Къизлардал райондалий хьунни «Таланты Кавказа» тIисса, миллатирттал мазрай балай учин, инструментирттай макьанну дуцин кIулсса жагьилтурал самодеятельный коллективирттал фестиваль.
Имара Саидова
Фестивальданул сакиншинначиталну хьунни ДР-лул Жагьилтурал иширттал министерство ва Къизлардал райондалул Жагьилтурал культуралул центр.
Цинявппа фестивальданул гьурттучиталгу, хъамалгу кьамул бувну, барча буллалисса ихтилатру бунни Къизлардал шагьрулул бакIчи Александр Шуваловлул ва ДР-лул жагьилтурал иширттал министр Заур Кьурбановлул.
Фестивальданул программалий жагьилминнал увкунни миллатирттал аслийсса халкьуннал ва уттизаманнул эстрадалул балайртту. Тамашачитуран ляличIинура ххуй дирзунни миллатирттал личIи-личIисса инструментирттай дурцусса макьанну. Вайннал гьунардан кьиматру бишлашисса жюрилуву бия Аьрасатнал ва Дагъусттаннал искусствалул лайкь хьусса ишккакку, композитор МахIаммад Кьасумов, вокалданул мастер, Дагъусттан Республикалул культуралул лайкь хьусса зузала Лариса Трухан, хореограф Ирина Ризванова. Цаннаяр ца гьунарду бусса, итххявхсса жагьилтурал дянива язими бувчIин бигьану бакъая жюрилун.
Вокалданул номинациялий цалчинмур кIану бувгьунни Юбилейный тIисса поселокрайсса оьрчIал искусствалул школалул дуклаки душ Руслана МутIалимовал ва Аверьяновкалийсса искусствалул школалул дуклаки оьрчIал. КIилчинмур кIану бувгьунни Къизлардал райондалиясса ва Ахттиял райондалиясса балайчитурал. Шамилчинмур кIану бувгьунни Сергокъалаллал ва Избербаш шагьрулул оьрчIал искусствалул школардал.
Инструментирттай руцаврил номинациялий цалчинмур ва кIилчинмур кIантту бувгьунни Сергокъалаллал райондалиясса дуклаки оьрчIал. Шамилчинмур кIану бувгьунни Ахттиял райондалиясса оьрчIал коллективрал.
Хореографиялул творчествалул гьунарду ккаккан буллалисса номинациялий цалчинмур кIану бувгьунни Сергокъалаллал райондалиясса оьрчIал, кIилчинмур – Аверьяновкалул искусствалул школалул дуклаки оьрчIал ва шамилчинмур кIану – Къизилюртуллал шагьрулул искусствалул школалул оьрчIал.
Фестивальданул сакиншинначитурал цинявппагу гьуртту хьусса оьрчIахь увкунни барчаллагь, дуллунни дакIний личIансса бахшишру.
— Укунсса журалул фестиваллу дуллалаврийн бувну хъунмасса кумаг хъанахъиссар балайлул, къавтIаврил ва творчествалул гьунарду бусса оьрчIру аьлтту буван, ялун личин буван, — увкунни Къизлардал шагьрулул бакIчи Александр Шуваловлул.
