Махъзаманнай билаятрал виваллил политикалуву хъуннасса къулагъас дуллай бур жулла ялун нанисса жагьилмур никирах, миннал къайгъурдах, ми тарбия баврих. Буллай бур спорткомплексру, культуралул объектру, сакин буллай бур личIи-личIисса мяъна-мурадрал форумру, щурущи дуллай бур жагьилтал хIала-гьурттусса проектру.

Вай махъсса шиннардий жулла республикалий дуллалисса личIи-личIисса агьамсса шадлугъирттай жагьи-жугьулт хIала бакъасса, минная сакин дурсса волонтертурал кьюкьри дакъасса шадлугъру ттинингу нажагьсса дакъа къархьунни. Аьрасатнал регионнаясса жагьилтал батIайсса «Селигер», Ухссавнил Ккавкказуллал жагьилтурансса «Машук», жучIава бувайсса «Каспий» форумру сававну, жагьилтурансса политикалуву чIалансса ххуй-ххуйсса дахханашивуртту хьунни. Ялун личлай бур гьунар бусса, итххявх­сса, бакIру чаннасса жагьилтал ва цIакь хъанай дур дусшиврул дахIавуртту.
Ххуй-ххуйсса проектирдал автортуравух, жюрилул язи дургьусса КВН-далул кьюкьрал гьунар буминнавух, жагьилтурансса спортрал ва культуралул мероприятиярдаву чялишну гьуртту хъанахъиминнавух тикку-шикку хьусса батIавурттай ттун чIявуну хьунабакьай жулва лакрал жагьилтал. Пагьму-гьунар бушивруцIун, жулва оьрчIру пахру-ххара бакъассагу, яхI-намусрал бувччуссагу лякъай. Укунминнавасса ца ур МахIачкъалаллал спортрал ва туризмалул комитетрачIасса шагьрулул жагьилтурал центрданул каялувчинал хъиривчуну зузисса Рамазанов Исягу. Увну ур Ися Хъусращиял шяравасса ХIабибуллагьлул ва Назирал кулпатраву. Оьрмулул 5 шин хьусса чIумал вайннал кулпат бивзун бур МахIачкъалалив ялапар хъанан. Шикку Ися 1-мур классравун шагьрулул № 7 школа-лицейравун лавгун ур. Школагу къуртал бувну, дуклан увххун ур МахIачкъалаллал автодорожный университетравун ламурду ва ххуллурду бувайсса инженернал пишакаршиву ласун. Му бакъасса, Исял къуртал бувну бур финансирттал ва правалул институтгу.
Университетравун увххун, 1-мур курсирайва Ися хIала увххун ур цала вузрал личIи-личIисса давурттавух. Жагь факультетирттайсса, жагь вузирдал дянивсса КВН-най гьуртту шайсса ивкIун ур, мукуна жагьи-жугьултрал дяниву дуллалисса проектирдаву, субботникирдай, акциярдаву. Шиву дуклай уна ванал цалчинсса аьрххигу «Машук» форумрайн хьуну бур. Университетраву ванал сакин дурну дур волонтертурал кьюкьагу.
ЛичIи-личIисса шадлугъирттай «Футболкардай ва лакку цIагу дирзсса волонтертурал кьюкьа щил дурвав?» тIисса ттул танийвасса суалданун утти ттущал­сса ихтилатраву Исял бувсунни му цал сакиншиннаралу цалва вузраву сакин дурну диркIсса кьюкьа диркIшиву. «Цури ми?» тIисса цIа дизан ци савав хьуна кьюкьлуйн, куну цIувххукун, Исял, пишгу куну бувсунни, цал лакку мазрай цал-кIийлва цирив ца зат цIухлай ва суал бавсса цащала архIалсса оьрчIан ва цIа дизан ччан бивкIшиву. Цинявннан баянсса, дакIний личIансса куннасса цIа дур тIий.
Исял ппу ХIабибуллагь энергетикну ттукIрал подстанциярдай ва цаймигу объектирдай ттукIрал даву дуллалисса пишакар ур, нину Назира тIурча хIакьсса нину, кулпат хIисаврай шаппаллилсса буллай. Исял чIявусса уссурссу, мачча-ляхъин яхъанай бусса бур Лаккуй, Хъусрахь. Цала хьусса гьантта-чIунгу вайннал кулпатрал буттал шяраву гьан дувайсса дур.
«Машукрайн» лавгсса цалчинмур аьрххилул ссихIир бувсса куна Ися кIункIу хьуну ур ва аралувун. Хъинну хъунмасса гъирагу багьну бур личIи-личIисса проектру щаллу дуллалавриха зун. «Машукрайн» лавгсса кIилчинмур аьрххилия ва зана хьуну ур тIайлабацIулущал – ванал проектрал дурххуну дур 100 азарда къурушрал грант. Му грант ишла дурну сакин дурну дур волонтертурал кьюкьа.
