ХIАЖИБУТТАЛ АРС МАХIАММАДОВ НУРИСЛАН
Вай гьантрай, оьрмулул 77 шинаву, цаппара хIаллай къашавайгу хьуну, дунияллия лавгунни ххаллилсса дакI-аьмалданул заллу, Бархъаллал ХIажибуттал арс Нурислан МахIаммадов.
Нурислан увну ур 1938 шинал Ахъушиял райондалийсса Бархъаллал шяраву хъудугьул кулпатраву. Школагу бувккуну, лавгун ур аьрали бурж лахъан. Зана хьуну махъ зий ивкIун ур буттал шяраву. 1969 шинал Нурислан увчIуну ур Бархъаллал шяраваллил исполкомрал секретарьну. 1973 шинал увчIуну ур Бархъаллал шяраваллил исполкомрал председательну, яни шяраваллил советрал. Чув, ци даврий итарчангу, Нурисланнул цалла даву ххишала дакъа марцIну, ларайну биттур дувайва. Мунияту 1979 шинал ва Бархъаллал жяматрал увчIунни цалла «Дружба» колхозрал председательнал хъиривчуну. Ци даврий зурчангу, Нурисланнул даврил ккаккияртту ларайсса дикIайва.
Ва ия инсантурал хасиятирттацIун авкьусса, мякьнал кьакьаригу, ккашилнал лякьагу кIулсса зунтталчу, хIакьсса захIматчи. Гьарцагу цува зузисса даврий ванал биялсса захIмат бивхьуссар агьалинал ахIвал лавай бан. Аллагьнал кьадарданун банмур бакъассар, чичру укунсса духьунссия.
Нурисланнул бивкIулул кьурчIишиву кIидачIлай, жижара буллай буру арсурваврахь, душваврахь, уссурссуннахь, цинявппагу гъан-маччаминнахь. Цал бунагьирттал аьпа баннав. РухI хъинний дишиннав.
Бархъаллал, Ахъушиял махIлалийсса лакрал циняв шяраваллал жямат
————————————
КЪУППИЛ ПАТIИЛ АРС МАХIАММАДОВ НУРИСЛАН
Гьашину сентябрь зурул 9-нний, къашавай шаний лахъигу къалавгун, оьрмулул 77 шинаву дунияллия лавгунни Бархъаллал шяраватусса Къуппил ПатIил арс МахIаммадов Нурислан.
Нурислан ххишала акъа уздансса, чIивинияцIа захIматрал сасан увсса адамина ия. Учаймургу мяърипатрайсса, цаманан бусрав хьунну учайсса ия. Лахъа-хъунсса цIардайн, ларайсса кьинирдайн хъап тIисса тIуллу ванаву дакъая. ЧIаххувращал авкьусса, маслихIатсса, ас-намусрал увцIусса, жяматрал дяниву дуллалимунивух мудана хIала-гьурттусса уссия. Нурисланнулгу, нагу 1960-1961 шиннардий Буйнакскалий Шяраваллил хозяйствалул механизациялул училище бувккуссия. Жу ца «Беларусь» тракторданий цачIу зий буссияв «8-мур мартрал» цIанийсса колхозрал къутандалий Бажиганнай (та чIумал колхозраву Бархъаллал, Хъюллал, ЦIуликъяннал агьлу цачIу буссия). Колхозрал давурттай Нурисланнул хIат-хIисав дакъа чIярусса давуртту дурссар. Бархъаллал шяраваллил советрал председательну усса чIумал, ванал УрчIращинайсса щаращул щин Хъунаарийх шяравун дурцуссар. Ярттаривсса, Акъурувсса, ХIаллилусса, ЧIикъурувсса, Зумаривсса хъуруннал ляхмаршри бульдозерданух кьа бувну, комбайнерттах бигьану ттихIин бюхъайсса, тIиртIусса хъуру дурсса Нурисланнулли. Бархъаллал, Хъюллал, ЦIуликъяннал жяматрачIагу Нурислан лайкьсса хIурмат буну уссия.
Лавгунни хъинсса инсан, карчI дакъасса зузала. КIулминнал дакIурдиву ва мудангу бусравну личIантIиссар. Кьабивтссар хъинсса аьпа.
