ТIабиаьтрал аваданшиврул чулуха Дагъусттан ца яла аваданмур регион хъанахъиссар Аьрасатнаву. Каспий хьхьиричIату цаппара ссятирдай лахъан шайссар Хъунмасса Ккавкказуллал марххалттал бавкьусса зунттайн, тикку дур личIи-личIисса чувчIав къахьунадакьайсса ландшафтру.
Мукунна личIи-личIисса уртту-тIутIивгу, хIайвантгу бур ми ландшафтирдай: тикку ххяххияртту шайссар 4 азарда журалул, сайки 600 журалул хIайвант бур. Миннувасса цаппара (сирийская чесночница, кошачья змея, гюрза, толстоклювый зуек, красноголовый сорокопут, тугайный соловей, подковонос Мегели) Аьрасатнал Федерациялий так Дагъусттаннайри бикIайсса. Мунияту жулва зунттал билаятрах ляличIисса къулагъас диркIссар тIабиаьт дуруччайсса ва ахттар дайсса аьлимтурал – географтурал, ботаниктурал, зоологтурал. Уттигу чIярусса шинну гьанссар Дагъусттаннал вахIшисса тIабиаьт кIулгу дурну, мунин кьиматгу бищуншиврул. Амма му чIумалнин вай гьарзат дуруччин аьркинссар.
Мунияту буллалиссар къадагъалул кIанттурду (заповедникру), заказникру, тIабиаьтрал паркру, ботаникалул багъру. Ми циняв цIарду цачIун дайссар ООПТ цIанилу (особо охраняемые природные территории). Мукунсса кIанттурду къаралчитурал буруччайссар. ООПТ бикIайссар федерал даражалул ва регионнал даражалулсса.
Федерал ООПТ хъанахъиссар тIабиаьтрал заповедник «Дагестанский» ва мунийн багьайсса – «Аграханский», «Самурский» ва «Тляратинский».
Республикалул ООПТ хъанахъиссар 12 паччахIлугърал заказник. Амма ми чIявусса бухьурчангу, буруччин захIматну бур, мунияту аьркинни сакин буллан цIусса ООПТ-рду. Масалдаран, пландалий бур «Дагестанский» заповедникрал лагру гьарта дурну Дагъусттаннай сакин бан цалчинмур республикалул парк. Заповедник гьарта баврил цамургу вариант хъанай дур Сарыкумрал участок гьарта даву. Республикалул парк бан най бур Самурдул заказникрайгу.
Дагъусттаннал ТIабиаьт дуруччаврил министерствалий сакин буллай бур цIусса тIабиаьт ляличIину дуруччайсса кIанттурду, масалдаран Хъунзахъиял райондалий, Тарки-Тау зунттуй. Жалгъан тIисса зунттуйгу тIабиаьтрал парк бансса пикри бур. Ялун дучIансса чIумуву пландалий бур цIусса ООПТ-рду сакин бан Самурдул ва Сулакьрал дайдихьулий, Каспий хьхьирил зумардай. Инвентаризация дан пикри бур Дагъусттаннай яла агьамми тIабиаьтрал объектирдал (бярдал, жюружанттал, сивардал, вацIрал, хъунив хьусса мурхьирдал), яла миннун республикалул тIабиаьтрал гьайкалданул статус булуншиврул.
Му куццуй буруччин аьркинну бур жулва заповедникру, заказникру, тIабиаьтрал паркру ва тIабиаьтрал гьайкаллу.
ХIажибаг Жамирзаев
ХIадур бувссар
ХI. Аьдиловлул