Вай гьуртту къавхьусса, би­къавсса шадлугъру дакъар вузраву дуклакиссаксса ппурттуву. Ларгмур шинал Сочилий жулва билаятрал бюхттулну сакин бувсса Олимпий тIуркIурдай Ися цалла волонтертурал кьюкьлущалгу гьуртту хьуну ур. Олимпиада дуван 3 шинал хьхьичI волонтертал хIисаврай гьуртту хьун ччинал сияхI дуллалисса чIумала ванал гьуз учин бувну бур цащала дуклакими цалла цIа-бакI чичин дан. Чансса къабивкIун бур му чIумал вайннайн рихшантру дуллай, му хьун къабюхъайсса ишри, чун вих хъанай буру, тIисса. Ися тIурча, миннал тIутIимур бакIравун маласари, мавичIидишари тIий, миннаву гъира лещан къабитлай ивкIун ур. Ххюазараксса-ряхазараксса волонтернавух вайнналмур кьюкьагу душиву ххал хьувкун, циняв махIаттал хьуну бивкIун бур. Ххюлчинмур курсирай дуклаки­сса, укун жаваблувсса, дуллалимур дакIнийхтуну дуллалисса, бакI бусса жагьил хIисав хьуну, шагьрулул жагьилтурал Центрданийн оьвкуну бур зун. Шикку ванай бивхьусса буржругу, мурадругу, тIалавшиннардугу ца бакIрал духьурчагу лахъ хьуну, даврил ккуран гьарта хьуну дур. Масалдаран, университетраву вай так гьурттучиталну бивкIхьурча, Центрданий Ися мероприятиярду сакин дуллай, миннул жаваблувшиву ва сакиншинначишиву дуллай ур. Жагьилтурал Центрданул мероприятиярдаву чIяруми дур спорт ва туризм машхул дуллалисса. Масалдаран, уттигъанну вайннал сакиншиннаралу МахIачкъалалив хьунни «Кожаный мяч» тIисса хIаятирттал дянивсса турнир. Шикку гьуртту хьуну дур 70-ксса команда. Муниннин хьхьичI Дарбантлив Аьрасатнаву яла хъунмур ттугъ бишлашисса, Аьрасатнал ттугълин хасъсса шадлугъ дурну дур.
Шагьрулул Жагьилтурал центрданул дуллалисса давурттавух гьуртту хьун ихтияр дусса дур гъира-шавкь дусса ччима жагьилнахь. Цалла мероприятиярдаягу вайннал бусайсса бур социал сетирдаву, цанчирча жагьилтурал хъунмур чIун миннуву лаглай, мива хавар буну тIий дунияллий хъанахъимуния.
Исял бусаврийну, гьашину МахIачкъалалив дурсса спортрал мероприятиярдаву вайннал цIу-цIусса экстремал спортрал журарду ишла бувну бур. Гъидайдихьулий хьхьиривун бучIай чIун тIитIлатIисса шадлугърай шагьрулул Центрданул щинаву кайтсерфертурал тIуркIурду сакин бувну, му спортрал жура жагьилтурал дяниву машгьур дувансса шартIру дурну дур. Мукунма вайннал сакиншиннаралу чIа-чIаннин дувайсса дур зунттурдайн, ххяллайн лахълахъисса бяст-ччаллу ва турнирду.
Гьашину Пятигорскалий хьу­сса «Машук» форумрай Исял «Я люблю Махачкалу» тIисса проектрал презентация дурну дур. Ванал бусаврийну, утти ва проект щурущи дуван дакIний бусса бур цIусса дуккаврил шинал вузирдавун дуклан бувхсса щархъавасса жагьилталгу кIункIу бувну.
«Ва проект щурущи дуван хьхьичI жу хъун дакъасса анкетирование дуванну 1-ми курсирдал студентътуращал. КIул банну миннаву ци гьунарду бурив, цивппа дуклай бивкIсса школардай ссаха зий, цумур аралух гъира бивкIун бурив. Миккура дикIантIиссар, миннан шавкь дагьарча, гьуртту хьун бучIисса жагьилтурал жяматийсса сакиншиннардал сияхIгу. Гихунмай жу хIарачат буванну ми МахIачкъалаллащал кIул буван, жулва хъуншагьру ххира хьун буван, шагьрулул низам дуручлан. Оьруснал тIийкун, «со своим самоваром» къабувкIун шилун, бигьану кIанттул хьун бан. Бунияла, нач хъанан дикIай паркирдавусса, сквердавусса, кIичIирттавусса скамейкарду, чанирду лавхъсса фонарьду гъаргъун, мурхьру, тIутIив ккуччу дурну дур жулва жагьи-жугьултрал тIисса хаварду баллан бивкIукун», — буслай ур Ися.
Студентътуращал дакъасса вайннал Центрданул школардал дуклаки оьрчIащалссагу мероприятиярду дувайсса дур. Утти­гъанну Хъун дяъвилий Ххувшаву ларсун 70 шин хъанахъисса юбилейрал хьунийн дурсса субботникирдавух ва акциярдавух гьуртту хьуну бур шагьрулул сайки циняв школардал дуклаки оьрчIру.
Исял хияллаву цагу-кIирагу щаллу дуван дакIнийсса проектру дакъар. Миннавасса ца дур, масалдаран, жулла шаннагу райондалул жагьи-жугьулт бавтIун, вайннащал цачIусса даву дуллай айишин ччисса. Мукунна цаймигу.
«ХIакьину цукунсса-дунугу хьхьичIуннайшивурттайн биян ччисса хIарачат бусса жагьилтурал цалва кIунттихь бур цалва кьадар. Гьарнал цалва биялдаралу бур цанма бутан ччисса оьрмулул ххуллу. Инженернал пиша язи бувгьуну микку дуклай ивкIнугу, ттун нава лявкъунна жяматран, халкьуннан муниярдагу мюнпат-хайрсса, жагьилтал тарбия бавриву ттулвамур бутIа бишин бюхълахъисса давриву. Ттинин цалагу хIайп куну акъара нава ва ххуллийх лагаврия», — тIий ур Ися.
ЧIа учинну жула чулухагу укун хIарачат бусса жула лакку оьрчIан тIайлабацIу ва цIу-цIусса проектру щурущи дувансса хияллу ва ми бакIуйн буккаву.