьаз бувсса, ТIиляратIиял ва РутIуллал районнал дянив ххуллу баврил хIакъиравусса масъала. Га ххуллу бан аьркинну бур дурагу 27 километралийх. Республикалул каялувчинал ДР-лул ХIукуматрайн тапшур бунни га масъалалуха зун.
Рамазан АьбдуллатIиповлул пикрилий, чIаххувсса паччахIлугъращалсса дазул бутIуву хIала-гьурттусса давурттал хIа­­силлу чIалай дакъар: «Тикку сайки ци­чIав дуллай бакъар. Азирбижаннащал хIала-гьурттусса проектру дакъар. Жура ишла къадуллай буру жулла географиялул хIалкьазия ва 5 паччахIлугъращалсса чIаххувшиву».
Уттигъанну МахIачкъалалив къуртал хьусса Ккавкказуллал халкьуннал культуралул ва спортрал фестивальданул хIакъираву, ДР-лул БакIчинал бувсунни 6 шинал мутталий жулла республика цалчин ххув хьушиву. Ганал мукунма бувсунни республикалий бувну бушиву цаппара спортрал сооруженияртту, уттигъанну хьусса турнирдай жулва спортсментал ххув хьуну бушиву.
Дагъусттаннал БакIчинал бувсунни цува гъинттул Аьрасатнал Президент В. Путиннущал ва ХIукуматрал Председатель Дмитрий Медведевлущал хьунаавкьуну ивкIшиврия ва тикку хьусса ихтилатирттая.
Яла ДР-лул БакIчи гьартану авцIу­нни сентябрьданул 13-нний хьусса був­чIавурттал хIасиллай.
Сессиялий ДР-лул ХIукуматрал Председательнал 1-ма хъиривчу Анатолий Карибовлул бувсунни Дарбант шагьрулун 2000 шин шаврил шадлугъирттал хIасиллая.