Кьурбан байран дур Исламраву ца яла кьимат лаваймур байран. Мунил яла агьаммур мурад бур ахIвал кIюласса инсантуран дукиялийну ка-кумаг баву. Чялишсса гьурттушинна дунни байрандалул кьини миски-гъаривнал чIарав бацIавриву «Гъази-Гъумучи» фондралгу.
Фондрал исполнительный директор Илияс Къапиевлул бусласимунийн бувну, вайннал оьвчаврих къулагъас дурну, мюхтажминнан кумаг бансса арцурду дуллуну дур Дагъусттаннай бакъассагу, Аьрасатнал шагьрурдай ялапар хъанахъисса лакрал.
КутIасса чIумул мутталий фондрал дартIун дур 250 азарда къ. арцул.
«Надежда» ва «Чистое сердце» фондирдащал цачIуну «Гъази-Гъумучи» фондрал волонтертурал байрандалул кьини ссайгъатру биян бувну бур районнай ялапар хъанахъисса 200-ннийн бивсса лакрал ужагъирттайн, Лакрал ва ЦIуссалакрал.
Фонд барчаллагьрай бур ва чирилунсса давриву гьуртту хьуминнайн.
Зулайхат Тахакьаева