Бархъаллал жяматрал цIания Нурислан жуятува личIи шаврил къумашиву кIидачIлай, жижара буллай буру ванал кулпат Марияннухь, оьрчIахь, душваврахь, минная бивзсса наслулухь, уссихь ХIамидлухь ва махъсса гъан-маччанахь. Нурисланнул рухI Алжаннул яла рахIатний дишиннав! Махъ ливчIминнал оьрмурду лахъи баннав, барачат ххи баннав, ванаща дан къархьуну лирчIмур дуллан цIуллушиву дулуннав!
Бархъаллал, Хъюллал, ЦIуликъяннал жяматрал цIания Исмяил ХIусманов,
ш. Москав
——————————-
АЬЛИЛ АРС АХIМАДОВ АЬЛИ
Тамансса хIаллай къаша-шавайгу ивкIун, сентябрь зурул дайдихьулий аьпалувух ивхьунни ххишала акъа захIмат ххирану ивкIсса, оьрчIния шинай зий-занай аьдатсса, оьрчIшиву цирив кIул хьуннин хъуна хьусса, захIматрал сасан увсса зунтталчу, ятиншиврул оьрмугу лякьлува най уна кIул хьусса, КIямашрал шяраватусса Мисидухъал Аьлил арс АхIмадов Аьли.
Аьли увну ур 1931 шинал КIямашрал шяраву Мисидухъал Аьлил ва Ххадижал кулпатраву. Аьлил оьрмулул дайдихьура тIайла дарцIуну дур захIматсса, дука-данмунил кьянатсса шиннардийн. Ниттин Ххадижан хъуни буллан багьну бур 2 ятин. Жулва учайхха «къавачравар чув уккайсса» куну. Мукун ванаягу увккун ур захIматрал хьхьичI ник къарищайсса, янин ккаркмур канил дайсса усттар. Школданий 2-3 классгу бувккуну, ятти-гъаттарал хIухчуну зий 40-хъул шинну хьуну дур Аьлил. 1973 шиная 1992 шинайн ияннин зий ивкIссар Каспийскаллал «Точной механики» заводрай гальваникну. Ва заводрай зузиссаксса хIаллай ХIурматрал улттуя ванал суратгу чан къархьуссар. Бусраврай ивкIссар архIал зузиминнал дянив, дуллуссар медаллу, арцуйнусса бахшишру, ХIурматрал грамотартту. Ва ия хIакьсса захIматрал ветеран, дия медальгу.
Цалва язи бувгьусса Изалащал оьрмугу бувтуна кунная кув Заннал батIул баннин, оьрчIру, оьрчIал оьрчIругу хъуни бувна ччиманал эбрат ласунну, цалва хьурдай учинну. Душругу хъатлия хъатлийн бутлай тIисса кунма, аякьалий, цIимилий, ххаллилну бурувгуна шанурдацIухсса цалва нитти-буттах, цал оьрмурду лахъи баннав, цаятува бивзмигу цахва мукун бурганнав.
Аьлил бивкIулул къумашивугу кIидачIлай, жижара буллай буру арснахь Жяъпардухь, душварахь Аьшурахь, Илмирахь, Халисатлухь, ПатIиматлухь, вайнная бивзминнахь, куявтурахь, арснал щарнихь, гъан-маччанахь ва щалвагу агьлу-авладрахь. Аьлил барачат махъ ливчIун лякъиннав, ванал ник оьрмурдая щалиххан дитаннав.
Аьли-мяммал рухIгу алжаннул ххари даннав, гьав нурданул дуцIиннав. Амин.
КIямашрал, ГьунчIукьатIрал жямат
——————————
ШАМИЛЛУЛ АРС ШАМИЛОВ ССАМАД
Уттигъанну, личIину щинчIав захIматгу къавхьуну, цIуцIи шанийнгу къаагьну, аьпалухьхьун лавгунни ххаллилсса зунтталчу, Хъун дяъвилул ва захIматрал ветеран, 1-мур ЦIувкIратусса Шамиллул ва Жавагьил арс Ссамад.
Дарбантуллал шяраваллил хозяйствалул техникумрал плодоовощеводствалул факультетгу къуртал бувну, захIматрал ххуллу байбивхьуну бур Шушиннал колхозрай агрономнал даврия. Гания махъ щалва оьрму гьан бувну бур шяраваллил хозяйствалул давурттай зий.
Хьхьирил флотрай аьрали къуллугъ биттур буллай дурну дур 5 шин. Оьрмулул 80 шин хьуну махъ Ккуллал райондалул агьали социальнайну буруччайсса управлениялул буллуну бур Ссамадлун дяъвилул ветераннал удостоверение.
