«Молодежь Дагестана» кказитрал редакциялий «Все сразу!» цIанилусса ДГИНХ-рал КВН-далул командалувасса жагьилтуращал республикалул СМИ-лул журналистал хьунабавкьунни.
Залму АьбдурахIманова
Хьунабакьаврил сававгу дия уттигъанну Ставрополлай хьусса, Ухссавнил Ккавкказуллал регионнаясса командартту гьурттусса, Ставрополлал крайрал губернаторнал Кубокрайнсса КВН-далул тIуркIулуву жулва жагьилтурал команда шамилчинмур кIанттун лайкь шаву.
Цайми республикарттаясса хъинну ххуйну хIадур хьусса жагьилтурал командарттал дяниву вайннаща бювхъуну бур цалва куртIсса ва бюхъу ххисса хъярч-махсарарттайну хьхьичIунми кIанттурдавасса ца бугьан. Цалла командалия, мивусса гьурттучитурая, Ставрополлайнсса аьрххилия ва аьмну КВН-далия буслай, «Все сразу!» командалул бакIчи Насруттин Кьаировлул бувсунни укунсса даражалул тIуркIулуву гьуртту хьуннин цал командалул къабигьасса ххуллу бивтшиву.
— Республикалул вузирдал дяниву гьар шинал бувайсса хъуни тIуркIурдаву дуссия чIунну жу бух хьуссагу, ххув хьуссагу, яла лахъмур шачIанттуйн лавхъссагу, муния бучIан багьссагу. Жул дянива цавай оьрчIру лаглай, ялун цайми букIлакIисса ишру чан къашайва. Команда сакин дурния шинай жущал архIал мудангу уссар Марат Султанов, цалчинми гьурттучитурава ва ца акъа къаливчIунни хIакьинунин. Жул командалуву Халкьуннал хозяйствалул институтрал студентътал бакъасса, уссар ца школалул дуклаки оьрчIгу. ЧIал къавхьуну вагу жул вузрал студент хьунтIиссар. Командалул хъярчру, махсарартту чичару жува, цанчирча жун жунма кIулну тIий жулла обществалул яла дащуй бишинми, миннуй хъярчирайну аьй-бювкьу бансса масъалартту, — тIий ия командалул бакIчи.
Ванал мукунма ххи бувунни аьмну КВН-далул гьурттучитурал дуруччин буржлувсса диндалиясса, наркотикирттаясса хъярч бан ва жагъаласса махъру ишла бан къабучIишиврул низам цалгу дуруччайшиву. ЯлачIин ччимур иширайнсса, масъалалийнсса рихшант даву, хъярч баву цал чIарах къалагайшиву.
Жагьилтурал бувсунни цивппа Ставрополлал тамашачитурал хъинну ххуйну, тяхъану, вев-щютI тIий, хъатру ришлай кьамул бувшиву. Шамилчинмур кIанттун лайкь хьуну, крайрал губернатор Владимир Владимировлул Кубокгу тапшур буллай, цан хъин-хъинсса тIайлабацIурттугу чIа куну, барчаллагьгу баян бувшиву.
СКФО-рая ва ЮФО-раясса гужсса 13 команда гьурттусса ва тIуркIулий шамилчинмур кIану бугьаву му хъунмасса, ххари хьунсса ишну чIалай бур. Мукунма вайннал кIицI лавгунни, октябрьданул ахирданийгу цивппа Ставрополлайн най бушиву, КВН-далул гала-концертрай гьуртту хьун.
Жагьилтал хъинну барчаллагьрай буслай бур гьарца ишираву, гьарца аьрххи-ххуллийн нанийни, цан хъунмасса кумаг ва чIарахбацIу бувайшиву вузрал каялувшинналул, хаснува ДГИНХ-рал ректор ЯхIия Бучаевлул.
