Октябрьданул 16-нний МахIачкъалаллал 28-мур школданий хьунни цIуллу-сагъшиврул ссуссукьусса оьрчIал творчествалул фестиваль – «Парус надежды».
Бадрижамал Аьлиева
Ва фестиваль сакин дурну дия МахIачкъалаллал администрациялул кIулшиву дулаврил управлениялул.«Парус надежды» фестивальданий гьуртту хьунни шагьрулул дянивсса даражалул школарттал ва коррекциялул идарарттал дуклаки оьрчIру, педагогтал. ХIурмат бусса хъамаллуравух бия Дагъусттан Республикалул БакIчиначIасса кулпатрал, нинушиврул ва оьрчIал ихтиярду дуруччаврил Вакил Интизар Мамутаева.Фестиваль дуллай бур мушакъатсса оьрчIан, инвалидтуран паччахIлугърал социал кумаг баврил аралуву дуллалисса давурттал лагрулий. Мунил агьамми мурадругу бур чIявучиха къалавхьхьусса, ляличIисса оьрчIансса, миннан цивппа цивппалуну къачIалан, социал кумаг щаллуну баву, мукунсса оьрчIал гьунарду ялун личин баву, миннал социал адаптациялуцIун кабакьу баву, мукунсса оьрчIал чулухуннайсса къулагъас ларай даву ва ми оьрчIаву жулва халкьуннал культуралул ирсирахсса гъира чантI учин баву.
Фестивальданул агьаммур темагу дия «Мой любимый город, Махачкала». Конкурсравух гьуртту хьунни оьрмулул 7 шинава 18 шинавун бияннинсса 130 оьрчI. Миннал цалва-цалва гьунарду чIалачIи бунни «Вокал», «Инструментальное исполнительство», «Национальная хореография», «Современная хореография», «Декоративно-прикладное творчество», «Изобразительное искусство», «Оригинальный жанр» ва «Театральное искусство» номинациярттай. ОьрчIал давурттан кьимат бишлай бия шагьрулул КIулшиву дулаврил управлениялул вакилтурая, коррекциялул педагогтурая, тарбиячитурая ва социал зузалтрая сакин хьусса жюри.
«Парус надежды» фестивальданувух гьуртту хьусса цинявннан дуллунни сертификатру, ххув хьуминнан – дипломру ва бахшишру. Цаппарасса оьрчIру лайкь хьунни сакиншиндарал комитетрал ва спонсортурал чулухасса бахшиширттан.
Фестиваль сакин дурминнан пикри бур ва гьарца шинах дуллан ва оьвтIий бур ва давривух гьуртту хьун ччисса цинявннайнмагу.