ДакIнийхтуну бивхьусса захIматрахлу (къама гьарзану ласаврийн бувну) лайкь хьуну ур СССР-данул Верховный Советрал президиумрал чулуха «Знак почета ордендалун» ва чIярусса цаймигу бахшиширттан.
Ссамад ия дакI-аьмал хъинсса, яхI-къирият дусса, гьарцаннащалагу авкьусса уздансса зунтталчу. Ва ия 6 оьрчIан ххуйсса буттагу, кулпатран хъинсса заллугу. Цибанссар, инсан ивчIан куну дунияллийн лявхъуну ур.
Ссамад аьпалул шаврил хъуннасса кьурчIишиву кIидачIлай, жижара буллай бур уссурваврахь, кулпатрахь, арсурваврахь, душваврахь, уссурссуннахь, агьлу-авладрахь, цинявннахьвагу. Цал гьав нурданул дуцIиннав, пирдавс алжан нясив баннав. Махънал оьрмурдай барачат бишиннав. Амин.
1-мур ЦIувкIуллал жямат
——————————-
ДакIния къалагара
Сентябрьданул 21-нний 10 шин хъанай дур гьарцагу чулуха инсаншиврул бутIа лавайну буллусса, ххаллилсса лаккучу, 1-мур ЦIувкIуллал Хизриев МахIаммадлул арс Рамазан цалва оьрмулул 60 шинаву аьпалул хьуну.
Рамазан увну ур 1945 шинал дайдихьулий ЦIувкIрав. Цалва шяраву 8 классгу бувккуну, дянивмур даражалул кIулшиву ЧIяв ларсун дур 1964 шинал. Аьрали бурж лавхъун бур 1964-67-ку шиннардий Закарпатиянаву, Совет хIукуматрал дазу дуручлай, кьюкьлул командирну. Рамазаннун, цалва бурж лавайну биттур баврихлу, дуллуну дур медаль «За отличие в охране государственной границы СССР». Зана хьуну ур 1967 шинал. 1969 шинал Рамазаннул лавайсса даражалий къуртал бувну бур Ухссавнил Ккавкказнавусса зоналул Комсомолнал школа, Дагъусттаннал политехнический институт. Зун увххун ур МахIачкъалаллал «Автоколонна 1209» идаралийн диспетчерну. Микку диспетчерная айивхьуну, Автоколонналул хъунама инженернал къуллугърайн лавхъун ур. Му даврий зий уна заочнайну къуртал бувну бур Новочеркасуллал политехнический институт, факультет «Автомобили и автомобильное хозяйство». Рамазан дарс дихьлай ивкIун ур Москавуллал автомобильный институтрал МахIачкъалалийсса филиалдануву (хъунама преподавательну).
Рамазан ия гьарцагу чулуха итххявхсса, цалла даву ларайну кIулсса пишакар, цума-цаннащалгу хIал бавкьусса, цалла даву лажин кIялану биттур дуллай тарбия хьусса зузала. Лайкь хьуну ия чIярусса юбилейный медаллан ва даврия ккаккиярттахлу дуллусса медаллан, захIматрал грамотарттан. Ванан 2001 шинал дуллуну дур «Ветеран партии» (КПРФ) тIисса лишан. Ва ия мяйжаннугусса коммунист. Мукуна ва лайкь хьуну ур «Почетный транспортник РФ» тIисса хъазамрай лачIайсса значокран. 2002 шинал ванан дуллуну дур «Заслуженный работник транспорта РД» тIисса хIурматрал цIа.
Рамазаннул хIурмат лавайсса бия цува зузисса кIанттайгу, республикалул зузалтрачIагу. Ва ия рационализатор цува каялувшиву дуллалисса идаралий. Рамазаннул хъунмасса ургъил бия рационализациялул ва изобретательствалул даврих. Ванал захIматрал книжка бувцIуну бур ванан баян бувсса барчаллагьирттал ва арцуйнусса бахшиширттал чичрурдал. Укун бусравну, дугърину къуццу тIисса ия Рамазан. Цаява бивзминнангу тарбия дуллуну дур захIмат ххирану. Рамазан дакIнийнгу утан, хъамагукъаитан лайкьсса чув ия. Ванан къабуллумур оьрчIан булуннав.
Рамазан дакIнийсса,
вил хIурмат лавайсса дустал, гьалмахтал, вил ичIусса
цинявппагу, ина кIулми
