«Тарки-Тау – 2015» луттирдал выставка хьунни

41_12Ларгсса нюжмардий МахIачкъалаллал шагьру 4 гьантлийсса кIура бавунни луттирду ххираминнал, ми чичлачиминнал, итабакьлакьиминнал ва ккалаккиминнал хъуншагьрулийн, вай гьантрай Миллатрал библиотекалуву хьунни Дагъусттаннал луттирдал ярмарка «Тарки-Тау – 2015».

Бадрижамал Аьлиева
Ва выставкалул сакиншиндаралсса буллай бия ДР-лул Культуралул министерство, Р. ХIамзатовлул цIанийсса Миллатрал библиотека, гьурттушинна дунни ДР-лул Печатьрал ва информациялул, Миллатирттал иширттал, Жагьилтурал иширттал министерстварттал, Аьрасатнал Культуралул фондрал Дагъусттаннал филиалданул, РАН ДНЦ-лул Мазрал, литературалул ва искусствалул институтрал, респуб­ликалул вузирдал студентътурал ва дуклаки оьрчIал. ХьхьичIми шиннардий кунна, ва даврил хъуннамур хъар цайнна ларсунни «Горцы» кказитрал хъунама редактор, художник, ва выставкалул сиптачи, «Тарки-Тау» проектрал автор Марат ХIажиевлул.
Выставка тIитIлатIисса шадлугъравух гьуртту хьунни ДР-лул культуралул министр Зарема Бу­ттаева, ДР-лул печатьрал ва информациялул министр Азнаур Аджиев, Мазрал, литературалул ва искусствалул институтрал директор МахIаммад МахIаммадов, ва ххуллухмур «Тарки-Тау» выставкалул жюрилул председатель, МГУ-лул профессор, чичу Владимир Новиков ва цаймигу республикалул къуллугъчитал ва бусравсса хъамал. Вайннал барча бунни бавтIми ва иширащал ва чIа увкунни гихуннайсса давурттаву тIайлабацIуртту. Выставка тIитIлатIисса шадлугъравух ва гихуннайминнувух хьхьичIунсса гьурттушинна дунни «Я – помощник президента» тIисса жагьилтурал суккушиндарал ва волонтертурал.
Выставкалул цалчинмур кьини баян бувну дия Миллатрал литературалул кьинину ва хас дурну дия Дагъусттаннал луттирдал издательствалун 90 шин шаврин. Ва кьини ДГУ-лул студентътурал бувккунни Расул ХIамзатовлул шеърирду, ккаккан бунни литературалул ва музыкалул композиция «Певец земли родной». Хьунни «ккуркки-стол ««Дагестанская книж­ная культура: вчера, сегодня, завтра» цIанилусса.
Мура кьини хьунни Дагъусттаннал издательствалул итабавкьусса луттирдал презентациярду. Миннувух бия А. А. Кудрявцевлул «Дербент – древнейший город России» ва Р. МахIаммадовлул «Обычаи и традиции народов Дагестана» лу­ттирдугу. Мукунма Аь. Жаватхановлул, Ю. Идрисовлул, Ж. Аьлиевлул ва цайминнал луттирдугу.
Цамур залдануву дуллай бия Алиса Ганиевал цIусса луттирдал презентация. Му дачин дурну ия чичу Сяид Ниналалов.
«Дагестан» издательствалул къатлул директор УмархIусман ХIажиевлул, «Дагестан во всей красе» цIанилусса программалуву бавтIми кIул бунни Камил Чутуевлул суратирттал альбомирттащал.
Ва кьинигу, выставкалул гайми кьинирдайгу Миллатрал библиотекалул личIи-личIисса заллаву, майданнай хьукъархьусса шадлугъру, давурттив къалирчIунни, кIюрххил байбивхьуну, хьхьувайнин, хIатта цал архIал цимирагу, ми цинявннийн биян хъирив лаллай бакъая инсантал, мунияту цанна яла хIаз дизаймур язи дугьан багьлай бия.
«Тарки-Тау – 2015» выставкалул давривух гьуртту хьун жулла респуб­ликалийн бувкIун бия Москав, Санкт-Петербург, Пермь, Красноярск, Грозный, Къазан шагьрурдаясса издательствартту, шаэртал, чичулт, журналистал.
Презентациярттал, чичултращалсса хьунабакьавурттал, «ккуркки-столлал», выставкарттал лях-карах тамашачитураща бюхълай бия ххал дуван оьргърал усттартурал дурсса чIюлушиннарду, бархъаллал тIахIунттив.
Библиотекалул жанахIраву хьунни шеърилугърал ккурчIагу «Салам, Махачкала!» цIанилусса. Муний, «тархъансса» микрофондалучIан гъан хьуну, шеърирду ккалай бия шаэртал цивппагу, студентътал ва дуклаки оьрчIругу.
Выставкалул лагрулий хьунни чичултрал ва буккултрал дянивсса «Брэйн-ринг» тIуркIугу. Мунивухгу ДГУ-лул студентътал хьхьичIунну гьуртту хьунни.
Луттирдал ярмаркалул ца кьини баян бувну дия ОьрчIал литературалул кьинину. Му кьинигу дия хъинну чIярусса давурттив.
Хьунни «Мы – российский народ. Дагестан многонациональный» изданиялул, Ккавкказуллал чичултрал цIусса сборникрал, «Мавраевъ» луттирду итабакьай къатлул буккан бувсса «Балхар – аул гончаров» луттирал ва чIявусса цайминнулгу презентациярду.
Хьунни «ккуркки-стол» «Большая перемена» (оьрчIал литературалул масъаларттан хасну), литературалул ва музыкалул байран «Огни Тарки-Тау», «Кавказский экспресс», чичулт ва шаэртал И. Ильиннущалсса, А. Строкинащалсса, А. Снегиревлущалсса, М. Бутовлущалсса, В. Артемовлущал­сса ва цайминнащалсса хьунабакьавуртту.
Сентябрьданул 26-мур кьини дунни выставкалул хIасиллу, личIи-личIисса номинациярттаву ххув хьуминнан дуллунни бахшишру.
Хъиривмур кьини тIурча, респуб­ликалул хъамал лавгуна Дарбант шагьрулийн, луттирдал выставкалул лагрулий хьусса давурттавух му шагьрулийгу гьуртту хьун, тарихий­сса кIанттурдайн ва гьайкаллачIангу биян. Му шагьрулул юбилейгу хIисавравун ларсун.
«Тарки-Тау» луттирдал ярмаркалул даража шиная шинайн лавай хъанай бур. Мунил барашинна дунни ва ххуллухмур ярмаркалулгу.
Ялугьланну цIу-цIусса хьунабакьавурттах.