Сентябрьданул 30-нний хьунни ДР-лул Ветеринариялул комитетрал председатель Вахмурад Курчаевлул пресс-конференция.
ХIасан Аьдилов
Ганал бувсунни ветеринариялул къуллугърал дан аьркинсса ва дуллалисса давурттая, цалла ялувсса тIалавшинная.
В. Курчаевлул мукъурттийн бувну, ДР-лул Ветеринариялул комитетрал биттур дуллай бур «Ветеринариялул хIакъираву» тIисса Федерал закондалул тIалавшинну, дурну дур циняв профилактикалул давуртту.
2015 шинал республикалий бур 10 млн. 34 азаллий 387 бакI лухIи гъаттарал, миннувату 468 азаллий 159 бакI оьллу, 5 млн. 864 азаллий 210 яттил хIайван, 31 азаллий 906 чу, 2 млн. 552 азаллий 682 аьнакIи, ажартту ва къазру, 903 бакI дунгъузрал, 102 азаллий 263 найракъатта, 102 азаллий 263 ккаччи.
Миннун аьркинсса профилактикалул давуртту ларгсса шинал дурну дур.
Ларгсса шинал ашкара бувну бур брюцеллезрал къашавайсса 885 лухIи гъаттара ва 320 яттил хIайван. Ми циняв бивххун бур.
Гьашину кIул хьуну бур къашавайсса гъаттара бусса 13 кIану ва яттилсса – 4 кIану, ми кIанттурдай дагьайсса давуртту дурну дур. Уттигу мукунсса кIанттурду личIлай бур, миннухагу зий бур.
Ветеринариялул ва санитариялул давуртту дурну дур ризкьи ябуллалисса 4668 объектрай, миннувух дезинфекциялул давуртту – 152 объектрай. Дезинфекциялийну марцI буккан бувну бур 83 млн. ва 800 азарва бакI ризкьилул.
Гьашину ххал бувну бур 622 ризкьилул объект, миннувату пландалий ккаккан бувсса – 576, пландалий бакъасса – 46. Дурну дур ветеринариялул законнал тIалавшинну биттур даврин хасъсса 5490 контрольданул даву.
Мура чIумал чирчуну дур 754 предписание, дирхьуну дур 1 млн. ва 930 азарда къурушрансса аькIри. Судирттал органнайн дуллуну дур 135 административ материал. Комитетрал дурну дур цаймигу давуртту.
Ялун личин дурсса диялдакъашивурттал ккаккан дуллай бур ми цинявннува 88% диялдакъашивурттал дуллай бушиву гъаттара, ятту биххайни ва дикI машай буккан дайни ветеринариялул ва санитариялул кьяйдарду къадуручлай бушиву. ДикI даххан ларсун нанийни аьркинсса, хасъсса документру бакъашиву.
Бруцеллезрал къашавайсса ризкьи жучIанма букIлай тIий, ва Кьиблалул ва Ухссавнил Ккавкказуллал федерал округирттай яшур ппив хьуну диркIун тIий, Къизлардал стационар пострай (ДПС-рал) тIивтIуссар ветеринарно-полицейский пост, цачIу къарал булланшиврул.
Мукунсса къаралданул ххал бувссар Дагъусттаннайн ва Чачаннавун ризкьи бувцуну нанисса 4314 машина. Му чIумал республикалийн бучIан бувну бур 294 709 бакI, миннувату 27879 бакI гъаттара ва 266830 яттил хIайван. Миннувату ветеринариялул законну лиян дурну бувцуну бивкIссар 5596 бакI гъаттарал ва 22031 бакI яттил.
Гьашину республикалий бувну бур 3 скотомогильник ва 5 биотермический къуви, 3 ятту биххай кIану.
Гьашину республикалий ашкара бувну бур хъинну нигьачIаву дусса яттил чутту азар (оспа). Му азар республикалий ашкара дурну диркIссар 1987 шинал. Ветеринариялул хIарачатрайну азарданул кюру марцI буккан бувссар.
