МУСИЛ АРС МУСИЕВ ШАМИЛ
Къашавай шаний хъунмасса хIалгу бувну, августрал 5-нний оьр­мулул 39 шинаву лавгунни, ва чаннасса дуниялгу кьадиртун, ттунагу, уссурссуннангу ххирасса ссил оьрчI, ЧIурттащатусса Мусиев Шамил.
Хъинну захIматсса азаруннил къювулул увкунни.
Лавгунни кIива барзгу, вих хьунгу захIматну буру гьаксса. Аллагьнал чIумуйсса буллай бур жунма оьрму. КIа кIулмари, жущавагу, ссавургу дурну, дуаь дулларча бакъа, цичIав бан хъанай бакъар. ЧIун дакъасса бивкIу къахьуннав чувчIавгу. Амин. Ия Шамил дакI-аьмалданул ххуйсса, инсаншиву дусса, гъанминнай цIими бусса. Кьабивтунни цалва шанма мюрщисса душ. ЧIивимунин дакIнийвагу къаикIанссар, бувсун бакъа. Хьунни оьрмулул ххал игьавурттугу, шийва унува, Аллагьнан ххирасса лагъ уну тIий. Га увкумур гьарзат буллай ия, хьул бивхьуну ия дунияллийн. Махъра-махъсса хьхьугу гьан дунни нину-нину тIий. Аллагьнан мукун ччай бухьунссия. Давривугу гьарцаннащал авкьусса ия, цаятува рязину кьабивтунни. Кьадиртунни нинугу, оьрчIал къюву къаккакканнав щинчIав тIий, аьтIий. Махъминнащагу цичIав бан къавхьунни, цIимилул макь рутIларча бакъа. Ци банну, ажалданул чIун къадулайссар, цIуцIаву ххув шай. Ца багьана, ца савав хьуну, хъап увкуну, уцай жучIатува.
Жун яла ххирама Шамил дунияллия лагаврил кьурчIишиву кIидачIлай буру буттахь Мусихь, ниттихь Аьлиятлухь, ссихь Мадинахь, уссихь Магьдинахь ва гъан-маччанахь. Цал гьав гьарта хьуннав, нурданул дуцIиннав, Алжаннувун наниминнавух ишиннав, МухIаммад-идавсил умматиннащал. Аллагьумма амин!
Нагу вил ниттил­ссу Уммукусум-хIажи
ва ЧIурттащиял жямат

———————————

ЗАГЬИДИНАЛ АРС ХIУСМАНОВ КАМАЛ
Сентябрьданул 18-нний оьрмулул 78 шинаву хар-хавар бакъа, дунияллия лавгунни ххаллил­сса, гьарцаннангу ххирасса чув, ЧIурттащатусса ХIусманов Камал.
Камал ия ттул ниттилссил лас. Цибанссар, Аллагьнал буллусса оьр­мулияр ххишаласса бутан хъанай бакъар. Ххуйминнал ва дунияллий цаярда махъ ххуйсса цIа кьаритай­ссар. Мукунминнавухсса ия жул Камал-уссагу. Ванал хъунмурчIин оьрму бувтссар Хасавюртлив. 1989 шинал ивзссар МахIачкъалалив. Чув яхьурчагу, цаятува ЧIурттащиял жямат ва лагмами рязину кьабивтунни, алжаннул ххари аннав, ххуйсса инсан ия тIий.
Камал ия дакI-аьмал хъин­сса, хъамал ххирасса, мудан тIив­тIунмасса, ссупра цала къатлуву тачIав чан къабайва, ненттабакI тIивтIуну, ххарину увкIмагу кьамул айва. Хасаврал базаргу Камаллул къатлуя арх бакъа буссия, мунияту жяматран Камал хъинну ля­къайссия. ХIасил, ия дугърисса адамина. Ванал дурцири давурттугу, захIматгу чIявуссар, ивчIаннингу зийна ия. Тарбия бувссар ххюва оьрчI чин эбратранну.
Камал аьпалул хьусса кьурчIи­шиву кIидачIлай буру ПатIиматлухь, оьрчIахь, душваврахь, гъан-маччанахь. Камаллул гьав нурданул дуцIиннав. Жу вияту ва дунияллий рязиссиявча, Аллагьгу Ахиратраву вия, цала лагъная, рязину личIаннав, винсса кIанугу ххуйминнал чIарав хьуннав, МухIаммад-идавсил умматиннащал. Аллагьумма амин.
ЧIурттащиял жяматрал
чулуха Уммукусум-хIажи

——————————-

БАДАВИНАЛ ДУШ ИСРАПИЛОВА ЯНСИЯТ
Вай гьантрай захIматсса азардануща ххассал къавхьуну, 67 шинаву дунияллия лавгунни Цалчинмур ЦIувкIратусса ххаллилсса хъамитайпа, Бадавинал душ Исрапилова Янсият.
Му бувссар ва хъунма хьу­ссар бусравсса учитель Бадавинал ва захIмат ххирасса ПатIил чIявусса оьрчIру бусса кулпатраву. 1973 шинал Дагъусттаннал медициналул училище ххуйсса кьиматирттащал къуртал бувсса Янсият зун тIайла бувкссар Республикалул инфекциярдал азарханалийн, медсестрану. Цуппа азарданухьхьун бирияннин зийгу буссия му азарханалий. Янсиятлул сий коллективравугу, жяматравугу хъуннасса дуссия. Мурччай пиш бакъа ихтилат къабайссия, дакI-аьмал хъинсса, духтурнал пишалий зунма лявхъусса кунмасса, яну-кIукIлусса хъамитайпа буссия. Мудангу шайкун инсаннал чIарав бацIайссия. 1968 шинал щар хьу­ссия Кьурбаннул арс Исрапилов ХIусайннун, дакIру хъинсса, итххявхсса, ххаллилсса душру хъуни бувссия. Янсиятлул бусравсса захIматран хIукуматралгу лайкьсса кьимат бивщуну бур: мунил Дагъусттаннал цIуллу-сагъшиврул лайкь хьусса зузалал, «Здравоохранениялул отличникнал» цIарду, чIярусса хIурматрал грамотартту ва лишанну дур.
Янсиятлул бивкIу хъинну кьув­тIусса жямат жижара буллай бур мунил душваврахь Есенияхь ва Машухь, куявнахь, наслулухь, уссур­ваврахь Муртахь ва Аьбидлухь, ссурваврахь, Исрапиловхъал ва Муртаевхъал тухумирттахь, щалвагу агьлу-авладрахь. Янсиятлул гьаттай нур дизаннав, алжаннул ххари буваннав. Мунин къабуллумур оьрмугу душваврал наслулун ххи бувну лякъиннав.
1-мур ЦIувкIуллал жямат