Ялу-ялун дурчIлай дур ттун «Ххуллурду – оьрмулул туннурдур» тIисса калималул мяъна. Ххуллурдал тагьар агьалинал оьрмулий асар хъанай дур, махъ бакъа, хаснура кьянатсса зунттал районнай. Ххуллурду ххуйний оьрму щиривкIуну бур, ххуллурду лащинсса кIанттай оьрмугу лащинсса бур, ххуллурду бакъасса кIанттай тIурча оьрму бяваличIлай бур.
Зулайхат Тахакьаева
Зунттавусса чIяруми щархъурду духлаглагаврил савав ттун дурчIуна 2006 шинал нава Ппалассуннал шяравун лавгсса чIумал. Лухччи-ссав илкинсса, гьава марцIсса, уртту-щин щинтасса шяраву бувагу ливчIун бия 2 чирахъ. Ххуллу захIматшивруцIун, неххайх ламувагу бакъасса кIанттай, цал ухьурчагу кьатIушав увккун бигьасса шартIру ккарксса инсан, лявхъу кIану цуксса цанма ххирану бухьурчагу, так ца ватандалухсса ччаврилгу, ябатIин къашайсса тIабиаьтралгу, гьай-гьай, къаугьанссар. ПаччахIлугъран хъамабивтсса кIану бия учайссия на кIа базилух цукунсса шяравалу дия тIий цIухлахиминнахь. КIания мукьахгу паччахIлугъран хъамабивтсса кIантту, яни гьан-бучIан шайсса ххуллурду бакъашиврийну, эяллай дарцIу шяраваллурду ттун чIярусса бакIрайн дагьссар Лаккуйгу, цайми районнайгу. ХIайп тIийнма бикIара мамари хьусса уртту-тIутIи дусса кIантту кIачIа буклай, бигьинсса ссихI бакъасса, лухччив ххиттуйн дурксса арнил кIанттурдай ризкьилуха зун багьлай бушиву жулва инсантуран.
Нехру, ратIру чIярусса зунттал кIанттай туннурдайсса оьттубацIурдан ккалли хъанай бур лекьавайсса ламурду. Ца мукунсса оьттубацIу хьуну бур Ккуллал райондалий СумбатIлия ливчуну Ккулув биявайсса ххуллийгу. Сайки 3 шинни, ва кIанттайсса ламу лекьавай буну, машинартту ялттучIин къулай бакъасса ххуллийх занай.
Мунил ялув цIухху-бусу буллалийни, ДР-лул ххуллурдал идаралий зузисса Зиябуттин ХIажимирзаевлул бувсунни дакIнива буруккин яла ласунсса хавар – зий бусса бур ва ламул проектраха. Му бувну къуртал бан тIий бусса бур декабрь зуруйннин ва ялунчIилсса шинал буллай байбишин пландалувун бутан тIий бусса бур. Лахъи лаган къабулланхьуви.
