Дунияллийцири балайрдаву яла ххуймур балай оьрчIал кIанттух ниттил учаймур балайри. Му балайлуяр ххуйсса цамур балай бушиврий щищачIав мукIру бан къахьунтIиссара на. Халкьуннал дакIнихсса творчествалул авадансса ххазиналуву цин лавхьхьусса кIану цIакьну бугьлай бур оьрчIал кIанттух учайсса балайрдалгу.

Ми буниялттунгу фольклорданул эмаратрур. ХIакьину оьрчIру нажагь бакъа кIанттуву къабахIай ниттихъал, амма оьрчI шанаши уллалини балай къаучайсса нину бикIангума къабюхъай. Ялагума, бувагу кIанттуву оьрчIру къабахIай замана бувкIун бухьурчагу, оьрчIал кIанттух учайсса балайрдал агьамшиву хъиннура хъуннасса дур, ми ппухълунная бивсса ххазина хъанай буну тIий, фольклорданул антология хIисаврай ябангу багьлай буну тIий.

Уххай, чIируннал тIутIий,
Зунттавусса щаращий.
Уххай, бавал ххазинай,
Ххазиналул кIаралуй!..

Ягу:
Шанашу ттул ххира арс,
Оьрму бусса изивуй!
Баргъ барзунттах шанай бур,
Уххай бува, ххирама,
Нитти-буттал хъун ивуй,
Шанашу, жан, шанашу,
Гъарал ттурлу шанай дур,
КIюрхгу макIру ккаклай дур.

ПасихIшиву халкьуннал мазрал! Аваданшиву! Укун­сса ттиркьюкьив къаядурну шайссарив? Хъинну ххари хьунна, уттигъанну кунма, Дагъусттаннал Миллатрал политикалул министерствалул «Колыбельные народов Дагестана» тIисса цIусса проектрая бавну. Миннацрал къаучирчагу, оьрчIан хасъсса фольклор личIиссара къула­гъасран лайкьсса халкьуннал дакIнихсса творчествалул бутIар, этносрал культура ва аьдатру оьрчIан лахьхьин дуллалисса. Му тарихри, миллат­рал мазри. ЦIусса проектрал хъунмур мурадгу, миллатрал мазру ва халкьуннал творчество яшаву бур. Проект бартдигьлан тIий бур республикалул шагьрурдащал ва районнащал архIал. ЦачIу яъни. Ттун къащи хьунни хIакьинусса кьининийн кIанттух учайсса балайрдал видео ва аудиозаписьру дуркIсса районнавух лакрал царагу райондалул цIа кIицI къалагаврий. «Дагестан» РИА-лийгу дур УнцIукIуллал, Гъуниннал, ЧIарадиял, Рутуллал ва цаймигу тамансса районнал цIарду. Дакъар лак­ралми районналсса. Бюхъай лакралми районнал видеозаписьру ягу аудиозаписьру Министерствалийн гьан дуван дурану дикIангу, къакIулли. Ттун хъинну ччива му проектравух лакгу гьуртту хьуну. Видео ва аудиофайллу дикIан тIий дусса дур Миннацрал сайтрай. Ссал къабагьар му сайтрай лакралми балайрдахгу вичIидишин! Ца тирххандарал тIитIалану чIалай дур му даву, музыкалул культура бюхттулсса ва фольклоргу адаврай ядурсса лак му проект­рал чIарах бувккун къаччива. Царагу культуралул учреждениялий аьй дуллай, миннал даву дащуй дихьлай бакъара. Культуралул программалул вана укунсса диялдакъашиву дия, ягу концертрал нукьсаншиву ваниву дия увкусса ца махъ кказитрай учаву бухIан къахъанай сукку хьуми чан къашай. Проектраву гьурттушинна дуваву цучIав тIалавгу къабуллалиссар, къуллугърал буржгу бакъахьунссар. Лакрал халкьуннал оьрчIал кIанттух учайсса, янукIукIлусса, караматсса, ттюнгъава-ттюнгъасса балайрдая лак махIрум мабувару тIутIисса миннатра буван ччисса. Анжагъ миннат.